ޔުއޭފާ ނޭޝަންސް ލީގުގެ ފައިނަލުގެ ފަހު ޖާގަ ސްޕެއިންއިން ކަށަވަރުކޮށްފިއެވެ.
މި މުބާރާތުގެ ފައިނަލުން ސްޕެއިން ޖާގަހޯދީ ރޭ ކުޅުނު ސެމީފައިނަލްގެ ދެވަނަ މެޗްގައި އިޓަލީވިލާތާއި ބައްދަލުކޮށް 2 ލަނޑު 1 ލަނޑުން މެޗް ކާމިޔާބުކޮށްގެންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ސްޕެއިން އިންނެވެ. މިމެޗްގެ ފެށުންވެސް ރަނގަޅުވީ ސްޕެއިންގެއެވެ. މިގޮތުން މެޗްގެ 3 ވަނަ މިނެޓްގައި އިޓަލީވިލާތުގެ ތަޖްރިބާކާރު ޑިފެންޑަރ ލިއޮނާޑޯ ބޮނޫޗީ އަތުން ބޯޅަ ހޯދުމަށްފަހު ސްޕެއިންގެ ޔެރެމީ ޕީނޯވަނީ އެޓީމަށް ލީޑު ނަގާދީފައެވެ.
ނަމަވެސް އިޓަލީވިލާތުންވަނީ މެޗްގެ 11 ވަނަ މިނެޓްގައި ލިބުނު ޕެނަލްޓީއަކުން މެޗްގެ ނަތީޖާ ހަމަހަމަ ކޮށްފައެވެ. ސްޕެއިންގެ ރޮބިން ލެ ނޯމަންޑްގެ އަތުގައި ސްޕެއިންގެ ޕެނަލްޓީ އޭރިއާ ތެރެއިން ޖެހުމުގެ ސަބަބުން ލިބުނު މިޕެނަލްޓީ އެޓީމަށް ކާމިޔާބުކޮށްދިނީ ސީރޯ އިމޮބިލިއޭއެވެ. މިމެޗުން ސްޕެއިން މޮޅުވި ލަނޑު މެޗްގެ 88 ވަނަ މިނެޓްގައި އެޓީމަށް ކާމިޔާބު ކޮށްދިނީ ބަދަލު ކުޅުންތެރިޔާ ހޮސެލޫއެވެ.
މިކާމިޔާބީ އާއެކު މިއަންނަ އާދިއްތަ ދުވަހު ނެދަލަންޑްސްގައި ކުޅުމަށް ހަމަޖެހިފައިވާ ފައިނަލުން ސްޕެއިން މިވަނީ ޖާގަހޯދާފައެވެ. އަދި ފައިނަލްގައި ސްޕެެއިން ބައްދަލުކުރާނީ ކްރޮއޭޝިއާ އާއެވެ. ނޭޝަންސް ލީގުގެ ފައިނަލް މެޗްގެ ކުރިން މުބާރާތުގެ 3 ވަނަ ހޮވާ މެޗްގައި ނެދަލަންޑްސް އާއި އިޓަލީވިލާތް ބައްދަލުކުރާނެއެވެ.