މިއަހަރުގެ ޖެނުއަރީމަސް ނިމުނުއިރު ރާއްޖޭގެ ރަސްމީ ރިޒަރވް 591.9 މިލިއަން ޔޫއެސް ޑޮލަރަށް، މައްޗަށް ޖެހިފައިވާ ކަމަށް މަރުކަޒީ ބޭންކުން ހާމަކޮށްފިއެވެ.
މަރުކަޒީ ބޭންކް، އެމްއެމްއޭއިން އާއްމުކޮށްފައިވާ ފެބްރުއަރީމަހުގެ އިޤްތިސާދީ ރިވިއު ރިޕޯޓްގައިވާ ގޮތުން ފާއިތުވި ޖެނުއަރީ މަސް ނިމުނު އިރު ރަސްމީ ރިޒަރވްގައި ހުރި ފައިސާގެ އަދަދަކީ މިދިޔަ އަހަރުގެ ޖެނުއަރީ މަހާ އަޅާބަލާ އިރު %4 ދަށް އަދަދެއް ނަމަވެސް މިދިޔަ ޑިސެމްބަރ މަހާއި އަޅާ ބަލާއިރު މިއީ %5 އިތުރު އަދަދެކެވެ.
އޭގެތެރެއިން ޔޫޒަބަލް ރިޒަރވް ނުވަތަ ބޭރު ފައިސާގެ އެކިއެކި މުޢާމަލާތްތަކަށް ވަގުތުން ވަގުތަށް އެމްއެމްއޭ އިން ބޭނުން ކުރުމަށް ހުންނަ ފައިސާގެ އަދަދުގެ ގޮތުގައި ހުރީ 197.2 މިލިއަން ޔޫއެސް ޑޮލަރެވެ.
ޔޫޒަބަލް ރިޒަރވްގެ ގޮތުގައި ހުރި އަދަދަކީ މަހުން މަހަށް ބަލާއިރު %2 އިތުރު އަދަދެކެވެ. މިއީ އަހަރުން އަހަރަށް ބަލާއިރު %32 އިތުރު އަދަދެއް ކަމަށްވެސް އެ ރިޕޯޓްގައިވެއެވެ.