ޔަހޫދީ އިސްރާޢީލުގެ ޓެރެރިސްޓު ސިފައިން ބަޑިޖަހައި ޝަހީދުކޮށްލި ފަލަސްޠީނުގެ ދެ އަހަރުގެ މުޙައްމަދު އަލް-ތަމީމްގެ ޖަނާޒާގައި އެތަކެއް ހާސް ބަޔަކު ބައިވެރިވެއްޖެއެވެ. އަލް-ތަމީމް ޝަހީދުވީ އަޅުވެތިކޮށްފައިވާ ހުޅަނގު އައްސޭރީގެ ރާމަﷲގެ ހުޅަނގުގައި އޮންނަ ނަބީ ޞާލިޙުގައި ޔަހޫދީ ސިފައިން ހިންގި އުދުވާންތަކެއްގައި އޭނާގެ ބޮލަށް ވަޒަނެއް އަރައި ލިބުނު ޒަޚަމުތަކަށް ފަރުވާދެމުން ގެންދަނިކޮށެވެ.
އަލް-ތަމީމަށް ފަރުވާދީފައި ވަނީ ތެލް އަވީވުގައި ހުންނަ ހޮސްޕިޓަލެއްގައެވެ. ނަބީ ޞާލިޙުގައި ޔަހޫދީ ސިފައިން ދިން ޙަމަލާތަކުގައި އަލް-ތަމީމްގެ ބައްޕަ ހައިތަމް އަލް-ތަމީމް ވެސް ވަނީ ޒަޚަމުވެފައެއެވެ. ޔަހޫދީ ސިފައިން އަލް-ތަމީމަށް ޙަމަލާދީ އޭނާ ޒަޚަމުކޮށްލާފައި ވަނީ، އޭނާގެ ގާތްތިމާގެ ކުއްޖެއްގެ އުފަންދުވަހުގެ ޕާޓީގައި ބައިވެރިވުމަށް އޭނާގެ ބައްޕައާ އެކު ކާރެއްގައި ދަތުރުކުރަމުން ދަނިކޮށެވެ.
ޔަހޫދީ އިސްރާޢީލުގެ އަސްކަރިއްޔާއިން ބުނީ އެ މީހުން ބަޑިޖަހާފައި ވަނީ އެ މީހުންނަށް އަމާޒުކޮށް ޙަމަލާދިން މުޖާހިދުންގެ ބަޔަކާ ދިމާލަށް ކަމުގައެވެ. ނަމަވެސް، ނަބީ ޞަލާޙުގައި ދިރިއުޅޭ މީހުން ބުނީ، އެ މީހުންގެ ގެދޮރާއި ދުއްވާ އުޅަނދުފަހަރަށް އަމާޒުކޮށް ޔަހޫދީ ސިފައިން ބަޑިޖެހުމަކީ ޢާންމު ކަމެއް ކަމުގައެވެ. އެ ދުވަހުގެ ޙަމަލާތަކުގައި ފަލަސްޠީނުގެ ދެ މީހަކު ޒަޚަމުވި ކަމަށާއި، މި ޙަމަލާތަކުގައި ޢާންމުންގެ މީހުންނަށް އަނިޔާވުމުން ހިތާމަކުރާ ކަމުގައި ވެސް ޔަހޫދީ އަސްކަރިއްޔާއިން ބުންޏެވެ.
"ފަލަސްޠީނުގެ ޢާންމު ރައްޔިތުންނާ ދެކޮޅަށް ބަޑީގެ ޙަމަލާތައް ދިނުމަކީ އިސްރާޢީލުގެ އަސްކަރިއްޔާގެ ސިޔާސަތަކާ ވެސް ޚިލާފު ކަމެއް. ނަމަވެސް، ޔަހޫދީ ސިފައިންގެ ޙަމަލާތަކުގައި ޝަހީދުކޮށްލާފައިވާ ފަލަސްޠީނުގެ ކުޑަކުދިންގެ ޢަދަދުތައް ދަނީ އިތުރުވަމުން. ޔަހޫދީ އިސްރާޢީލުން ހަނގުރާމައިގެ ކުށްތައް ހިންގަމުންދާއިރު އެ ކަން ހުއްޓުވާނެ އެއްވެސް ބަޔެއް ނެތް،" ކުޑަކުދިންގެ ޙައްޤުތައް ހިމާޔަތްކުރަން ވަކާލާތުކުރާ ޑިފެންސް ފޯރ ޗިލްޑްރަން އިންޓަރނޭޝަނަލް – ޕަލަސްޓައިން (ޑީ.ސީ.އައި.ޕީ)ގެ އިސް އޮފިޝަލެއް ކަމުގައިވާ އާޔިދް އަބޫ އަޤްޠާއިޝް ބުންޏެވެ.
ޔަހޫދީ އިސްރާޢީލުގެ އަސްކަރިއްޔާއިން މި އަހަރުގެ ތެރޭގައި ހިންގާފައިވާ ލާއިންސާނީ އުދުވާންތަކުގައި ޝަހީދުކޮށްލާފައިވާ ފަލަސްޠީނުގެ ކުޑަކުދިންގެ ޢަދަދު މިހާރު ވަނީ 27 އަށް އަރާފައެވެ. އޭގެ ތެރެއިން 20 ކުދިން ޝަހީދުކޮށްލާފައި ވަނީ ހުޅަނގު އައްސޭރީގައެވެ. އަދި ހުސްވި މޭ މަހުގެ ތެރޭގައި ޣައްޒާއަށް ދިން ނުރައްކާތެރި ބޮމުގެ ޙަމަލާތަކެއްގައި ފަލަސްޠީނުގެ ހަ ކުޑަކުދިން ވަނީ ޝަހީދުކޮށްލާފައެވެ.