ޔޫކްރެއިންގެ ދެކުނުގައިވާ ޚަރްސަންގެ ނޮވާ ކަޚޮވްކާގައި އޮންނަ ކަޚޮވްކާ ޑޭމަށް ޙަމަލާދީ ގޮއްވައިލުމުން ބޮޑު ސަރަޙައްދެއްގައި ފެންބޮޑުވުމާ ގުޅިގެން މަރުވި މީހުންގެ ޢަދަދު ތިނަކަށް އަރާފައިވާ ކަމުގައި ޔޫކްރެއިނުން ބުނެފިއެވެ. ނަމަވެސް، ނޮވާ ކަޚޮވްކާއަށް އަތްގަދަކޮށްފައިވާ ރަޝިޔާއިން ބުނީ ފެންބޮޑުވުމާ ގުޅިގެން ފަސް މީހުން މަރުވެފައިވާ ކަމުގައެވެ. ކަޚޮވްކާ ޑޭމްއަކީ ޑްނިޕްރޯ ކޯރުގައި ބިނާކޮށްފައިވާ ޑޭމްއެކެވެ.
ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވަނީ ފެންބޮޑުވެފައިވާ ސަރަޙައްދުތަކަށް ޒިޔާރަތް ކުރައްވާފައެވެ. ފެންބޮޑުވުމުގެ އަސަރުކޮށްފައިވާ ސަރަޙައްދުތަކުގައި ދިރިރުޅޭ 3,000 އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވާއިރު، ޒެލެންސްކީ ވަނީ އިތުރު މީހުން ސަލާމަތް ކުރުމަށް ކުރަމުންދާ މަސައްކަތްތައް ބައްލަވައިލައްވާފައެވެ.
"ފެންބޮޑުވެފައިވާ ސަރަޙައްދުތަކުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލުކުރުމުގެ މަސައްކަތް އަދިވެސް ދަނީ ކުރިއަށް. ފެންބޮޑުވުމާ ގުޅިގެން އެ ސަރަޙައްދުގެ ތިމާވެއްޓަށް ވަނީ ބޮޑެތި ގެއްލުންތަކެއް ލިބިފައި. މި ހާދިސާގައި ހާލުގައި ޖެހުނު ޢާއިލާތަކަށް މާލީ ގޮތުން އެހީތެރިކަން ފޯރުކޮށްދިނުމަށް ވެސް މި ދަނީ މަޝްވަރާ ކުރަމުން،" ޒެލެންސްކީ ވިދާޅުވިއެވެ.
ނޮވާ ކަޚޮވްކާއަށް ކްރެމްލިނުން ފޮނުވާފައި ހުންނަ މޭޔަރު ބުނީ ފެންބޮޑުވުމާ ގުޅިގެން އެ ރަށުން އެކަނިވެސް ފަހެއް ނުވަތަ ހަތް މީހުން މަރުވެފައިވާ ކަމުގައެވެ. އަދި، މަރުވި މީހުންގެ ޢަދަދުތައް ކަށަވަރު ކުރަން މަސައްކަތް ކުރަމުންދާ ކަމުގައެވެ. ގިނަ ޢަދަދެއްގެ ބަޔަކު ގެއްލިފައިވާ ކަމުގައި ވެސް އޭނާ ބުންޏެވެ. ޑްނިޕްރޯ ކޯރުގެ އައްސޭރިފަށުގައި ދިރިއުޅޭ 4,000 އަށްވުރެ ގިނަ މީހުން ސަލާމަތްކޮށް ރަޝިޔާއަށް ގެންގޮސްފައިވާ ކަމުގައި ވެސް އޭނާ ބުންޏެވެ.
ފެންބޮޑުވެފައިވާ ސަރަޙައްދުތަކުގައި ބަލިތައް ފެތުރުމުގެ ނުރައްކާތެރި ކަން އިތުރުވެފައިވާ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)ގެ ޑިރެކްޓަރ-ޖެނެރަލް ޓެޑްރޮސް އަދަނޮމް ގެބްރިއޭސޮސް ވިދާޅުވިއެވެ. އޭނާ ވިދާޅުވީ ފެންބޮޑުވުމާ ގުޅިގެން އެ ސަރަޙައްދުތަކުގެ ނަރުދަމާ ނިޒާމުތަކަށް ގެއްލުންވެފައިވާ ކަމަށާއި، ކޮލެރާ ފަދަ ނުރައްކާތެރި ބަލިތައް ޢާންމުވުމުގެ ފުރުޞަތު އެބައޮތް ކަމުގައެވެ.
ޑަބްލިޔު.އެޗް.އޯގެ ކުއްލި ހާލަތްތަކާ ބެހޭ ޓެކްނިކަލް އޮފިސަރ ތެރޭސާ ޒަކަރިއްޔާ ވިދާޅުވީ ރަޝިޔާ-ޔޫކްރެއިން ހަނގުރާމަ ފެށި ފަހުން ޔޫކްރެއިނުން ކޮލެރާ ބަލީގެ އަސަރުކޮށްފައިވާ މީހަކު ފެނިފައި ނުވި ނަމަވެސް އެ ބަލީގެ ޖަރާސީމުގެ އަސަރުތައް ފެނިފައިވާ ކަމުގައެވެ. އަދި، ފެނުގެ ޒަރީޢާއިން ފެތުރޭ ބަލިތައް ޢާންމުވުމުގެ ފުރުޞަތު އެބައޮތް ކަމުގައެވެ.
ފެންބޮޑުވުމާ ގުޅިގެން ޚަރްސަންގައި ވަޅުލާފައިވާ މައިންތައް ނެއްޓި، އެ ތަކެތި ގޮވައި، ޢާންމު ރައްޔިތުންގެ ފުރާނައަށް ނުރައްކާވުމުގެ ފުރުޞަތު އިތުރުވެފައިވާ ކަމުގައި ރެޑް ކްރޮސްއިން ވެސް ވަނީ އިންޒާރު ކޮށްފައެވެ. ރެޑް ކްރޮސްގެ ވެޕަން ކޮންޓެމިނޭޝަން ޔުނިޓުގެ އިސްވެރިޔާ އެރިކް ޓޮލެފްސަން ވިދާޅުވީ މައިން ވަޅުލާފައިވާ ސަރަޙައްދުތައް ކުރިން ދެނެގަނެވިފައިވީ ނަމަވެސް، ފެންބޮޑުވުމާ ގުޅިގެން އެ ތަކެތި އެހެން ހިސާބުތަކަށް ފެތުރިފައިވާނެ ކަމަށް ބެލެވޭ ކަމުގައެވެ. މިއީ ވަރަށް ނުރައްކާތެރި ހާލަތެއް ކަމުގައި ވެސް އޭނާ ވިދާޅުވިއެވެ.
ޚަރްސަންގައި ފެންބޮޑުވެފައިވާ ސަރަޙައްދުތަކުގައި ދިރިއުޅޭ މީހުން ރައްކާތެރި ހިސާބުތަކަށް ބަދަލުކުރަން މަސައްކަތް ކުރަމުންދާ ދަނޑިވަޅުގައި ރަޝިޔާއިން ވަނީ ވެރިރަށް ކީވަށް ވަރުގަދަ ޙަމަލާތަކެއް ދީފައެވެ. ކްރޫޒް މިސައިލާއި ޑްރޯން ބޭނުންކޮށްގެން ދީފައިވާ މި ޙަމަލާތަކުގައި އެކަކު މަރުވި ކަމުގައި ޔޫކްރެއިނުން ބުނެއެވެ.
ކީވަށް ޙަމަލާދޭން ރަޝިޔާއިން ބޭނުންކުރި ހަ މިސައިލްގެ ތެރެއިން ހަތަރު މިސައިލެއް ދިފާޢުކޮށްފައިވާ ކަމަށާއި، 16 ޑްރޯންގެ ތެރެއިން 10 ޑްރޯނެއް ދިފާޢުކޮށް ވައްޓައިލާފައިވާނެ ކަމުގައި ޔޫކްރެއިންގެ އަސްކަރިއްޔާއިން ބުނެއެވެ. ޔޫކްރެއިންގެ ދާޚިލީ ވުޒާރާއިން ބުނީ މި ޙަމަލާތަކުގައި އެކަކު މަރުވެ، އިތުރު ތިން މީހަކު ޒަޚަމުވެފައިވާ ކަމުގައެވެ. އަދި، ހަތަރު ޢިމާރާތަކަށް ބޮޑެތި ގެއްލުންތަކެއް ލިބުނެވެ.
ކީވްގެ އިތުރުން ޔޫކްރެއިންގެ އިރުމަތީގައި އޮންނަ ޑޮނެޓްސްކަށް ވެސް ރަޝިޔާއިން ވަނީ ވަރުގަދަ ޙަމަލާތަކެއް ދީފައެވެ. އެ ސަރަޙައްދުގެ ގަވަރުނަރު ޕަވްލޯ ކިރިލެންކޯ ވިދާޅުވީ ރަޝިޔާގެ ޙަމަލާތަކުގައި ތިން މީހުން މަރުވެފައިވާއިރު، އޭގެ ތެރޭގައި ހަތަރު އަހަރުގެ ކުޑަކުއްޖަކު ވެސް ހިމެނޭ ކަމުގައެވެ. ތިން ކުޑަކުދިން ޒަޚަމުވެފައިވާ ކަމުގައި ވެސް އޭނާ ވިދާޅުވިއެވެ.