ފުޓްބޯޅައިގެ މައި ޖަމުޢިއްޔާ ފީފާގެ ސެކްރެޓަރީ ޖެނެރަލުގެ މަޤާމު އަދާކުރަމުން އަންނަ ފަތުމާ ސަމޮއުރާ، ހަތް އަހަރަަށްފަހު މަޤާމުން ވަކިވާން ނިންމައިފިއެވެ.
އުމުރުން 60 އަހަރުގެ ސަމޮއުރާ މަގާމުން ވަކިވާން ނިންމާފައިވަނީ އޭނާގެ އާއިލާ އާއެކު ގިނަ ވުގުތު ހޭދަކުރުމުގެ ބޭނުގައިކަމަށްވެއެވެ.
2016 ވަނަ އަހަރު ފީފާގެ ސެކްރެޓަރީ ޖެނެރަލް ކަމުގެ މަގާމާއި ހަވާލުވި ސަމޮއުރާ މަގާމުން ވަކިވުމަށް ނިންމާފައިވަނީ މިއަހަރު ނިމުމުންނެވެ. އަދި އޮސްޓްރޭލިއާ އާއި ނިއުޒީލަންޑްގައި މިއަހަރު ބޭއްވުމަށް ހަމަޖެހިފައިވާ ވިމެންސް ވާރލްޑް ކަޕްގެ ހުރިހާ ކަމެއް ކުރިއަށްދާނީ ސަމޮއުރާގެ ބެލުމުގެ ދަށުން ކަމަށްވެއެވެ.
ސަމޮއުރާ ހާމަކުރިގޮތުގައި ފީފާ އާއި ގުޅުމަކީ އޭނާއަށް ނިންމުނު އެންމެ ރަނގަޅު ނިންމުންކަމަށެވެ. ސެނެގާލްއަށް ނިސްބަތްވާ ސަމޮއުރާއަކީ ކުރިން އެޤައުމުގެ ޑިޕްލޮމެޓެކެވެ. އަދި އ.ދ.ގެ އޮފިޝަލެއްގެގޮތުގައިވެސް ހަރަކާތްތެރިވެފައިވެއެވެ. ފީފާއަކީ މިހާރު ކުރިއާއި އަޅާބަލާއިރު ވަރަށް ރަނގަޅަށް ހިންގެމުން އަންނަ ޖަމްއިއްޔާއެއްގެގޮތުގައި އޭނާ ސިފަކުރިއެވެ. އަދި އޭނާ ފީފާއިން މިވަކިވަނީ މަގާމްގެ ޒިންމާ ފުރިހަމައަށް އަދާކުރެވުނުކަން އިހްސާސް ކުރެވުމާއެކު ފަހްރުވެރިކަމާއެކުއެވެ. އަދި މިވަގުތު އޭނާގެ ހުރިހާ ވަގުތެއް ހުސްކުރެވިފައިވަނީ ކުރިއަށް އޮތް ވިމެންސް ވާރލްޑް ކަޕް ކާމިޔާބު މުބާރާތަކަށް ހެދުމަށް ކަމަށްކަމަށެވެ. ސަމޮއުރާ ހާމަކުރިގޮތުގައި އޭނާގެ އުމުރުން 8 އަހަރުން ފެށިގެން އޭނާއަކީ ފުޓްބޯޅައަށް ލޯބިކުރަމުން އައި ފަރާތެއް ކަމަށާއި ފީފާ އާއެކު މިދަތުރު ކުރުމުގެ ފުރުސަތު ލިބުމުން އުފާކުރާކަމަށެވެ.
ފީފާގެ ރައީސް އިފަންޓީނޯވަނީ ސަމޮއުރާއަށް އިހްތިރާމް އަދާކޮށް އޭނާގެ ނިންމުން ހިތުގެ އަޑިން ބަލައިގަންނަކަން ހާމަކޮށްފައެވެ. އަދި ސަމޮއުރާ އާއެކު މަސައްކަތް ކުރުމުގެ ފުރުސަތު ލިބިގެން ދިއުމަކީ އޭނާއަށްވެސް ލިބިގެންދިޔަ ފަހުރެއްގެގޮތުގައި އިފަންޓީނޯ ފާހަގަކުރިއެވެ.