ޔޫރޯ 2024 ކޮލިފައިން ގްރޫޕް އެފްގައި ބެލްޖިއަމާއި އޮސްޓްރިއާ ބައްދަލުކުރި މެޗު އެއްވަރުވެއްޖެއެވެ.
ބެލްޖިއަމްގެ ބްރަސެލްސްގައި ކުޅުނު މިމެޗް ނިމުނީ އެއްލަނޑު އެއްލަނޑުން ދެޓީމް އެއްވަރުވެގެންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބެލްޖިއަމްއިންނެވެ. ނަމަވެސް މިހަމަލާތަކުގެ ތެރެއިން އޮސްޓްރިއާގެ ގޯލަށް އަމާޒު ކުރެވުނީ އެންމެ ދެ ހަމަލާއެވެ. މިމެޗްގެ ލީޑު ނަގާފައިވަނީ އޮސްޓްރިއާއިންނެވެ.
މެޗްގެ 21 ވަނަ މިނެޓްގައި އޮސްޓްރިއާއަށް ކާމިޔާބު ކުރެވުނު މިލަނޑަކީ ބެލްޖިއަމްގެ މަންގާލާ ގައިގާ ޖެހިފާ ބައިކޮޅަށް ވަން ލަނޑެކެވެ. މިމެޗްގައި ބެލްޖިއަމްއިން އެއްވަރު ކުރި ލަނޑު މެޗްގެ 61 ވަނ މިނެޓްގައި ޖަހާދިނީ ރޭގެ މެޗްގައި ކެޕްޓަން ބޭންޑް އަޅައިގެން ކުޅެމުންދިޔަ ރޮމެލޫ ލުކާކޫއެވެ. މިމެޗްގައި ބެލްޖިއަމްގެ ކެވިން ޑި ބްރުއިނަރ އަނިޔާގެ ސަބަބުން ނުކުޅެއެވެ. އޭނާއަށްވަނީ ޔުއޭފާ ޗެމްޕިއަންސް ލީގުގައި މެންޗެސްޓަރ ސިޓީ އާއި އިންޓަރ މިލާން ބައްދަލުކުރިމެޗް މެޗްގެ ފުރަތަމަ ހާފްގައި އަނިޔާވެގެން ބާލާފައެވެ.
މިމެޗް އެއްވަރުވުމުން ގްރޫޕް އެފްގެ އެއްވަނައިގާ ތިން މެޗުން ލިބިފައިވާ ހަތް ޕޮއިންޓާއެކު އުޅެނީ އޮސްޓްރިއާއެވެ. އަދި ބެލްޖިއަމް އުޅެނީ ދެ މެޗުން ލިބިފައިވާ 4 ޕޮއިންޓާއެކު ތާވަލްގެ ދެވަނައިގައެވެ. ޔޫރޯ ކޮލިފައިންގގައި މިއަންނަ އަންގާރަ ދުވަހު ބެލްޖިއަމް ނިކުންނާނީ އެސްޓޯނިއާ އާދެކޮޅަށެވެ. އަދި އޮސްޓްރިއާ ބައްދަލުކުރުމަށް ހަމަޖެހިފައިވަނީ ސްވިޑްން އާއެވެ.