އިނގިރޭސި ޕްރިމިއަރ ލީގުގެ މެންޗެސްޓާ ޔުނައިޓެޑަށް ކުޅެމުން އަންނަ ޕޯޗުގަލުގެ ޑިފެންޑަރ ޑިއޮގޯ ޑަލޮޓް, އެ ކުލަބާއެކު ހަދާފައިވާ އެއްބަސްވުން އައުކޮށްފިއެވެ.
މަޢުލޫމާތުލިބިފައިވާގޮތިގައި ޑަލޮޓް ވަނީ ޔުނައިޓެޑްގައި އިތުރު ފަސް އަހަރު މަޑުކުރަން ނިންމާ އެއްބަސްވުން ސޮއިކޮށްފައެވެ. މި އާ އެއްބަސްވުމުގެ ދަށުން ޑަލޮޓް އެކްލަބްގައި 2028 ވަނަ އަހަރުގެ ޖޫން މަހުގެ ނިޔަލަށް ދެމިހުންނާނެއެވެ. އަދި އެ އެއްބަސްވުމުގައި ދެފަރާތުން ބޭނުންވެއްޖެ ހާލަތެއްގައި އިތުރު އެއް އަހަރު އިތުރު ކުރުމުގެ ފުރުސަތުވެސް ހުޅުވާލާފައިވެއެވެ.
އުމުރުން 24 އަހަރުގެ ޑަލޮޓް ޔުނައިޓާއި ގުޅިފައިވަނީ 2018 ވަނަ އަހަރު ޕޯޗުގަލްގެ ޕޯޓޯއިންނެވެ. އަދި މިހާތަނަށް ވަނީ 107 މެޗް ކުޅެދީފައެވެ. މި އެއްބަސްވުމުގައި ސޮއި ކުުރުމަށްފަހު ވާހަކަ ދައްކަމުން ޑަލޮޓް ބުނީ މިވަގުތު ޓީމްގައި ތިބި ގިނަ ކުޅުންތެރިންނަށް ގަބޫލްކުރެވޭ ގޮތުގައި މިއީ އެކްލަބުން ކުރާ ހާއްސަ ދަތުރެއްގެ ފެށުން ކަމަށެވެ. އަދި މިވަގުތު ހުރިހާ ކުޅުންތެރިންވެސް ހުރިހާ ސަމާލުކަމެއް ދީފައިވަނީ ކުރިއަށްއޮތް އެފްއޭ ކަޕްގެ ފައިނަލް މެޗަށް ކަމަށްވެސް އޭނާ ފާހަގަކުރިއެވެ.
ޕޯޗުގަލް ޤައުމީ ޓީމަށް 11 މެޗް ކުޅެދީފައިވާ ޑަލޮޓް އެންމެ ފުރަތަމަ ޔުނައިޓެޑާއި ގުޅުނު އިރު އޭނާއަށް ފުރަތަމަ އެގާރައިން ޖާގަހޯދުން ދަތިވެފައިވީ ނަމަވެސް، އެޓީމްގެ މިހާރުގެ ކޯޗް އެރިކް ޓެން ހާގް އެކްލަބާއި ހަވާލުވިފަހުން އޭނާ އަންނަނީ ގަވައިދުން ކުޅެމުންނެވެ. މިގޮތުން ޓެން ހާގްގެ އިރުޝާދުގެ ދަށުން 42 މެޗްގައި ޑަލޮޓް ވަނީ ކުޅެފައެވެ.