މަޖިލީހުގެ މަސައްކަތް ކުރިއަށްގެންދެވޭނެ މަގު ފަހިކޮށްދިނުމަށް އެމްޑީޕީ ޕީޖީ ގުރޫޕުން އިލްތިމާސްކޮށްފި
ރައްޔިތުންގެ މަޖިލީހުގެ ޖަލްސާތައް ބާއްވައި މަޖިލީހުގައި މިވަގުތު ހުއްޓިފައިވާ މުހިންމު މަސައްކަތްތައް ކުރިއަށް ގެންދެވޭނެ މަގު މަޖިލީހުގެ އިދާރާއިންނާއި މެންބަރުން ފަހިކޮށްދިނުމަށް އެމްޑީޕީގެ ޕާލިމެންޓްރީ ގުރޫޕުން އިލްތިމާސްކޮށްފިއެވެ.
އެމްޑީޕީ ޕާލިމެންޓްރީ ގްރޫޕުން ނެރުނު ނޫސްބަޔާނެއްގައިވަނީ ރައްޔިތުންގެ މަޖިލީހުގެ ޤަވާއިދުގައި ބުނާގޮތުން ރައްޔިތުންގެ މަޖިލީހުގެ އިތުރު އެއްވެސް ކަމަކާމެދު ބަހުސްކުރެވޭނީ އަދި ގޮތެއް ނިންމޭނީ މަޖިލީހަށް ހުށަހަޅާފައިވާ ނައިބް ރައީސް އީވާ ޢަބްދުﷲގެ އިތުރުބާރުނެތްކަމުގެ މައްސަލައަށް ގޮތެއް ނިންމުމަށްފަހުގައިކަމަށެވެ. އަދި މަޖިލީހުގެ ދާއިމީ ކޮމެޓީތަކަކީ މެދުނުކެނޑި ދެމިއޮންނާނެ ކޮމިޓީތަކެއްކަމަށާއި މަޖިލީހުން އެހެންގޮތަކަށް ފާސްނުކުރާހާ ހިނދަކު ކޮމިޓީތަކުގައި ތބި މެންބަރުން އެކޮމިޓީތަކުގައި ދެމިތިބޭނެކަމަށެވެ.
މިއަދު އޮތް ޖަލްސާ ކުރިއަށްގެންދިޔުމަށް އެމްޑީޕީ ޕާލިމެންޓަރީ ގުރޫޕުން ފުރިހަމަ އެއްބާރުލުން ދިނީ ޖަލްސާގެ އެޖެންޑާގައި ކޮމިޓީތައް އެކުލަވާލުމުގެ މައްސަލައާއި އިތުރު މުހިންމު މަސައްކަތްތަކެއް އޮތުމުންކަމަށް އެބަޔާނުގައިވެއެވެ.
އެމްޑީޕީ ޕާލިމަންޓަރީ ގްރޫޕުން ނެރުނު ބަޔާނުގައިވަނީ މިއަދު އެޖެންޑާގައި ހިމެނޭ މަޖިލީހުގެ ހުއްޓިފައިވާ ދާއިމީ ކޮމިޓީތައް އަލުން އެކުލަވާލުމުގެ މައްސަލައަކީ މިވަގުތު މަޖިލިސް ކުރިއަށް ގެންދިޔުމަށް ދިމާވެފައިވާ މައްސަލަ ހައްލުކުރުމަށް ކުރަންޖެހޭ އެންމެ މުހިންމު މަސައްކަތްކަމަށެވެ. އެ މައްސަލަ އެޖެންޑާކޮށްފައިވަނީ މަޖިލީހުގައި ތަމްސީލްވާ ހުރިހާ ސިޔާސީ ޕާޓީތަކާއި ވަކި ޕާޓީއަކަށް ނިސްބަތް ނުވާ މެންބަރުންނާއި ތިންފަހަރު މަތިން މަޝްވަރާކުރުމަށްފަހު މަޖިލީހުގެ ޤަވާއިދުގައި ބަޔާންކޮށްފައިވާ ހަމަތަކާއި ނިސްބަތުގެ މައްޗަށް ރިއާޔަތްކޮށްކަމަށް އެބަޔާނުގައިވެއެވެ. އަދި މި މައްސަލާގައި މަޖިލީހުގެ އިދާރާއިން ދެގޮތެއް ހުށައަޅާފައިވަނިކޮށް އެއިން އެއްވެސް ކަމަކަށް ބަހުސްކުރުމުގެ ފުރުޞަތުނުދީ މިއަދުގެ ޖަލްސާ ފެށުމާއެކު އިދިކޮޅު މެންބަރުންނަށް މަޖިލިސް ހަލަބޮލި ކުރުމަށް ރިޔާސަތުން ފުރުޞަތުދެއްވައި ޤަވާއިދާ އެއްގޮތަށް އަމަލު ކުރަން ފަސްޖެހި މަޖިލީހުގެ ރިޔާސަތުން ޖަލްސާ ހުއްޓާލިކަން ބަޔާނުގައި ވެއެވެ.
މިއަދުގެ ޖަލްސާއަށް އެޖެންޑާ ކުރައްވާފައިވާ ކަންތައްތަކުގެ ތެރޭގައި މަޖިލީހުގެ ކޮމިޓީތަކަށް ގެންނަން ހުށައަޅާފައިވާ ޙައްލުގެ މައްސަލައިގެ އިތުރުން ފެނުމުން މަހުރޫމްވެފަިއވާ ފަރާތްތަކަށް ވޯޓުލުމުގެ ޙައްޤު ކަށަވަރުކޮށްދިނުމަށްޓަކައި އިންތިޚާބުތަކާބެހޭ އާންމު ޤާނޫނަށް އިސްލާޙް ގެނައުމުގެ ބިލާއި ރިޔާސީ އިންތިޚާބުގެ ޤާނޫނަށް އިސްލާޙް ގެނައުމުގެ ބިލާއި ދިވެހިރާއްޖޭގެ ފަނޑިޔާރުންގެ ޤާނޫނަށް އިސްލާޙް ގެނައުމުގެ ބިލު ކޮމިޓިން ނިންމި ގޮތުގެ ރިޕޯޓް ހުށަހެޅުން ހިމެނެއެވެ. މީގެ އިތުރުން ދިވެހިރާއްޖޭގެ ޤާނޫނީ ފަންނުގެ ޤާނޫނަށް އިސްލާހް ގެނައުމުގެ ބިލާއި ދަރިމައިނުވުމުގެ މައްސަލަ ރާއްޖޭގައި އިތުރުވަމުންދާތީ އެކަަށް ޤައުމީ ސިއްޙީ އިންޝުއަރަންސް ނިޒާމްގެ ތެރެއިން ބޭސްފަރުވާ ކުރުން ފަހިކޮށްދިނުމަށް ހުށަހަޅާފައިވާ ޤަރާރަށް ވޯޓަށް އެހުމަށްވެސްވަނީ އެޖެންޑާ ކުރައްވާފައެވެ. މިފަދަ މުހިންމު މަސައްކަތްތަކެއް ކުރުމަށް މަޖިލީހުގައި އެޖެންޑާކުރައްވާފައި ވަނިކޮށް މަޖިލީހުގެ ނިޒާމު ނަގާލައި މަޖިލީހުގެ މަސައްކަތް ހުއްޓުވާލުމަކީ އެމްޑީޕީ ޕާލިމަންޓްރީ ގުރޫޕުން އިންތިޙާއަށް ކަންބޮޑުވާކަމެއްކަމަށް އެމްޑީޕީ ޕީޖީ ގުރޫޕުން ނެރުނު ބަޔާނުގައިވެއެވެ.