އާމްދަނީ އިތުރުކޮށް، އިތުރު އަމާޒުތަކަށް ވާސިލުވުމަށް 5 ވަނަ ޓޫރިޒަމް މާސްޓަރ ޕްލޭން އިފްތިތާހުކޮށްފިއެވެ.
5 ވަނަ ޓޫރިޒަމް މާސްޓަރ ޕްލޭނަކީ ރާއްޖޭގެ ފަތުރުވެރިކަމުގެ ސިނާއަތް ދެމެހެއްޓެނިވި ގޮތެއްގައި ކުރިއަރުވައި ތަރައްޤީކުރުމަށްޓަކައި 2023 ވަނަ އަހަރުން 2027 ވަނަ އަހަރަށް ޓޫރިޒަމް މިނިސްޓްރީން އެކުލަވާލާފައިވާ ސްޓްރެޓެޖިކް ޕްލޭނެކެވެ.
މި މާސްޓަރ ޕްލޭނަށް އެކުލަވާލުމުގެ މަސައްކަތް ކުރިއަށް ގެންގޮސްފައިވަނީ އޭޝިއަން ޑިވެލޮޕްމަންޓް ބެންކު، އޭޑީބީގެ ހިލޭ އެހީގެ ދަށުންނެވެ.
މޯލްޑިވްސް ނެޝަނަލް ޔުނިވަރސިޓީގެ އޮޑިޓޯރިއަމްގައި ބޭއްވި ރަސްމިއްޔާތެއްގައި ޓޫރިޒަމް މާސްޓަރ ޕްލޭން އިފްތިތާހުކޮށްދެއްވީ އިކޮނޮމިކް މިނިސްޓަރ ފައްޔާޞް އިސްމާއިލްއެވެ.
މިއަދު އިފްތިތާޙުކުރި ޓޫރިޒަމް މާސްޓަރ ޕްލޭންގައި މި ދާއިރާއިން ހާސިލްކުރަން ބޭނުންވާ މުހިއްމު 15 އަމާޒެއް ފާހަގަކޮށްފައިވެއެވެ.
ޓޫރިޒަމް މާސްޓަރ ޕްލޭންގައި ކަނޑައަޅާފައިވާ އަމާޒުތަކުގެ ތެރޭގައި އައު އުފެއްދުންތައް ތައާރަފްކުރުމާއި، ރާއްޖޭގެ ހުރިހާ ރަށަަކަށްވެސް ފަތުރުވެރިކަމުގެ ސަބަބުން ލިބޭ މަންފާ އިތުރުކުރުން ހިމެނެއެވެ. މީގެއިތުރުން ޤާނޫނީގޮތުން ގެންނަންޖެހޭ ބަދަލުތަކާއި ކުރިއަރަމުން އަންނަ ޓެކޮނޮލޮޖީއާއި އިއާދަކުރަނިވި ހަކަތައާ ގުޅޭ އަމާޒުތަކެއްވެސް މާސްޓަރ ޕްލޭންގައިވެއެވެ.
މި ރަސްމިއްޔާތުގައި ވާހަކަ ދައްކަވަމުން ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ ވޭތިވެދިޔަ 50 އަހަރުވެސް ރާއްޖެއިން ފަތުރުވެރިކަން ކުރިއަށްގެންގޮސްފައިވަނީ ކާމިޔާބުކަމާއެކުކަމަށެވެ. އަދި ޓޫރިޒަމް މާސްޓަރ ޕްލޭން ހަދާފައިވަނީ އެގޮތުގެ މަތިން ކުރިއަށްދިއުމަށްކަމަށްވެސް މިިނިސްޓަރ ވިދާޅުވިއެވެ.
ޓޫރިޒަމް މިނިސްޓްރީން ވިދާޅުވީ އޭޑީބީގެ އެހީއާއެކު މާސްޓަރ ޕްލޭންގައި ޖުމްލަ 10 ކޮންސަލްޓަންޓުން މަސައްކަތްކޮށްފައިވާއިރު 8 ކޮންސަލްޓަންޓުން އައްޔަންކުރެވިފައިވަނީ ލޯކަލް ކޮންސަލްޓެންސީގެ އުސޫލުނެވެ. އަދި ލީޑް އާއި މާކެޓިންގ އެންޑް ޕްރޮޑަކްޓް ޑިވެލޮޕްމަންޓް ކޮންސަލްޓަންޓް އައްޔަންކުރެވިފައިވަނީ އިންޓަނޭޝަނަލް ކޮންސަލްޓެންސީގެ އުސޫލުންކަމަށްވެސް މިނިސްޓްރީން ވިދާޅުވެއެވެ.