ކުރީގެ މަޝްހޫރު އެތުލީޓް ހުސެއިން ރިޔާޒް (ބޭބެ) ހަދާފައިވާ 1500 މީޓަރު ދުވުމުގެ ރިކޯޑު ރާއްޖޭގެ އުއްމީދީ ދުވުންތެރިޔާ ހުސެއިން ފަޒީލް ހާރޫނު މުގުރާލައިފިއެވެ.
ބޭބެ މި ރިކޯޑު ހަދާފައިވަނީ ބަންގްލަދޭޝްގައި 1993 ވަނަ އަހަރުގައެވެ. 30 އަހަރު ފަހުން މި ރެކޯޑް ފަޒީލް މުގުރާލާފައިވަނީ މިއަދު އިންޑިއާގެ ސްޓޭޓްތަކުގެ އެތުލެޓިކްސް މުބާރާތުގެ ފިރިހެނުންގެ 1500 މީޓަރުގެ ދުވުމުގައި ވާދަކޮށް 3:57.44 މިނިޓުން ރޭސް ނިންމައިގެންނެވެ.
ފަޒީލް ހިމެނުނު ހީޓުގައި އޭނާ ފުލަށް ދިޔަ ނަމަވެސް އޭނާ ހަދާފައިވަނީ ތާރީހީ ރިކޯޑެކެވެ. ބަންގްލަދޭޝްގެ ޑާކާގައި 1993 އޮތް އޮތް ސާފް ގޭމްސްގައި ބޭބެ ރިކޯޑު ހެދީ 4:00.06 މިނެޓުންނެވެ.
ކުރިޔަށްއޮތް އިންޑިއަން އޯޝަން އައިލެންޑް ގޭމްސް (އައިއޯއައިޖީ)އަށް ތައްޔާރުވުމުގެ ގޮތުން ފަޒީލް ދަނީ އިންޑިއާގައި ތަމްރީން ފުރިހަމަކުރަމުންއެވެ. އައިއޯއައިޖީގައި އެންމެ ފަހުން 1500 މީޓަރުގެ ރޭހުން ލޯ މެޑެލް ހޯދި ފަޒީލް މި ދުވުން ނިންމީ ކުރީގެ ވަގުތަށް ވުރެ އަވަހަށެވެ.
ރާއްޖޭގެ ފިރިހެނުންގެ 5000 އާއި 10000 މީޓަރުގެ ރެކޯޑް ވެސް އޮތީ ފަޒީލް އަތުގައި އޮތް އިރު އޭނާއަކީ މިއަހަރު ބޭއްވި ޤައުމީ މުބާރާތްތަކުގައި ވެސް ގިނަ ރިކޯޑުތަކެއް މުގުރާލާފައިވާ ދުވުންތެރިއެކެވެ.