ނޭޕާލުގައި ކުރިއަށްދާ ކާވާ ވިމެންސް ވޮލީބޯލް ޗެލެންޖް ކަޕް 2023 ގައި ސްރީ ލަންކާ އަތުންވެސް ބަލިވެ ރޭންކިން މެޗުތަކުގައި ރާއްޖޭގެ އަންހެން ވޮލީބޯޅަ ޓީމު ވާދަކުރަން ޖެހިއްޖެއެވެ.
މި މުބާރާތުގެ ގްރޫޕް ބީގައި ކުޅުނު ތިން މެޗުންވެސް ރާއްޖެ ވަނީ ބަލިވެފައެވެ. އެގޮތުން މިއަދު ހަވީރު ކުޅުނު މެޗުގައި ލަންކާ އަތުން ސީދާ ތިން ސެޓުން ރާއްޖެ ބަލިވިއިރު، މީގެ ކުރިން ވަނީ ކަޒަކްސްތާނާއި އުޒްބެކިސްތާން އަތުންވެސް ސީދާ ތިން ސެޓުން ބަލިވެފައެވެ.
މިއަދު ކުޅުނު މެޗު ފަށައިގެން ރާއްޖެއިން ފުރަތަމަ ސެޓުގައި ރަނގަޅު ކުޅުމެއް ދެއްކި ނަމވެސް، މި ސެޓު ރާއްޖެއަށް ގެއްލިގެންދިޔައީ 25-18 އިންނެވެ. އަދި މެޗުގެ ދެވަނަ ސެޓު ފަށައިގެން ލަންކާއިން ވަނީ 10 ޕޮއިންޓުގެ ލީޑެއް ވަނީ ނަގާފައެވެ. ނަތީޖާއަކަށްވީ ރާއްޖެއަށް މާ އެދެވޭ ކުޅުމެއް ނުދެއްކި، ފަސޭހަކަމާއެކު ލަންކާއިން ސެޓު ގެންދިޔުމެވެ. މި ސެޓު ލަންކާއިން ކާމިޔާބުކުރީ 25-13 އިންނެވެ.
އެކަމަކު މި މެޗުގެ ތިންވަނަ ސެޓުގައި ރާއްޖެއިން ކުޅުން ރަނގަޅުކުރިއިރު، މި ސެޓު ފަހު ޕޮއިންޓާ ހަމައަށް ދިޔައީ ވަރަށް ވާދަވެރިކޮށެވެ. މި ސެޓުގައި ރާއްޖެއިން ރަނގަޅު ކުޅުމެއް ދެއްކިއިރު، ޚާއްސަކޮށް އެޓޭކުތަކާއި ޓީމުގެ ޑިފެންސް މި ސެޓުގައި ފެނިގެންދިޔައީ ރަނގަޅަށެވެ. ނަތިޖާއެއްގެ ގޮތުން މި ސެޓުގައި ރާއްޖެއިން ވަނީ ދެ ފަހަރެއްގެ މަތިން ލީޑުވެސް ނަގާފައެވެ. އެކަމަކު ވާދަވެރި ކުޅުމެއް ފެނިގެންދިޔަ މި ސެޓު ލަންކާއިން ގެންދިޔައީ 26-24 އިންނެވެ.
މި ނަތީޖާއާއެކު ރާއްޖެ ހިމެނުނު ގްރޫޕް ބީގެ އެއްވަނަ ދިޔައީ ތިން މެޗުން މޮޅުވި ކަޒަކްސްތާނެވެ. ދެވަނައަށް ދިޔައީ ތިން މެޗުގެ ތެރެއިން ދެ މެޗުން މޮޅުވި އުޒްބެކިސްތާނެވެ. ކަޒަކްސްތާނާއި އުޒްބެކިސްތާން ސެމީ ފައިނަލުގައި ވާދަކުރާއިރު، ތިންވަނައަށް ދިޔަ ލަންކާ އާއި ފުލުގައި ނިންމި ރާއްޖެ ކުޅެން ޖެހޭނީ ރޭންކިން މެޗުތަކުގައެވެ.
މި މުބާރާތުގެ ގްރޫޕް އޭއިން އެއްވަނަ ހޯދީ ތިން މެޗުންވެސް މޮޅުވި އިންޑިއާއެވެ. ދެވަނައަށް ދިޔައީ ދެ މެޗުން މޮޅުވި ނޭޕާލެވެ. އެއާއެކު އިންޑިއާ އާއި ނޭޕާލް ސެމީއަށް ދަތުރުކުރިއިރު، ތިންވަނައަށް ދިޔަ ކިރްގިސްތާނާއި ހަތަރުވަނައިގައި ނިންމި ބަންގްލަދޭޝް ވާދަކުރަން ޖެހޭނީ ރޭންކިން މެޗުތަކުގައެވެ.
ރޭންކިން ބުރުގައި ރާއްޖޭން މާދަމާ ކުޅޭނީ ކިރްގިސްތާނާވެ. އެ މެޗު ފަށާނީ ރާއްޖެ ގަޑިން 13:45 ގައެވެ. ރޭންކިން އަނެއް މެޗުގައި ބަންގްލަދޭޝް ކުޅޭނީ ލަަންކާއާއެވެ. ރޭންކިން ބުރުގައި ފަހުން އޮންނާނީ މޮޅުވާ ދެ ޓީމުގެ މެޗާއި، ބަލިވާ ދެ ޓީމުގެ މެޗެވެ.