އަންހެނުންގެ 400 މީޓަރު ދުވުމުގެ ޤައުމީ ޖޫނިއާ ރިކޯޑު ރާއްޖޭގެ އަރަމުން އަންނަ ދުވުންތެރިޔާ ޒިވާ މޫސާ ޝަފީއު މުގުރާލައިފިއެވެ.
އޭނާ މި ރިކޯޑު މުގުރާލީ އިންޑިއާގެ ބުބަނޭޝްވަރުގައި ކުރިއަށްދާ އެ ޤައުމުގެ 62 ވަނަ ނެޝަނަލް އިންޓަރ ސްޓޭޓް ސީނިއާ އެތުލެޓިކްސް ޗެމްޕިއަންޝިޕުގައި ވާދަކޮށްގެންނެވެ. އެގޮތުން ޒިވާ ވަނީ އޭނާ ވާދަކުރި ހަތަރުވަނަ ހީޓުގެ ހަތްވަނަ ހޯދައި، 58.86 ސިކުންތުން ރޭސް ނިންމާފައެވެ.
މީގެ ކުރިން މި ރެކޯޑް އޮތީ 2019 ވަނަ އަހަރުގެ އޭޝިއަން ޔޫތު ޗެމްޕިއަންޝިޕުގެ 400 މީޓަރު ދުވުމުގައި ވާދަކުރި އައިޝަތު ހިމްނާ ހަަސަން އަތުގައެވެ. ހިމްނާ އެ ފަހަރު ރިކޯޑު ހެދީ 59.18 ސިކުންތުން ރޭސް ނިންމައިގެންނެވެ.
އަންހެނުންގެ 400 މީޓަރު ދުވުމުގެ ޖޫނިއާ ރިކޯޑު ޒިވާ މުގުރާލިއިރު، އޭނާ ވަނީ މިދިޔަ އޭޕްރީލް މަހު އިންޑިއާގައި ކުރިއަށްދިޔަ ގްރޯން ޕްރީގެ ތިންވަނަ މުބާރާތުން ލޯ މެޑެލް ހޯދާފައެވެ. ސީނިއާ ކެރިއަރުގެ ފުރަތަމަ ބައިނަލްއަޤުވާމީ މެޑެލް ޒިވާ ހޯދީ އަންހެނުންގެ 200 މީޓަރު ދުވުމުގައި ވާދަކޮށް 26.84 ސިކުންތުން ރޭސް ނިންމައިގެންނެވެ.
އަންނަ އާދީއްތަ ދުވަހުގެ ނިޔަލަށް އިންޑިއާގެ ބުބަނޭޝްވަރުގައި ކުރިއަށްދާ މުބާރާތުގައި ރާއްޖެއިން ވާދަކުރާ ދުވުންތެރިންނަކީ ޒިވާގެ އިތުރުން ހަސަން ސާއިދާއި، އަޙްމަދު ނަޖުދާން އަބްދުﷲ އާއި، ހުސެއިން ރިޒާ އަދި ހުސެއިން ފަޒީލް ހާރޫނެވެ. މި ފަސް ދުވުންތެރިންނަކީވެސް އަންނަ އޯގަސްޓް މަހު މަޑަގަސްކަރައިގައި އޮންނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށް ތައްޔާރުވަމުން އަންނަ ޤައުމީ އެތުލެޓިކްސް ސްކޮޑުގައި ހިމެނޭ ދުވުންތެރިންނެވެ.
އިންޑިއާގެ އިންޓަރ ސްޓޭޓް މުބާރާތުގައި ސާއިދާއި ރިޒާ ވަނީ މިހާތަނަށް ވާދަކޮށްފައެވެ. އެ ގޮތުން ސާއިދު ވަނީ 100 މީޓަރު ދުވުމުގެ ރޭސް 10.70 ސިކުންތުން ނިންމައި، ހީޓުގެ ތިންވަނަ ހޯދާފައެވެ. އަދި 800 މީޓަރު ދުވުމުގެ ހީޓު ތިނެއްގައި ވާދަކޮށް ރިޒާ ރޭސް ނިންމީ 1 މިނެޓު 55.77 ސިކުންތުންނެވެ.