ސުޕަރ ސްޕެޝަލިސްޓު ޑޮކްޓަރުން އަތޮޅުތަކަށް ފޮނުއްވުމުގެ ޕްރޮގްރާމްގެ ދަށުން، މިމަހުގެ އަށާރަ ވަނަ ދުވަހު ލ.އަތޮޅުގައިބަލިމީހުން ބައްލަވަން ފައްޓަވާނެކަމަށް އާސަންދަ ކޮމްޕެނީން ހާމަކުރައްވައިފިއެވެ.
އެ ކުންފުނިން ހާމަކުރައްވާ ގޮތުގައި ސުޕަރ ސްޕެޝަލިސްޓު ޑޮކްޓަރުންނާއި ސްޕެޝަލިސްޓު ޑޮކްޓަރުން ލ.ހޮސްޕިޓަލުގައި މިމަހުގެ 18،19، ނަވާރަ މިި ދެ ދުވަހު ބައްލަވާނެއެވެ. މިފަހަރު އެ ސަރަޙައްދަށް ފޮނުވަނީ ފުއްޕާމެއާ ހަމުގެ ޚާއްސަ ބަލިތަކުގެ ޑޮކްޓަރުން ކަމަށް އާސަންދަ ކޮމްޕެނީއިން މަޢުލޫމާތުދެއްވާފައިވެއެވެ.
އާސަންދަ ކޮމްޕެނީގެ ޑެޕިއުޓީ މެނޭޖިންގ ޑިރެކްޓަރ ޢާއިޝަތު ޒަމީރާ ވިދާޅުވީ، ލ.އަތޮޅަށް ފޮނުވާ ޑޮކްޓަރުންގެ ޓީމުގައި ހިމެނެނީ ދިވެހި ޑޮކްޓަރުން ކަމަށް. ކުރިން މި ޕްރޮގްރާމްގައި ބައިިވެރިކޮށްފައިވަނީ ރާއްޖޭއިން ބޭރު ހޮސްޕިޓަލުތަކުގައި މަސައްކަތްކުރައްވާ ޑޮކްޓަރުން ކަމަށާއި އެހެންނަމަވެސް މި ޕްރޮގްރާމްގެ ތެރެއަށް ދިވެހި ޑޮކްޓަރުން މިހާރު ބައިވެރިކޮށްފައިވާ ކަމަށް އެނާ ވިދާޅުވިއެވެ.
ޒަމީރާ ވިދާޅުވީ، މި ޕްރޮގްރާމްގެ ދެވަނަ ބުރުގައި 6 އަތޮޅެއް ކަވަރ ކޮށްފައިވާ ކަމަށާއި އޭގެ ތެރޭގައި ހދ، ށ، ސ، ތ، ޏ،ބ، އަދި މާލެ ހިމެނެއެވެ. މި 6 އަތޮޅުން މިހާތަަނަށް 2034 މީހުން ޑޮކްޓަރަށް ދައްކާފައިވާއިރު، އަމާޒަކީ އަންނަ މަހުގެ ނިޔަލަށް މުޅި ރާއްޖެ ކަވަރކުުރުން ކަމަށެވެ.
ސްޕެޝަލިސްޓުންނާއި ސުޕަރ ސްޕެޝަލިސްޓުންގެ ޚިދުމަތް ރާއްޖޭގެ އެކިކަންކޮޅުތަކަށް ފޯރުކޮށްދިނުމުގެ ޕްރޮގްރާމްގެ ފުރަތަމަ ބުރު މިދިޔަ އަހަރު ވަނީ ނިމިފައެވެ.
މިޕްރޮގްރާމްގެ ފުރަތަމަ ބުރުގައި 83 ޑޮކްޓަރުން ރާއްޖެއަށް ޒިޔާރަތްކޮށް 6035 މީހުން ޑޮކްޓަރަށް ދައްކާފައިވެއެވެ.
ދިވެހިންގެ ތެރޭގައި މައިބަދައިގެ މައްސަލަތަކާއި، ކަރުންމަތީގެ ބަލިތަކަށް ފަރުވާ ލިބިގަންނަ ބަލިމީހުންގެ އަދަދު ގިނަ ކަމަށް މި ޕްރޮގްރާމްގެ ތެރެއިން ފާހަގަކުރެވިފައިވާ ކަމަށް އާސަންދަ ކޮމްޕެނީއިން ހާމަކުރެއެވެ.
ފުރަތަމަ ބުރުގައި، ތަފާތު 18 ދާއިރާއަކުން ޑޮކްޓަރުން ގެނެސްފައިވާއިރު، އޭގެތެރޭގައި ނާރުގެ ބަލިތަކާއި، ކިޑްނީގެ ބަލިތަކާއި، ކެންސަރާއި ލޭގެ ބަލިތަކުގެ އިތުރުން ހިތުގެ ބަލިތަކަށް ޚާއްޞަ ޑޮކްޓަރުން ހިމެނެއެވެ.