ޕޮލަންޑާ ދެކޮޅަށް ކުޅުނު ބައިނަލްއަޤުވާމީ އެކުވެރިކަމުގެ މެޗުން ޖަރުމަން ބަލިވެއްޖެއެވެ.
ޕޮލެންޑްގެ ވޯސޯގައި ކުޅުނު މި މެޗް ޕޯލެންޑް ކާމިޔާބުކޮށްފައިވަނީ އެއްލަނޑު ސުންލަނޑުންނެވެ.
ޖަރުމަނުވިލާތުގެ ފަރާތުން މޮޅު ކުޅުމެއް ފެނިގެންދިޔަ މި މެޗުގެ ބޮޑުބައި ކޮންޓްރޯލް ކޮށްފައިވަނީވެސް ޖަރުމަނު ޓީމެވެ. މިގޮތުން މެޗްގައި ޖަރުމަނު ޓީމުންވަނީ 26 ޙަމަލާ އުފައްދާފައެވެ. މިމެޗްގައި ފެނިގެންދިޔަ ހަމައެކަނި ލަނޑު މެޗްގެ 31 ވަނަ މިނެޓްގައި ލިބުނު ކޯނަރަކުން ކާމިޔާބުކޮށްދިނީ ޕޮލަންޑުގެ ޑިފެންޑަރ ޔާކޫބް ކިވިއޯއެވެ. މިއީ އޭނާ މިހާތަނަށް ޕޮލެންޑް ޤައުމީ ޓީމަށް ކާމިޔާބުކޮށްދިން ފުރަތަމަ ލަނޑެވެ.
މިމެޗްގައި ޖަރުމަނުވިލާތަށް ޕެނަލްޓީ އެއް މެޗްގެ ރެފްރީ ދިން ނަމަވެސް ވީއޭއާތުން ބެލުމަށްފަހު ވަނީ އެނިންމުން ބަދަލުކޮށްފައެވެ. މިމެޗް ވެގެންދިޔައީ ޕޯލަންޑްގެ އުމުރުން 37 އަހަރުވީ ތަޖްރިބާކާރު ކުޅުންތެރިޔާ ޔާކޫބް ބްލަޒިކޯވްސްކީ ޤައުމީ ޓީމަށް ކުޅުނު ފަހު މެޗަށެވެ. 109 މެޗް ޤައުމީ ޓީމަށް ކުޅެދީފައިވާ ބްލަޒިކޯވްސްކީވަނީ މެޗްގެ 16 ވަނަ މިނެޓްގައި ބަދަލުކޮށްފައެވެ.
ޔޫރޯ 2024 ބާއްވާ ޤައުމުގެ ހައިސިއްޔަތުން އެ މުބާރާތަށް އޮޓޮމެޓިކުން ކޮލިފައިވެފައިވާ ޖަރުމަނުވިލާތް އަންނަނީ މުބާރާތަށް ތައްޔާރުވުމުގެ ގޮތުން ރަޙުމަތްތެރިކަމުގެ ގިނަ މެޗުތަކެއް ކުޅެމުންނެވެ.