ސަޢޫދީ ޢަރަބިއްޔާގެ ވަލީއަޙުދު މުޙައްމަދު ބިން ސަލްމާން އަލް-ސަޢުދު، އެ ޤައުމަށް މިހާރު ވަޑައިގެން އުޅުއްވާ އެމެރިކާގެ ޚާރިޖީ ވަޒީރު އެންތަނީ ބްލިންކަންއާ ބައްދަލުކުރައްވައިފިއެވެ. ބްލިންކަން ސަޢޫދީ ޢަރަބިއްޔާއަށް ކުރައްވަމުން ގެންދަވާ ދަތުރުފުޅުގެ މައިގަނޑު ބޭނުމަކީ، މެދުއިރުމަތީގައިވާ އެމެރިކާގެ އެންމެ ގާތް އެކުވެރިޔާއާ އެކު އިތުރަށް ގުޅުން ބަދަހިކުރެވޭނެ ގޮތްތަކާ މެދު މަޝްވަރާ ކުރުމެވެ.
ސަޢޫދީ ޢަރަބިއްޔާއަށް ބްލިންކަން ކުރައްވަމުން ގެންދަވާ ތިން ދުވަހުގެ މި ދަތުރުފުޅުގައި މެދުއިރުމަތީގެ މަސްރަޙުގެ އިތުރުން ބައިނަލްއަޤުވާމީ މައިދާނުގައި ހިނގަމުންދާ މުހިންމު ކަންކަމާ ގުޅޭގޮތުން މަޝްވަރާ ކުރައްވާނެއެވެ. މި ގޮތުން، ސޫދާނާއި ޔަމަނުގައި ހިނގަމުންދާ ދާޚިލީ ހަމަނުޖެހުންތައް ހުއްޓުވުމާ ގުޅޭ ގޮތުން ބްލިންކަންއާއި މުޙައްމަދު ވެސް ވަނީ މަޝްވަރާ ކުރައްވާފައެވެ.
މީގެ އިތުރުން، އައި.އެސް ޖަމާޢަތުގެ ޓެރެރިސްޓް ހަރަކާތްތައް ހުއްޓުވުމާއި، ޢަރަބި ދުނިޔެއާއި ޔަހޫދީ އިސްރާޢީލާ ދެމެދު އުފެދިފައިވާ ނުތަނަވަސް ކަން ހައްލު ކުރުމާ ގުޅޭ ގޮތުން ވެސް ދެ ބޭފުޅުން މަޝްވަރާ ކުރެއްވިއެވެ. ބްލިންކަން ސަޢޫދީ ޢަރަބިއްޔާއަށް ވަޑައިގަންނަވާފައި މި ވަނީ، މެދުއިރުމަތީގެ ޤައުމުތަކަށް ބާރާއި ނުފޫޒު ފޯރުވަން ޗައިނާއިން މަސައްކަތް ކުރަމުންދާ ދަނޑިވަޅެއްގައެވެ.
މެދުއިރުމަތީގެ ދެ ބާރުގެ ގޮތުގައި ބެލެވޭ ސަޢޫދީ ޢަރަބިއްޔާއާއި އީރާނާ ދެމެދު މާރިޗު މަހުގެ ތެރޭގައި ވަނީ ސިޔާސީ ގުޅުން އަލުން ގާއިމުކޮށްފައެވެ. ހަތް އަހަރަށްވުރެ ގިނަ ދުވަސް ވަންދެން ދެ ޤައުމުގެ ދެމެދުގައި ކެނޑިފައި އޮތް ގުޅުންތައް އަލުން އިޔާދަކޮށްފައި ވަނީ ޗައިނާއިން މެދުވެރިއެއްގެ ގޮތުގައި އަދާކުރި މަސައްކަތުންނެވެ.
މެދުއިރުމަތީގައި ސުލްޙަ ގާއިމުކޮށް، އެ ސަރަޙައްދަށް ހަމަޖެހުން ގެންނަން ކުރަމުންދާ މަސައްކަތްތަކުގައި ޗައިނާއިން ބައިވެރިވެ ކުރިއެރުންތައް ހޯދުމަކީ އެމެރިކާއަށް ދެކެން ފަސޭހަ މަންޒަރަކަށް ނުވާނެ ކަމުގައި މަސްރަޙު ދިރާސާކުރާ ފަރާތްތަކުން ދެކެއެވެ.
މެދުއިރުމަތިން ދެން ފެނިގެން ގޮސްފައިވާ އަނެއް ބަދަލަކީ، ޢަރަބި ލީގުގެ ޤައުމުތަކާއި ސޫރިޔާއާ ދެމެދު ކެނޑިފައި އޮތް ގުޅުންތައް އަލުން އިޔާދަކުރުމެވެ. ސޫރިޔާގެ ދާޚިލީ ހަނގުރާމައާ ގުޅިގެން ކަނޑައިލާފައިވާ ގުޅުންތައް އަލުން އިޔާދަކުރަން ފަށާފައި މި ވަނީ 12 ވަރަކަށް އަހަރަށް ފަހުއެވެ. ދާދިފަހުން ބޭއްވި ޢަރަބި ލީގުގެ ސަމިޓުގައި ވެސް ސޫރިޔާގެ ރައީސް ބައްޝާރު ހާފިޛް އަލް-އަސަދު ބައިވެރިވެ ވަޑައިގެންނެވިއެވެ.
މުޙައްމަދާއި ބްލިންކަންއާ ދެމެދު ބޭއްވެވި ބައްދަލުވުމުގައި ދެ ބޭފުޅުން އެކި ދާއިރާތަކުން ފުޅާ ދާއިރާއެއްގައި މަޝްވަރާ ކުރައްވާފައިވާ ކަމުގައި އެމެރިކާގެ ޚާރިޖީ ވުޒާރާއިން ބުނެއެވެ. މީގެ ތެރޭގައި، ސަޢޫދީ ޢަރަބިއްޔާގެ ރައްޔިތުންގެ އިންސާނީ ހައްޤުތައް ހިމާޔަތް ކުރަން ކުރަމުންދާ މަސައްކަތްތައް އިތުރަށް ހަރުދަނާ ކުރުން ހިމެނޭ ކަމުގައި ވެސް އެ ވުޒާރާއިން ބުންޏެވެ.
ބްލިންކަންގެ މި ދަތުރުފުޅުގައި ސަޢޫދީ ސަރުކާރުގެ އިސްވެރިންނާ އެކު ބައްދަލުވުންތައް ބޭއްވެވުމުގެ އިތުރުން، ރިޔާޟުގައި ބާއްވާ ގަލްފް ކޯޕޮރޭޝަން ކައުންސިލް (ޖީ.ސީ.ސީ)ގެ ބައްދަލުވުމުގައި ވެސް އޭނާ ބައިވެރިވެ ވަޑައިގަންނަވާނެއެވެ. މިއީ، ސަޢޫދީ ޢަރަބިއްޔާއިން އީރާނާ އެކު އަލުން ސިޔާސީ ގުޅުން ގާއިމުކުރި ފަހުން ބްލިންކަން އެ ޤައުމަށް ކުރައްވާ ފުރަތަމަ ދަތުރުފުޅެވެ.