ޔުއެފާ ޗެމްޕިއަންސް ލީގުގެ ތަށި މެންޗެސްޓާ ސިޓީން ކާމިޔާބުކުރުމާއެކު، އެ ޓީމަށް ކުޅެމުން އަންނަ އާޖެންޓީނާގެ ފޯވާޑް ހޫލިއަން އަލްވަރޭޒް ތާރީޚުގެ ތެރެއިން ޖާގަ ހޯދައިފިއެވެ.
މިކާމިޔާބީއާއެކު އަލްވަރޭޒް ވެފައިވަނީ އެއް ސީޒަނެއްގައި ޔޫރަޕްގެ ތިން ތަށީގެ އިތުރުން ފީފާ ވޯލްޑް ކަޕުގެ ތަށި ކާމިޔާބުކުރި ފުރަތަމަ ކުޅުންތެރިޔާއަށެވެ.
އުމުރުން 23 އަަހަރުގެ އަލްވަރޭޒްގެ ކުރިން އެއް ސީޒަނެއްގައި ޗެމްޕިއަންސް ލީގު ނުވަތަ ޔޫރަޕިއަން ކަޕާއި، ވޯލްޑް ކަޕުގެ ތަށި ނުވަ ކުޅުންތެރިއަކު ވަނީ ހާސިލުކޮށްފައެވެ. ރޭގެ ފައިނަލް އިންޓަރ މިލާނުން ކާމިޔާބުކުރިނަމަ މި ލިސްޓްގެ 10 ވަނަ ކުޅުންތެރިޔާއަށް އެ ޓީމުގެ އާޖެންޓީނާގެ ފޯވާޑް ލައުޓާރޯ މާޓިނޭޒް ވެގެން ދިޔައީހެވެ. ނަމަވެސް މި ނުވަ ކުޅުންތެރިންނަށްވެސް ޑޮމެސްޓިކް ދެ މުބާރާތެއް އެއް ސީޒަނެއްގައި ހޯދިފައެއް ނުވެއެވެ.
މީގެ އިތުރުން އަލްވަރޭޒް މި ސީޒަން ނިންމާލީ ސިޓީގެ ދެވަނައަށް އެންމެ ގިނަ ލަނޑު ޖެހި ކުޅުންތެރިޔާގެ ގޮތުގައެވެ. އަދި މިދިޔަ އަހަރުގެ ފަހު ކޮޅު ޤަތަރުގައި ބޭއްވި ވޯލްޑް ކަޕުގައި އޭނާއަކީ ތިންވަނައަށް އެންމެ ގިނަ ލަނޑު ޖެހި ކުޅުންތެރިޔާއެެވެ.
ސިޓީން ވަނީ މި ސީޒަންގައި އިނގިރޭސި ޕްރިމިއަރ ލީގު ޖެހިޖެހިގެން ތިންވަނަ ފަހަރަށް ކާމިޔާބުކޮށްފައެވެ. އަދި މީގެ ހަފުތާއެއް ކުރިން ވަނީ ފައިނަލުގައި ވާދަވެރި މެންޗެސްޓާ ޔުނައިޓެޑް ބަލިކޮށް އިނގިރޭސި އެފްއޭ ކަޕުގެ ތަށިވެސް ކާމިޔާބުކޮށްފައެވެ. އަދި ރޭ އިންޓައާ ވާދަކޮށް ޗެމްޕިއަންސް ލީގުގެ ތަށި ކާމިޔާބުކުރުމާއެކު، މި ސީޒަން އެ ޓީމުން ނިންމާލީ ތިން ތަށި ކާމިޔާބުކޮށްގެންނެވެ.