ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ހަނގުރާމަ ހޫނުވެ، ޢާންމު ރައްޔިތުންނަށް ކުރިމަތިވެފައިވާ ނުރައްކާތެރި ކަން އިތުރުވެއްޖެއެވެ. އަސްކަރިއްޔާއާއި އާރް.އެސް.އެފްގެ ފައުޖުތަކާ ދެމެދު އެންމެ ވަރުގަދައަށް ޙަމަލާތައް ބަދަލު ކުރަމުން ދަނީ ވެރިރަށް ޚަރްތޫމްގައެވެ. އެ ރަށުން މިހާރު ކާބޯތަކެއްޗާއި ބޭސްފަރުވާއަށް ބޭނުންވާ ސާމާނު ހުސްވުމާ ވަނީ ގާތްވެފައެވެ.
ޚަރްތޫމްގެ ދެކުނާއި އިރުމަތީ ސަރަޙައްދުތަކުގެ އިތުރުން އެ ރަށުގެ އުތުރުން އޮންނަ ބަހްރީގައި ދެ ފަރާތުން ވަރުގަދަ ޙަމަލާތަކެއް ބަދަލުކުރަމުންދާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ޙަމަލާ ބަދަލުކުރުމުގައި ދެ ފަރާތުގެ ފައުޖުތަކުން ދަނީ އާޓިލަރީ ބަޑި ފަދަ ބަރު ހަތިޔާރު ވެސް ބޭނުން ކުރަމުންނެވެ. މަގުތަކުގައި ވެސް ދެ ފަރާތުގެ ފައުޖުތަކުން ދަނީ ހަނގުރާމަ ކުރަމުންނެވެ.
މި ހަނގުރާމައާ ގުޅިގެން ޚަރްތޫމްގައި ލޫޓުވުން ވެސް ވަނީ އިތުރުވެފައެވެ. އެ ރަށުގެ ރައްޔިތުން ބުނީ، އާރް.އެސް.އެފަށް ނިސްބަތްވާ މީހުން ޢާންމުންގެ ގެދޮރަށް ވަދެ، ތިޖޫރީތައް ފަޅައިލާ، ލޫޓުވަމުންދާ ކަމުގައެވެ. އަދި ކާރު ފަދަ ދުއްވާ އުޅަނދުފަހަރު ވަގަށް ނަގަމުންދާ ކަމަށާއި، ބައެއް ގެތަކަށް އާރް.އެސް.އެފްގެ މެންބަރުން ވެރިވެގަނެފައިވާ ކަމުގައި ވެސް ޚަރްތޫމްގެ ރައްޔިތުން ބުނެއެވެ.
ޚަރްތޫމްގެ ބޮޑު ސަރަޙައްދަކުން ކަރަންޓުގެ ޚިދުމަތް ވެސް ވަނީ މެދުކެނޑިފައެވެ. އަދި، ފިހާރަތަކުން މުދާ ހުސްވެފައިވާއިރު ބޭސްފިހާރަތަކުން ބޭހުގެ ބާވަތްތައް ވެސް ވަނީ ހުސްވެފައެވެ. ސޫދާންގައި ހިނގަމުންދާ ދާޚިލީ ހަމަނުޖެހުންތަކާ ގުޅިގެން ހާލުގައި ޖެހި އިންސާނީ އެހީއަށް ބޭނުން ޖެހިފައިވާ އެތަކެއް މިލިޔަން ރައްޔިތުންނަށް އެހީގެ ސާމާނު ފޯރުކޮށްދޭން އެހީދޭ ޖަމާޢަތްތަކުން ދަނީ މަސައްކަތް ކުރަމުންނެވެ. ނަމަވެސް، ޙަމަލާ ބަދަލުކުރުމަށް ހުއްޓުމެއް ގެނެވިފައި ނުވާތީ، އެ ކަމަށް ވަނީ ބޮޑެތި ހުރަސްތައް ކުރިމަތިވެފައެވެ.
ނީލަ ކޯރު ހުރަސްކޮށް ޚަރްތޫމްގެ އަނެއް ފަރާތުގައި އޮންނަ އޮމްދުރްމަންގައި ވެސް ވަރުގަދަ ޙަމަލާތަކެއް ދެމުންދާ ކަމުގައި އެ ރަށުގެ ރައްޔިތުން ބުނެއެވެ. އާރް.އެސް.އެފްގެ ފައުޖުތަކުން ދަނީ އެ ރަށުގައި އޮންނަ އަސްކަރިއްޔާގެ އިންޖިނިޔަރިންގ ކޯގެ މަރުކަޒު ހިފުމަށެވެ. ނަމަވެސް، އެ ކަން އަދި ކާމިޔާބުވެފައެއް ނުވެއެވެ.
މި ހަމަނުޖެހުންތަކާ ގުޅިގެން އެތަކެއް ސަތޭކަ ބަޔަކު މަރުވެފައިވާއިރު، ޚަރްތޫމްގައި ދިރިއުޅޭ 1.2 މިލިޔަނަށް ވުރެ ގިނަ މީހުން ވަނީ އެ ރަށް ދޫކޮށް ރައްކާތެރި ހިސާބުތަކަށް ބަދަލުވެފައެވެ. އަދި، ސޫދާން ދޫކޮށް އަވައްޓެރި ޤައުމުތަކަށް ހިޖުރަކޮށްފައިވާ އެ ޤައުމުގެ ރެފިއުޖީންގެ ޢަދަދު މިހާރު ވަނީ 400,000 އަށްވުރެ މައްޗަށް އަރާފައެވެ. ބައެއް ރަށްތަކުގެ ރައްޔިތުން ވަނީ މަގުތަކަށް ނިކުމެ އަސްކަރިއްޔާއާއި އާރް.އެސް.އެފާ ދެކޮޅަށް އަޑުއުފުލާފައެވެ.
މި ހަމަނުޖެހުންތަކުގައި އެންމެ އިސް ސަފުގައި ތިބީ އަސްކަރިއްޔާގެ އިސްވެރިޔާ ޢަބްދުލް ފައްތާޙް އަލް-ބުރުހާނާއި އާރް.އެސް.އެފްގެ އިސްވެރިޔާ ޖެނެރަލް މުޙައްމަދު ޙަމްދާން ދަގަލޯއެވެ. ސަޢޫދީ ޢަރަބިއްޔާއާއި އެމެރިކާ ގުޅިގެން މި ހަމަނުޖެހުންތައް ހުއްޓުވަން ކުރަމުންދިޔަ މަސައްކަތްތައް ނާކާމިޔާބުވުމާ ގުޅިގެން އ.ދއިން ވަނީ ޖެނެރަލް އަލް-ބުރުހާނާއި ދަގަލޯއާ މެދު ދަތިކުރުމުގެ ފިޔަވަޅުތައް އަޅާފައެވެ.
ހަމަނުޖެހުންތައް ހުއްޓުމަކަށް ގެނައުމާ ގުޅޭ މަޝްވަރާތައް ނާކާމިޔާބުވެފައިވީ ނަމަވެސް، ސަޢޫދީ ޢަރަބިއްޔާއިން އަދިވެސް ދަނީ ސުލްޙައިގެ ވާހަކަތައް އަލުން ފެށޭތޯ މަސައްކަތް ކުރަމުންނެވެ. ސަޢޫދީ ޢަރަބިއްޔާގެ ޚާރިޖީ ވަޒީރު ޕްރިންސް ފައިޞަލް ބިން ފަރްހާން އަލް-ސަޢުދު ވަނީ އަލް-ބުރުހާނާއި ދަގަލޯއަށް ފޯނުން ގުޅުއްވައި، މަޝްވަރާތައް އަލުން ފެށުމަށް ދަޢުވަތު އަރުވާފައެވެ.
ސުލްޙައިގެ ވާހަކަތައް އަލުން ފަށާނީ ޚަރްތޫމްގެ ހޮސްޕިޓަލްތަކާއި އިޖުތިމާޢީ މަރުކަޒުތަކުގެ އިތުރުން ޢާންމުންގެ ގެދޮރުން އާރް.އެސް.އެފްގެ ފައުޖުތަކުން ނުކުތުމުން ކަމުގައި އަސްކަރިއްޔާއިން ވަނީ ބުނެފައެވެ. ނަމަވެސް، އާރް.އެސް.އެފުން އެ ކަމަށް އެއްބަސްވެފައެއް ނުވެއެވެ.