އިނގިރޭސި ޕްރިމިއާ ލީގުގެ ވެސްޓް ހޭމް ޔުނައިޓެޑްގެ ކެޕްޓަން ޑެންލަން ރައީސް ހޯދުމަށް އާސެނަލްއިން ހުށަހެޅި ފުރަތަމަ ހުށަހެޅުން ވެސްޓް ހޭމްއިން ބަލައިނުގަނެ އަނބުރާ ފޮނުވާލައިފިއެވެ.
މައުލޫމާތު ލިބިފައިވާގޮތުގައި އާސެނަލްގެ މި ހުށަހެޅުން ވެސްޓް ހޭމް އަށް ބަލައިގެނެވެހާ ޝާއުގުވެރިއެއް ނުވިއެވެ.
އާސެނަލްގެ ކޯޗް އާސީޒަނަށް އެޓީމަށް އެންމެ ބޮޑަށް ގެނައުމަށް އެންމެ ބޭނުންވާ ކުޅުންތެރިޔަކީ ރައީސް ކަމުގައި ގިނަ ފަރާޓްތަކަކުން އަންނަނީ ބުނަމުންނެވެ. ނަމަވެސް އާސެނަލްގެ ފުރަތަމަ ހުށަހެޅުމުގައި ހިމެނޭ ކަންތައްތަކަކީ ވެސްޓް ހޭމްއަށް ބަލައިގަނެވޭ ވަރުގެ ކަންތައްތަކަކަށް ނުވާކަމަށް އިނގިރޭސި މީޑިއާތަކުން ހާމަކުރެއެވެ.
މިހުށަހެޅުން ބަލައިނުގަތްނަމަވެސް އާސެނަލްއިން އަދި އިތުރު ހުށަހެޅުމެއް ވަރަށް އަވަހަށް ހުށަހަޅާނެކަމަށް ޤަބޫލުކުރެވެއެވެ. އާސެނަލްގެ އިތުރުން ރައީސް ހޯދުމަށް ޗެމްޕިއަން މެންޗެސްޓަރ ސިޓީއިންވެސް ބިޑް ކުރުމަކީ ގާތްކަމެއް ކަމަށް ޚަބަރު ލިބެއެވެ. ނަމަވެސް ރައީސްއަށް އެއްވެސް ޝައުގުވެރިކަމެއް އޮތްތޯ ހާމަކުރާކަށް ސިޓީއިން ބޭނުމެއް ނުވެއެވެ.
ސިޓީގެ މުހިންމު ދެ ކުޅުންތެރިން ކަމުގައިވާ ކެޕްޓަން އިލްކައި ގުންޑޮގާން އާއި ބަރނާޑޯ ސިލްވަރގެ މުސްތަޤުބަލު އަދިވެސް ޔަޤީންވެފައިނުވާތީ ފަހަރުގައި ސިޓީގެ ކޯޗް ޕެޕް ގާޑިއޯލާއަށް ޓްރާންސްފަރ މާކެޓްގެ ތެރެއަށް ވަންނަން ޖެހުމަކީ ވަރަށް ގާތްކަމެކެވެ.
ވެސްޓް ހޭމްގެ ޗެއާމަން ޑޭވިޑް ސުލިވަން ހާމަކުރި ގޮތުގައި މިފަހަރު ރައީސް ޓީމް ދޫކޮށް ދާނެކަމުގެ 99 އިންސައްތަ ޔަޤީންވެފައިވާކަމަށެވެ. ރައީސް ވަނީ މިފަހަރު ޔުއޭފާ ޔޫރޮޕާ ކޮންފަރެންސް ލީގުގެ ތަށި ވެސްޓް ހޭމް ހޯދައި ދިނުމުގައި މުހިންމު ދައުރެއް އަދާކޮށްފައެވެ. އަދި މިހާތަނަށް އެޓީމަށް 245 މެޗް ކުޅެދީ 15 ލަނޑު ޖަހާދީފައިވެއެވެ.