އެލް ސަލްވަޑޯގައި މިހާރު ކުރިއަށްދާ ވޯލްޑް ސާފިން ގޭމްސްގައި ވާދަކުރި ހީޓުން ދެވަނަ ހޯދައި، މުބާރާތުގެ ދެވަނަ ބުރުން ރާއްޖޭގެ އަޙްމަދު އަގީލް (އައްމަޑޭ) ޖާގަ ހޯދައިފިއެވެ.
މިދިޔަ މަހުގެ 30 އިން ފެށިގެން މި މަހުގެ ހަތަކަށް ކުރިއަށްދާ މި މުބާރާތުގައި ދުނިޔޭގެ 64 ގައުމަކުން 294 ސާފަރުން ވާދަކުރެއެވެ.
މެންސް އޯޕަން ބައިގެ ހީޓު 11 ގައި ވާދަކޮށް އައްމަޑޭ ދިޔައީ ދެވަނައަށެވެ. އޭނާ ދެވަނައަށް ދިޔައީ 6.36 ގެ ސްކޯއަކާއެކުގައެވެ. އައްމަޑޭ އެންމެ މަތިން ސްކޯކުރި ރާޅުގައި ލިބުނީ 3.43 އެވެ. މި ހީޓުގެ އެއްވަނަ ހޯދީ މެކްސިކޯގެ ސެބަސްޓިއަން ހެނާންޑޭޒްއެވެ. އޭނާ 16.34 ސްކޯ އެއް ހޯދިއެވެ.
ހީޓުގެ ދެ ވަނަ ހޯދި އައްމަޑޭ ދެ ވަނަ ބުރުގެ ހީޓު ހަޔެއްގައި ނުކުންނާނީ ކޮސްޓަރިކާގެ ކާލޯސް މުނޯޒް، އަޔަލެންޑްގެ ޖެކް ސްކޮޓް އަދި ބްރެޒިލްގެ ގެބްރިއެލް މެދީނާއާ ދެކޮޅަށެވެ.
މި މުބާރާތުގައި ރާއްޖޭގެ އައްމަޑޭގެ އިތުރުން ދެން ވާދަކުރަނީ، ހޫދު އަޙްމަދު އަދި އިސްމާއިލް ރަޝީދު (ސްމައިލީ) އެވެ.