ޔޫކްރެއިނަށް އަސްކަރީ ގޮތުން އެހީތެރިކަން ފޯރުކޮށްދޭން އެމެރިކާއާއި ނޭޓޯގެ އެހެން ބާރުތަކުން ކުރަމުންދާ މަސައްކަތްތަކުގެ ދަށުން އެ ޤައުމަށް "އެފް-16" މަރުކާގެ އަސްކަރީ މަތިންދާބޯޓު ފޮނުވުމަކީ ނޭޓޯއިން ހަނގުރާމައިގައި އަމަލީ ގޮތުން ބައިވެރިވުމުގެ ގޮތުގައި ބަލާނެ ކަމަށް ރަޝިޔާއިން ބުނެފިއެވެ. އެފް-16 މަރުކާގެ އަސްކަރީ މަތިންދާބޯޓަކީ އެމެރިކާއިން އުފައްދާ އެއްޗެކެވެ.
އެމެރިކާގެ ރައީސް ޖޯ ބައިޑަން ދާދި ފަހުން ވަނީ، ޔޫކްރެއިނަށް އެފް-16 މަރުކާގެ އަސްކަރީ މަތިންދާބޯޓު ފޯރުކޮށްދިނުމުގެ ހުއްދަ ދެއްވާފައެވެ. އެމެރިކާގެ ޤާނޫނު ބުނާ ގޮތުން، އެ ޤައުމުގައި އުފައްދާ ހަތިޔާރު ވިއްކާފައިވާ އެހެން ޤައުމަކަށް އެ ތަކެތި އެހެން ފަރާތަކަށް ވިއްކޭނީ ނުވަތަ ފޯރުކޮށްދެވޭނީ އެމެރިކާގެ ހުއްދައާ އެކުގައެވެ. ޔޫކްރެއިނަށް އެފް-16 މަތިންދާބޯޓުތައް ފޯރުކޮށްދިނުމުގެ ހުއްދަ ބައިޑަން ދެއްވާފައިވީ ނަމަވެސް، މަތިންދާބޯޓުތައް ފޯރުކޮށްދޭނީ ނޭޓޯގެ ޤައުމުތަކުންނެވެ.
ޔޫކްރެއިނަށް ޒަމާނީ އަސްކަރީ މަތިންދާބޯޓުތައް އެމެރިކާއާއި ނޭޓޯއިން ނިންމާފައި ވަނީ، ޔޫކްރެއިނަށް އަރައި އެ ޤައުމުގެ ސަރަޙައްދުތަކަށް އަތްގަދަކޮށްފައިވާ ރަޝިޔާގެ ސިފައިންނާ ދެކޮޅަށް ކުރަމުންދާ ހަނގުރާމައަށް އެހީތެރިކަން ފޯރުކޮށްދިނުމަށެވެ. މި ކަމާ ދެކޮޅަށް ވާހަކަފުޅު ދައްކަވަމުން ރަޝިޔާއިން އެމެރިކާއަށް ކަނޑައަޅާފައި ހުންނަވާ ސަފީރު އެނެޓޯލީ އެންޓޮނޮފް ވިދާޅުވީ އެފް-16 މަރުކާގެ މަތިންދާބޯޓުތައް ޔޫކްރެއިނަށް ފޮނުވުމަކީ ނޭޓޯއިން މި ހަނގުރާމައިގައި އަމަލީ ގޮތުން ބައިވެރިވުމުގެ ގޮތުން ބަލާނެ ކަމުގައެވެ.
"ޔޫކްރެއިނުގައި އެފް-16 މަރުކާގެ މަތިންދާބޯޓުތައް އޮޕަރޭޓްކޮށް ބަލަހައްޓާނެ ވަސީލަތްތަކެއް ނުހުންނާނެ. އެ ގާބިލުކަމެއް ނުހުންނާނެ. ޕައިލެޓުންނެއް ވެސް ނުތިބޭނެ. އަދި، ބޯޓުތައް މަރާމާތުކޮށް ބަލަހައްޓާނެ މެއިންޓެނެންސް ޓެކްނީޝަނުންނެއް ވެސް ނުތިބޭނެ. އެހެންވީމަ، ޔޫކްރެއިނުން ޖެހޭނީ ނޭޓޯގެ ޤައުމުތަކުގެ އަސްކަރީ މަރުކަޒުތައް ބޭނުން ކުރަން. އެއީ، ނޭޓޯއިން މި ހަނގުރާމައިގައި އަމަލީ ގޮތުން ބައިވެރިވުމުގެ ގޮތުގައި ބަލާނަން،" އެންޓޮނޮފް ވިދާޅުވިއެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާއިން ފެށި ހަނގުރާމައިގެ ފުރަތަމަ ދުވަހުން ފެށިގެން ވެސް ޒަމާނީ ހަތިޔާރު ހޯދަން ޔޫކްރެއިންގެ ރައީސް ވޮލޮޑޮމީރް ޒެލެންސްކީ ގެންދެވީ މަސައްކަތް ކުރައްވަމުންނެވެ. އަދި، ޒަމާނީ އަސްކަރީ މަތިންދާބޯޓަކީ ރަޝިޔާގެ އިސްތިއުމާރީ ސިފައިންގެ އަތްދަށުން ޔޫކްރެއިން މިނިވަން ކުރަން ކޮންމެހެން ބޭނުން ހަތިޔާރެއް ކަމުގައި އޭނާ ގެންދެވީ ވިދާޅުވަމުންނެވެ.
މި ގޮވައިލުމަށް ނޭޓޯގެ ޤައުމުތަކުން އިޖާބަދީ، ޒެލެންސްކީއަށް އުފާވެރި ޚަބަރު ދެއްވާފައި ވަނީ ޖަޕާނުގެ ހިރޮޝީމާގައި ކުރިއަށްދިޔަ އިޤުތިޞާދީ ގޮތުން އެންމެ ކުރިއަރާފައިވާ ގްރޫޕް އޮފް ސެވަން (ޖީ7)ގެ ޤައުމުތަކުގެ ބައްދަލުވުމުގައެވެ. ޔޫކްރެއިނަށް ޒަމާނީ އަސްކަރީ މަތިންދާބޯޓު ފޯރުކޮށްދޭން އިސްނަގާފައި ވަނީ އިނގިރޭސިވިލާތާއި ޑެންމާކުންނެވެ. އެފް-16 މަރުކާގެ މަތިންދާބޯޓު ބޭނުން ކުރުމުގެ ތަމްރީނު ޔޫކްރެއިންގެ ޕައިލެޓުންނަށް ފޯރުކޮށްދޭން ވެސް އެމެރިކާއިން ވަނީ ނިންމާފައެވެ.
ޔޫކްރެއިނަށް އެންމެ ފަހުގެ ޒަމާނީ އަސްކަރީ މަތިންދާބޯޓު ފޯރުކޮށްދޭން ނޭޓޯގެ ބައެއް ޤައުމުތަކުން ނިންމުމުން ރަޝިޔާއިން ވަނީ މި ކަމާ މެދު ކަންބޮޑުވުން ފާޅުކޮށް އިންޒާރު ދީފައެވެ. ރަޝިޔާގެ ޚާރިޖީ ވަޒީރުގެ ނައިބު އެލެގްޒެންޑަރ ގްރުޝްކޯ ވިދާޅުވީ އެފް-16 މަރުކާގެ މަތިންދާބޯޓު ޔޫކްރެއިނަށް ފޮނުވުމަކީ އެ ޤައުމުތަކަށް ހެދޭނެ އެންމެ ބޮޑު ގޯހަށް ވާނެ ކަމުގައެވެ.
ޔޫކްރެއިން އަސްކަރިއްޔާގައި ޒަމާނީ އަސްކަރީ މަތިންދާބޯޓުތަކެއް ނުހުރެއެވެ. އަދި، މިހާރު ބޭނުން ކުރަމުން ދަނީ ކުރީގެ ރޫސީ ވިލާތުގެ ޒަމާނުގައި އުފައްދާފައިވާ މަތިންދާބޯޓުތަކެވެ. ޕޮލެންޑާއި ސްލޮވާކިޔާއިން ދާދި ފަހުން ވަނީ ޔޫކްރެއިނަށް "މިގް-29" މަރުކާގެ 27 އަސްކަރީ މަތިންދާބޯޓު ފޯރުކޮށްދީފައެވެ. އެއީ ވެސް، ރޫސީ ވިލާތުގެ ޒަމާނުގައި އުފައްދާފައިވާ މަތިންދާބޯޓުތަކެކެވެ.