ޔޫރޯ 2024 ކޮލިފައިން ގްރޫޕް ޑީގައި އާމީނިއާއިން ވަރުގަދަ ވޭލްސް ބަލިކޮށް، ގިނަ ބަޔަކަށް ހައިރާންކަން ގެނުވައިފިއެވެ.
ވޭލްސްގައި ކުޅުނު މިމެޗް އާމީނިއާ ކާމިޔާބުކޮށްފައިވަނީ 4 ލަނޑު 2 ލަނޑުންނެވެ.
ދެ ޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗްގައި ގިނައިރު ބޯޅަ ގެންގުޅެ ގިނަ ޙަމަލާ އުފައްދާފައިވަނީ ވޭލްސް އެވެ. އަދި މިމެޗްގެ ފެށުން ރަނގަޅުވީވެސް ވޭލްސްގެއެވެ. މިގޮތުން މެޗްގެ 10 ވަނަ މިނެޓްގައި ވޭލްސްއިން ވަނީ ލަނޑެއް ޖަހާ މެޗްގެ ލީޑުވެސް ނަގާފައެވެ. މިލަނޑު އެޓީމަށް ކާމިޔާބުކޮށްދިނީ ޑެނިއަލް ޖޭމްސްއެވެ.
ނަމަވެސް މި ލީޑު ވޭލްސްއަށް ހިފެހެއްޓޭގޮތްވީ ނުވަ ވަރަކަށް މިނެޓަށެވެ. އާމީނިއާގެ ލޫކަސް ޒެލަރްޔާންވަނީ މެޗްގެ 19 ވަނަ މިނެޓްގައި ލަނޑެއް ޖަހާ މެޗްގެ ނަތީޖާ ހަމަހަމަ ކޮށްފައެވެ. އަދި މެޗްގެ 30 ވަނަ މިނެޓްގައި ގްރާންޓް ލެއޮން ރާނޯސް ލަނޑެއް ޖަހާ މެޗްގައި ފުރަތަމަ ފަހަރަށް އާމީނިއާއިން ލީޑު ނެގުމާއެކު މުޅި ދަނޑަށް ހަމަހިމޭންކަން ވެރިވެގެންދިޔައެވެ. މިމެޗްގައި އާމީނިއާގެ 3 ވަނަ ލަނޑު މެޗްގެ 66 ވަނަ މިނެޓްގައި ޖަހާދިނީވެސް 2 ވަނަ ލަނޑު ޖަހާދިން ރާނޯސްއެވެ.
މިމެޗްގައި ވޭލްސްއިން ކާމިޔާބުކުރި 2 ވަނަ ލަނޑު މެޗުގެ 72 ވަނަ މިނެޓްގައި ޖަހާދީ ދެޓީމްގެ ދެމެދުގައި ފަރަގު އެއް ލަނޑަށް ބަދަލުކޮށްދީ އެޓީމަށް ހިތްވަރު އާކޮށްދިނީ ހެރީ ވިލްސަންއެވެ. ނަމަވެސް މިލަނޑު ޖެހިތާ 3 މިނެޓްފަހުން އާމިނިއާއިން ވަނީ އެޓީމްގެ ފަހު ލަނޑު ޖަހާ އަނެއްކާވެސް ދެ ލަނޑުގެ ލީޑެއް ނަގާފައެވެ. މިލަނޑު މެޗްގެ 75 ވަނަ މިނެޓްގައި ޖަހާދިނީ ފުރަތަމަ ލަނޑުވެސް ޖަހާދިން ޒެލަރްޔާންއެވެ.
މެޗްގައި ވޭލްސްއިން ކުރަމުންދިޔަ މަސައްކަތަށް އިތުރަށް ހުރަސް އެޅިގެންދިޔައީ މެޗްގެ 78 ވަނަ މިނެޓްގައި އެޓީމްގެ ކީފަރ މޯ އަށް ރަތްކާޑު ދެއްކުމުންނެވެ. އޭނާއަށް މިކާޑު ދައްކާފައިވަނީ ބޯޅަ ނެތިސް އާމީނިއާގެ ކީޕަރާއި ދެމެދު ހިނގި ކަމަކާއި ގުޅިގެންނެވެ.
މި ކާމިޔާބީއާއެކު އާމީނިއާއަށް މިވަނީ މިފަހަރުގެ ޔޫރޯ ކޮލިފައިންގައި ފުރަތަމަ ކާމިޔާބީ ލިބިގެން ގޮސްފައެވެ. މިގޮތުން އެޓީމަށް ދެމެޗުން ލިބިފައިވާ 3 ޕޮއިންޓާއެކު މިހާރު އުޅެނީ ގްރޫޕް ޑީގެ 4 ވަނައިގައެވެ. އަދި މިމެޗުން މޮޅުވިނަމަ ގްރޫޕްގެ އެއްވަނައަށް އެރުމުގެ ފުރުޞަތު އޮތް ވޭލްސް މިހާރު އޮތީ 3 މެޗުން ލިބިފައިވާ 4 ޕޮއިންޓާއެކު ގްރޫޕްގެ 3 ވަނައިގައެވެ.