ހުސައިން ޝިހާބުގެ ޚިދުމަތްތައް ފާހަގަކޮށް، ޕީއެސްއެމްއިން ޝަރަފުގެ ހަނދާނީ ފިލައެއް

ޓީވީ އެމްގެ އެންމެ މަތީ އިސްވެރިޔާގެ މަގާމުގައި ތިއްބަވައިގެން ބޮޑެތި ޚިދުމަތްތައް ކޮށްދެއްވާފައިވާ ބޭފުޅުންނަށް ޓީވީ މޯލްޑިވްސްއަށް 45 އަހަރު ފުރުމާ ގުޅިގެން ދެއްވާ ހަނދާނީ ފިލާ ހުސައިން ޝިހާބަށް މިއަދު އަރުވައިފިއެވެ. މިފިލާ ހަވާލުކޮށްދެއްވީ ޕީއެސްއެމްގެ ޑިރެކްޓަރުންގެ ބޮޑުގެ ޗެއަރމަން އިބްރާހީމް ހިލްމީއެވެ.

އަލްފާޟިލް ޙުސައިން ޝިހާބަކީ އެކި ދާއިރާތަކުން ދިވެހި ސަރުކާރަށް 39 އަހަރަށްވުރެ ދިގު މުއްދަތަކަށް ޚިދުމަތްކޮށްދެއްވާފައިވާ ބޭފުޅެކެވެ. އެމަނިކުފާނުގެ ޚިދުމަތުގެ ދާއިރާތަކުގެ ތެރެއިން ރާއްޖޭގެ ބްރޯޑްކާސްޓިންގ ދާއިރާއަށާއި، ޚާރިޖީ ދާއިރާއަށް ކޮށްދެއްވާފައިވާ ޚިދުމަތްތަކަކީ ފާހަގަކޮށްލެވޭ ޚިދުމަތްތަކެކެވެ.

އެޓޯލްސް ޑިވިޝަންގެ ވަގުތީގޮތުން ވަކީލުގެ އެހީތެރިޔާގެ ގޮތުގައި ޙުސައިން ޝިހާބު ދިވެހި ސަރުކާރަށް ޚިދުމަތްކޮށްދެއްވަން ފެއްޓެވީ 1 އޭޕްރިލް 1975 ގައެވެ. އެފަހުން އެކިއެކި ވުޒާރާތަކުގައި ޑިރެކްޓަރުކަމުން ފެށިގެންގޮސް ޑެޕިއުޓީ މިނިސްޓަރުކަމާއި، ސްޓޭޓް މިނިސްޓަރުކަމުގެ މަޤާމުތަކާއި، ދިވެހިރާއްޖެއިން އެކި ޤައުމުތަކަށް ކަނޑައަޅާ ސަފީރުކަމުގެ މަޤާމުތައް އެމަނިކުފާނު ފުރުއްވާފައިވެއެވެ.

ޙުސެއިން ޝިހަބަކީ ރާއްޖެ މިހާރު މިދެކޭ ޒަމާނީ ބްރޯޑްކާސްޓިންގ ވަކިން ޚާއްޞަކޮށް ޓެލެވިޜަން މޯލްޑިވްސަށް އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅެކެވެ. ޙުސައިން ޝިހާބު ޓީވީއެމްގެ މަސައްކަތުގެ ތެރެއަށް ވެދެވެވަޑައިގަތީ 1978 ވަނަ އަހަރުގެ ޑިސެމްބަރ މަހުގެ ތެރޭގައެވެ. އެންމެ ފުރަތަމަ ގުޅިވަޑައިގަތީ މެނޭޖަރެއްގެ ގޮތުގައެވެ. އޭރު ޓީވީއެމްގައި މަސައްކަތްކުރަން ތިބި މުވައްޒަފުންގެ ތެރޭގައި ދާއިރާގެ ތަޢުލީމާއި ހުނަރާއި ތަޖުރިބާ ލިބިފައި ތިބި މުވައްޒަފުން ނިސްބަތުން ވަރަށް މަދެވެ. އަދި އެ ދުވަސްވަރަކީ ރާއްޖޭގެ ނިސްބަތުންވެސް މި ދާއިރާއިން ރާއްޖޭގައި ތިއްބެވި ފަންނީ ބޭފުޅުން މަދު، ޓީވީއެމްގެ ޓެކްނިކަލް ވަޞީލަތްތައްވެސް މަދު ޒަމާނެކެވެ.

އެކިގޮތްގޮތުން ދިމާވި ތަފާތު ގޮންޖެހުންތަކާއި ހުރަސްތަކާއެކު ވެސް ޙުސައިން ޝިހާބުވެސް ހިމެނިވަޑައިގަންނަވާހެން އެ ދުވަސްވަރު ޓީވީއެމްގައި އެންމެ އިސްކޮށް މަސައްކަތްކުރެއްވި ބޭފުޅުންނުން ފެށިގެންގޮސް އެންމެ އާދައިގެ މަޤާމުގައި ތިބި މުވައްޒަފުން މަސައްކަތް ކުރަމުންދިޔައީ މުސާރައަށް ބެލުމެއް ނެތި ޤައުމީ ކަމެއްގެގޮތުގައި މިކަން ދެކެވަޑައިގެންނެވެ. މަސައްކަތުގެ ޖޯޝާއި ނުހަނު ފޯރީގައެވެ.

ޙުސެއިން ޝިހާބު ޓީވީއެމްގައި ފުރުއްވި މަޤާމުތަކުގެ ތެރޭގައި 16 ޑިސެމްބަރ 1978 އިން 14 އޯގަސްޓް 1979 އަކަށް އަދި 19 ޑިސެމްބަރ 1979 އިން ފެށިގެން 1 ޖެނުއަރީ 1980 މެނޭޖަރުކަމުގެ މަޤާމު އަދާކުރެއްވިއެވެ. އަދި 1 ޖެނުއަރީ 1980 ން 9 މެއި 1981 އަދި 24 ޖޫން 1984 ން 1 ނޮވެމްބަރ 1986 އަކަށް ޑެޕިއުޓީ ޑިރެކްޓަރުކަމުގެ މަޤާމު ވަނީ ފުރުއްވާފައެވެ. މި މުއްދަތުގެ ތެރޭގައި ޙުސައިން ޝިހާބު ވަނީ މިނިސްޓްރީ އޮފް ހޯމް އެފެރޒް އެންޑް ސޯޝަލް ސަރވިސަސްގެ ދަށުން ހިންގަމުންދިޔަ ފިލްމް ސެންސަރު ބޯޑުގެ މެންބަރުކަން 10 މާރިޗު 1986 އިން ފެށިގެން 1 ނޮވެމްބަރ 1986 އަކަށް ކުރައްވާފައެވެ. އޭގެފަހުން 1 ނޮވެމްބަރ 1986 އިން ފެށިގެން 16 ޖޫން 1987 އަކާ ހަމައަށް ޓެލެވިޜަން މޯލްޑިވްސްގެ ޑިރެކްޓަރކަންވެސް އެމަނިކުފާނު ވަނީ ކުރައްވާފައެވެ.

ޓީވީއެމްއަށް ޚިދުމަތްކުރެއްވި މުއްދަތުގެ ތެރޭގައި، ޓީވީއެމްގެ ޚިދުމަތް އަތޮޅުތަކަށް ފުޅާކޮށް، ޓީވީއެމުން ގެނެސްދޭ އުފެއްދުންތަކަކީ އާއްމުންނާގުޅޭ، އާއްމުން ބަލައިގަންނަ ފަދަ އުފެއްދުންތަކަކަށް ހެދުމާއި، ޓެކްނޮލޮޖީއާއި ވަޞީލަތުގެގޮތުން ފުރިހަމަ އަދި ގެނެސްދޭ ކޮންޓެންޓު މުއްސަނދިކުރުމާއި، ދާއިރާއިން މީހުން ނެރެ ތަމްރީންކުރުމުގައި ޙުސައިން ޝިހާބު އަދާކުރެއްވި ދައުރަކީ ފާހަގަކޮށްލެވޭ ދައުރެކެވެ.

ޓީވީ މޯލްޑިވްސް ހިންގެވުމާއި ޚިދުމަތްދެއްވުމާއި ތަރައްޤީކުރެއްވުމުގައި ޙުސައިން ޝިހާބު އަދާކުރެއްވި މުހިންމު ދައުރާއި ކޮށްދެއްވި އަގުހރި ޚިދުމަތުގެ އަގު ޕަބްލިކް ސަރވިސް މީޑިއާއިން މަތީފެންވަރެއްގައި ވަޒަންކުރެއެވެ.

ޓީވީ މޯލްޑިވްސްއަށް މިއަހަރު 45 އަހަރު ފުރުނުހިނދު، ޓީވީ މޯލްޑިވްސްއަށް އަގުހުރި ބޮޑެތި ޚިދުމަތްތައް ކޮށްދެއްވި ބޭފުޅުންގެ ތެރެއިން ޕަބްލިކް ސަރވިސް މީޑިއާގެ މެނޭޖްމަންޓުން ޚާއްޞަ ގޮތެއްގައި އެބޭފުޅުންގެ އަގުވަޒަންކޮށް ޚާއްޞަ އެވޯޑް އެރުވި އެއް ބޭފުޅަކީ ހުސައިން ޝިހާބެވެ.

މީގެ ކުރިން، ނިޝާން ޢިއްޒުއްދީނުގެ ޢިއްޒަތުގެ ވެރިޔާ އަޙްމަދު އާދަމަށާއި، އަލްމަރުޙޫމް ޙުސައިން މުޙައްމަދުގެ ހަނދާނަށްވެސް ޕީއެސްއެމުންވަނީ މިފިވަނީ އަރުވާފައެވެ.