ސަލްޓަންޕާކްގައި ހުރި ކަޅުވަކަރު މިސްކިތް ގދ. ތިނަދުއަށް ބަދަލުކުރެއްވުމަށްޓަކާ މިސްކިތް ރޫޅާލެއްވުމަށް ކުރައްވަންޖެހޭ ތައްޔާރީތައް ކުރައްވަމުންގެންދަވާކަމަށް ހެރިޓޭޖް ޑިޕާޓްމެންޓުން ވިދާޅުވެއްޖެއެވެ.
ހެރިޓޭޖް ޑިޕާޓްމެންޓުން ވިދާޅުވީ، ކަޅުވަކަރު މިސްކިތް ރޫޅާލައްވައިގެން ކަނޑުމަގުން މިސްކިތުގެ ބައިތައް ތިނަދުއަށް ގެންދަވާއިރު، އެތަކެތި ވީހާވެސް ރައްކާތެރިގޮތަކަށް ގެންދަވަންޖެހޭކަމަށާ މިހާރު ކުރައްވަމުން ގެންދަވާ ތައްޔާރީތަކަކީ މިކަން ކަށަވަރުކުރެއްވުމަށް ކުރައްވަމުންގެންދަވާ ތައްޔާރީތަކެއްކަމަށެވެ.
ކަޅުވަކަރު މިސްކިތުގައި ނަމާދުކުރުން މިއަހަރުގެ ޖެނުއަރީ ފުރަތަމަދުވަހުންފެށިގެން ހުއްޓާލާފައިވާއިރު މިސްކިތް މިހާރު ހުރީ ރޫޅާލެއްވުމަށްޓަކައި ވަށައި ފެންސްޖައްސަވައި ބަންދުކުރައްވާފައެވެ.
ހެރިޓޭޖް ޑިޕާޓްމެންޓުން ވިދާޅުވީ ކަޅުވަކަރު މިސްކިތް މިހާރު ބަދަލުކުރުމަށް ނިންމާފައިވަނީ ތިނަދޫގެ ކުރީގެ ހުކުރުމިސްކިތު ގޯތިތެރެއަށްކަމަށެވެ. ތިނަދޫގެ ކުރީގެ ހުކުރުމިސްކިތު ގޯތިތެރެއަކީ ދާދިފަހުން އެސަރަޙައްދު ކޮނުމުގެ މަސައްކަތެއްގެ ތެރެއިން އާޘާރީ ބިނާއެއްގެ އަސަރުތައް ފެނިފައިވާ ސަރަޙައްދެކެވެ. މި އާޘާރީ ތަރާގަނޑު ހިމެނޭ ސަރަޙައްދު މިހާރު ސަރުކާރުންވަނީ އާޘާރީ ތަނެއްގެ ގޮތުގައި ތަރައްޤީކުރެއްވުމަށް ނިންމަވާފައެވެ.
ހެރިޓޭޖް ޑިޕާޓްމެންޓުން ވިދާޅުވީ ކަޅުވަކަރު މިސްކިތް ތިނަދުއަށް ބަދަލުކުރައްވައި ބަހައްޓަވާނީ ހުކުރުމިސްކިތު ގޯތިތެރޭގައި، ތަރާގަނޑުގެ އެއްފަރާތެއްގައިކަމަށެވެ. ކަޅުވަކަރު މިސްކިތަކީ ރޫޅައި ރޭވޭގޮތަށް ހަދާފައިވާ މިސްކިތެކެވެ. މީގެ ކުރިންވެސް މި މިސްކިތް ރޫޅާލައިގެން އެހެންތަންތަނަށް ބަދަލުކޮށްފައިވާކަން ފާހަގަކުރެވެއެވެ.