އެމެރިކާއާއި ޗައިނާއާ ދެމެދު އުފެދިފައިވާ ނުތަނަވަސް ކަމަށް ހައްލެއް ހޯދުމާ ގުޅޭ ގޮތުން ދެ ޤައުމުގެ އޮފިޝަލުން މަޝްވަރާ ކުރައްވައިފިއެވެ. ދެ ޤައުމުގެ އޮފިޝަލުން ބައްދަލު ކުރައްވާފައި ވަނީ ޗައިނާގެ ވެރިރަށް ބެއިޖިންގައެވެ. މި މަޝްވަރާތަކުގައި ކޮންމެ ވެސް ވަރެއްގެ ކުރިއެރުންތަކެއް ލިބިފައިވާ ކަމުގައި އެމެރިކާގެ ޚާރިޖީ ވުޒާރާއިން ބުނެއެވެ.
މަޝްވަރާތަކުގައި އެމެރިކާ ތަމްސީލު ކުރައްވާފައި ވަނީ ޑެނިއެލް ކްރިޓެންބްރިންކާއި ސޭރާ ބެރާންއެވެ. ކްރިޓެންބްރިންކަކީ ޚާރިޖީ ވުޒާރާގެ އިރުމަތީ އޭޝިޔާ އަދި ޕެސިފިކް ސަރަޙައްދާ ބެހޭ ސެކްރެޓަރީގެ ނައިބެވެ. ބެރާނަކީ ޤައުމީ ސަލާމަތާ ބެހޭ ކައުންސިލްގެ ޗައިނާއާ ބެހޭ ޑެސްކުގެ އިސްވެރިޔާއެވެ. ޗައިނާއިން މަޝްވަރާތަކުގައި ބައިވެރިވީ މާ ޜައޮޝޫއާއި ޔެންގް ޓާއޯއެވެ. އެއީ، ޚާރިޖީ ވުޒާރާގެ މެދުފަންތީގެ ދެ ބޭފުޅުންނެވެ.
މި މަޝްވަރާތަކުގައި އެންމެ ބޮޑު އިސްކަމެއް ދީފައި ވަނީ، ދެ ޤައުމުގެ ދެމެދުގައި މުވާސަލާތު ކުރުން މެދުކަނޑައިނުލައި ކުރިއަށް ގެންދިއުމަށް ކަމުގައި އެމެރިކާގެ ޚާރިޖީ ވުޒާރާއިން ބުނެއެވެ. އަދި، ދެ ޤައުމުގެ ދެމެދުގައި އުފެދިފައިވާ ނުތަނަވަސް ކަމަށް ހައްލެއް ހޯދުމާ ގުޅޭ ގޮތުން އިތުރަށް މަޝްވަރާ ކުރުމަށް ދެ ފަރާތުން ވެސް އެއްބަސްވެފައިވާ ކަމުގައި އެ ވުޒާރާއިން ބުންޏެވެ. ދެ ޤައުމުގެ އޮފިޝަލުންގެ މެދުގައި ބޭއްވި މަޝްވަރާތަކާ ގުޅިގެން ޗައިނާއިން ބުނީ، ދެ ޤައުމުގެ ދެމެދުގައި މުވާސަލާތު ކުރުމަށް ހުރަސްއެޅޭ ފަދަ އެއްވެސް އަމަލެއް ނުކުރާނެ ކަމުގެ ޔަގީން ކަން އެމެރިކާއިން ދީފައިވާ ކަމުގައެވެ.
މި މަޝްވަރާތައް ބާއްވާފައި މި ވަނީ، ތައިވާން ކަނޑުގައި ދަތުރު ކުރަމުންދިޔަ އެމެރިކާގެ އަސްކަރީ މަނަވަރެއްގެ ސަލާމަތާއި ރައްކާތެރި ކަމަށް ނުރައްކާވާ ގޮތަށް ޗައިނާގެ އަސްކަރީ މަނަވަރަކުން ހަރަކާތްތެރިވެފައިވާ ކަމުގައި އެމެރިކާއިން ތުހުމަތުކޮށްފައިވާ ދަނޑިވަޅެއްގައެވެ. އެމެރިކާގެ އަސްކަރިއްޔާގެ އިންޑޯ-ޕެސިފިކް ކޮމާންޑުން ބުނީ ޔޫ.އެސް.އެސް ޗަންގް-ހޫންއަށް ނުރައްކާވާހާ ކައިރިން ޗައިނާގެ އުޅަނދެއް ދަތުރުކޮށްފައިވާ ކަމުގައެވެ.
ނަމަވެސް، ޗައިނާއިން ވަނީ މި ތުހުމަތުތައް ދޮގުކޮށްފައެވެ. އަދި، ޗައިނާގެ އަސްކަރީ މަނަވަރާ ދިމާލަށް ދަތުރުކޮށްފައި ވަނީ އެމެރިކާގެ މަނަވަރު ކަމުގައި ޗައިނާގެ ޚާރިޖީ ވުޒާރާގެ ތަރުޖަމާނު ވޮންގް ވެންބިން ވިދާޅުވިއެވެ. ބައިނަލްއަޤުވާމީ ޤާނޫނުތަކާއި މުއާހަދާތަކާ ޚިލާފު އެއްވެސް އަމަލެއް ޗައިނާގެ މަނަވަރުން ކޮށްފައި ނުވާނެ ކަމުގައި ވެސް އޭނާ ވިދާޅުވިއެވެ.
ހުސްވި ހަފުތާގައި އެމެރިކާގެ އަސްކަރީ މަތިންދާބޯޓަކަށް ޗައިނާގެ އަސްކަރީ މަތިންދާބޯޓަކުން ފުރައްސާރަ ކޮށްފައިވާ ކަމުގައި ވެސް އެމެރިކާއިން ތުހުމަތު ކުރެއެވެ. މި ހާދިސާ ހިނގާފައި ވަނީ ދެކުނު ޗައިނާ ކަނޑުގެ ސަރަޙައްދުގައެވެ. ޗައިނާގެ އަސްކަރިއްޔާއިން ހިންގާ މި ފަދަ އަމަލުތައް ފަހަކަށް އައިސް އިތުރުކޮށްފައިވާ ކަމުގައި އެމެރިކާގެ ވައިޓް ހައުސްގެ ޤައުމީ ސަލާމަތާ ބެހޭ ކައުންސިލްގެ ތަރުޖަމާނު ޖޯން ކަރބީ ތުހުމަތު ކުރައްވައެވެ.
ޗައިނާގެ ދިފާޢީ ވަޒީރު ލީ ޝޮންގްފޫއާ ބައްދަލުކުރެއްވުމަށް އެމެރިކާގެ ދިފާޢީ ވަޒީރު ލޮއިޑް އޮސްޓިން ދާދި ފަހުން އެދިވަޑައިގަތުމުން ޗައިނާއިން އެ ކަމަށް ދެކޮޅު ހަދާފައިވާ ކަން ފާހަގަކޮށްލަން ޖެހެއެވެ. މި ކަމާ ގުޅިގެން ދެ ޤައުމުގެ ދެމެދުގައި އުފެދިފައިވާ ނުތަނަވަސް ކަން ވަނީ އިތުރުވެފައެވެ. މި އަހަރުގެ ފެބުރުވަރީ މަހު އެމެރިކާގެ ޚާރިޖީ ވަޒީރު އެންތަނީ ބްލިންކަން ޗައިނާއަށް ކުރެއްވުމަށް ހަމަޖެހިފައި އޮތް ދަތުރުފުޅެއް ވެސް ފަސްކޮށްފައިވެއެވެ.
ނަމަވެސް، ހުސްވި މޭ މަހުގެ ތެރޭގައި އެމެރިކާގެ ޖާސޫސީ އިދާރާ – ސެންޓްރަލް އިންޓެލިޖެންސް އޭޖެންސީ (ސީ.އައި.އޭ)ގެ ޑިރެކްޓަރ ޖެނެރަލް ވިލިޔަމް ބަރްންސް ވަނީ ބެއިޖިންގަށް ޒިޔާރަތް ކުރައްވައި، އެ ޤައުމުގެ އޮފިޝަލުންނާ ބައްދަލު ކުރައްވާފައެވެ. ޗައިނާއާއި އެމެރިކާއާ ދެމެދު އެންމެ ބޮޑަށް ދެބަސްވުމާއި ނުތަނަވަސް ކަން އުފެދިފައި ވަނީ ތައިވާނުގެ މިނިވަންކަމާ ގުޅޭ މައްސަލައިގައެވެ. ތައިވާނަކީ މިނިވަން ދަޢުލަތެއްގެ ގޮތުގައި އެމެރިކާއިން ގަބޫލުކުރާއިރު، އެ ޤައުމުން ދަނީ އަސްކަރީ ދާއިރާއިން ތައިވާނަށް އެހީތެރިކަން ފޯރުކޮށްދެމުންނެވެ. ނަމަވެސް، ޗައިނާނުން ގަބޫލުކުރާ ގޮތުގައި ތައިވާނަކީ އެ ޤައުމުގެ ބައެކެވެ.