މި އަހަރުގެ ސާފް ޗެމްޕިއަންޝިޕް ފުޓްބޯޅަ މުބާރާތުގައި ވާދަކުރުމަށް ރާއްޖޭގެ ޤައުމީ ފުޓްބޯޅަ ޓީމު ބެންގަލޫރަށް ހިނގައްޖެއެވެ.
މި ފަހަރުގެ މުބާރާތް ކުރިއަށްދާނީ އިންޑިއާގެ ބެންގަލޫރުގައި މި މަހުގެ 21 އިން ފެށިގެން އަންނަ ޖުލައި މަހުގެ ހަތަރުވަނަ ދުވަހުގެ ނިޔަލަށެވެ. އެއާއެކު މުބާރާތުގައި ވާދަކުރުމަށް މިރޭގެ ވަގުތެއްގައި ޤައުމީ ޓީމު ވަނީ ބެންގަލޫރަށް ގޮސްފައެވެ.
ބެންގަލޫރަށް ދިއުމުގެ ކުރިން ޤައުމީ ޓީމުން ވަނީ ޖަޕާނުގައި އަށް ދުވަހުގެ ޓްރެއިނިން ކޭމްޕެއް ފުރިހަމަކޮށްފައެވެ. އޭގެ ފަހުން ބެންގަލޫރަށް ދިޔުމަށް ސްރީ ލަންކާގެ ކޮލަމްބޯއަށް ދިޔައިރު، ބެންގަލޫރަށް ދާން އޮތް ފްލައިޓް ކެންސަލްވުމުގެ ސަބަބުން ލަންކާގައިވެސް ޤައުމީ ޓީމުން ވަނީ ފަރިތަކުރުންތައް ކުރިއަށް ގެންގޮސްފައެވެ.
ޖަޕާން ފުޓްބޯޅަ އެސޯސިއޭޝަން (ޖޭއެފްއޭ) ގެ އެހީތެރިިކަމާއެކު އެ ޤައުމުގެ ޤައުމީ ޓީމުވެސް ތަމްރީނުތައް ކުރުމަށް ބޭނުންކުރާ ޚާއްސަ ވިލެޖެއްގައި ޤައުމީ ޓީމުން ފަރިތަކުރުންތައް ކުރިއަށްގެންދިޔައިރު، މި ކޭމްޕުގައި ކުޅެން ހަމަޖެހުނު މެޗު ވަނީ ވިއްސާރަވުމުގެ ސަބަބުން ކެންސަލްކޮށްފައެވެ.
ޤައުމީ ޓީމުގެ މެނޭޖަރު އަބްދުﷲ ޝިބާއު ބުނީ ކުޅެން ހަމަޖެހިފައި އޮތް މެޗު ވިއްސާރައިގެ ސަބަބުން ކެންސަލްކުރީ ދެ ޓީމާއި ކޯޗުންވެސް މަޝްވަރާކުރުމަށްފަހު ކަމަށެވެ. އަދި މެޗު ނުކުޅެވުމަކީ އޭގެ ސަބަބުން ޓީމަށް ކޮންމެވެސް ވަރެއްގެ އުނިކަމެއް ލިބޭނެ ކަމެއް ކަމަށްވެސް ވަނީ ބުނެފައެވެ.
އިޓަލީގެ ކޯޗު ފްރެންޗެސްކޯ މޮރިއޭރޯގެ ކޯޗުކަމުގައި ރާއްޖޭން މި ފަހަރުގެ ސާފް ޗެމްޕިއަންޝިޕަށް ތައްޔާރުވަމުން އަންނައިރު، ޓީމުގައި މުޅިން އަަލަށް ޒުވާން ކުޅުންތެރިންތަކެއްވެސް ވަނީ ހިމަނާފައެވެ.
އެކަމަކު ޖަޕާނުގައި ކުރިއަށްދިޔަ ކޭމްޕުގެ ތެރެއިން ކަކުލަށް ލިބުނު އަނިޔާއަކާ ގުޅިގެން ރާއްޖޭގެ އެއް ނަންބަރު ގޯލްކީޕަރު މުޙައްމަދު ފައިސަލަށް ސާފް ޗެމްޕިއަންޝިޕުގައި ނުކުޅެވޭނެކަން ވަނީ ޔަގީންވެފައެވެ. ފައިސަލަށް އަނިޔާވުމާ ގުޅިގެން އޭނާގެ ބަދަލުގައި ޤައުމީ ޓީމަށް ޔުނައިޓެޑް ވިކްޓަރީ (ޔޫވީ) ގެ ކީޕަރު އަލީ ނާޖިހު ވަނީ ނަގާފައެވެ.
މި ފަހަރުގެ ސާފް ޗެމްޕިއަންޝިޕުގެ ފޯމެޓް ރޭވިފައިވާ ގޮތުން މުބާރާތް ކުރިއަށްދާނީ ދެ ގްރޫޕަކަށް ބަހާލައިގެންނެވެ. ކޮންމެ ގްރޫޕެއްގައި ހަތަރު ޓީމު ހިމެނޭއިރު، ގްރޫޕް އޭގައި ހިމެނެނީ އެންމެ ފަހުގެ ޗެމްޕިއަން އިންޑިއާ އާއި، ޕާކިސްތާނާއި، ކުވެއިތުގެ އިތުރުން ނޭޕާލެވެ. އަދި ރާއްޖެ އާއެކު ގްރޫޕް ބީގައި ހިމެނެނީ ލުބުނާނާއި، ބޫޓާން އަދި ބަންގްލަދޭޝްއެވެ.