ޔަހޫދީ އިސްރާޢީލުގެ އަސްކަރިއްޔާގައި ޣައްޒާގައި ހިންގަމުންދާ ލާއިންސާނީ އުދުވާންތަކުގައި ޝަހީދުކޮށްލާފައިވާ މީހުންގެ ޢަދަދު 31 އަށް އަރައިފިއެވެ. ޔަހޫދީ އިސްރާޢީލުގެ އަސްކަރީ މަތިންދާބޯޓުތަކުން ދަނީ މެދުކެނޑުމެއް ނެތި ޣައްޒާއަށް ވައިގެ ޙަމަލާ ދެމުންނެވެ. ޢާންމުން ދިރިއުޅޭ ޢިމާރާތްތަކާއި ގެދޮރަށް ބޮން އަޅަމުންނެވެ. މި ޙަމަލާތަކުގައި ކުށެއް ނެތް އެތަކެއް ބަޔެއްގެ ފުރާނަ ނަގައިލާފައިވާއިރު، މި ޙަމަލާތަކުގައި ޒަޚަމުކޮށްލާފައިވާ މީހުންގެ ޢަދަދު ވެސް ވަނީ 90އަށްވުރެ މައްޗަށް އުފުލިފައެވެ.
ޔަހޫދީ ޓެރެރިސްޓު އަސްކަރިއްޔާގެ ޙަމަލާތަކުގައި ޝަހީދުކޮށްލާފައިވާ މީހުންގެ ތެރޭގައި މައުޞޫމް ހަ ކުޑަކުދިން ހިމެނެއެވެ. ޝަހީދުކޮށްލާފައިވާ ކުށެއް ނެތް ކުޑަކުދިންގެ ތެރޭގައި އުމުރުން އެންމެ 10 އަހަރުގެ އަންހެން ކުއްޖަކު ވެސް ހިމެނެވެ. ޔަހޫދީ ޖައްބާރު އަސްކަރިއްޔާގެ ޙަމަލާތަކުގައި ފަލަސްޠީނުގެ ތިން އަންހެނުން ވެސް ވަނީ ޝަހީދުކޮށްލާފައެވެ.
މި ޙަމަލާތަކުގައި ފަލަސްޠީނުގެ މިނިވަން ކަމަށް ޖިހާދު ކުރަމުންދާ ޖަމާޢަތެއް ކަމުގައިވާ އިސްލާމިކް ޖިހާދު (ޕީ.އައި.ޖޭ)ގެ އިސް ދެ މެންބަރަކު ވެސް ވަނީ ޝަހީދުކޮށްލާފައެވެ. އެއީ، ޢަލީ ޣާލީއާއި އަޙްމަދު އަބޫ ދައްޤާއެވެ. އެ ދެ މީހުން ޝަހީދުކޮށްލުމުން އެ ކަމުގެ ބަދަލު ހިފުމުގެ ގޮތުން ޣައްޒާގައި ހަރަކާތްތެރިވާ މުޖާހިދުންގެ ޖަމާޢަތްތަކުން ވަނީ އިސްރާޢީލުގެ ރަށްތަކަށް އަމާޒުކޮށް ވަރުގަދަ ރޮކެޓް ޙަމަލާތަކެއް ދީފައެވެ. މި ޙަމަލާތަކުގައި އެކަކު މަރައިލާފައިވެއެވެ.
ޔަހޫދީ އިސްރާޢީލުގެ ޖައްބާރު ބޮޑުވަޒީރު ބެންޖަމިން ނަތަންޔާހޫ ބުނީ ފަލަސްޠީނުގެ މުސްލިމުންނާ ދެކޮޅަށް ހިންގަމުންދާ ލާއިންސާނީ އުދުވާންތައް ހުއްޓައިނުލައި ކުރިއަށް ގެންދާނެ ކަމުގައެވެ. އަދި، ޔަހޫދީންނާ ކުރިމަތިލާ އެންމެން ނައްތައިލާނެ ކަމުގައި ވެސް އޭނާ ބުންޏެވެ. ޣާލީއާއި ދައްޤާ ޝަހީދުކޮށްލުމާ އެކު، މޭ 9 ވަނަ ދުވަހު ޔަހޫދީ ޓެރެރިސްޓު އަސްކަރިއްޔާއިން ފެށި އުދުވާންތަކުގައި ޝަހީދުކޮށްލާފައިވާ އިސްލާމިކް ޖިހާދު ޖަމާޢަތުގެ އިސް މެންބަރުންގެ ޢަދަދު ވަނީ 5އަށް އަރާފައެވެ.
ފަލަސްޠީނުގެ މުސްލިމުންނާއި ޔަހޫދީ އިސްރާޢީލުގެ ޓެރެރިސްޓު އަސްކަރިއްޔާއާ ދެމެދު ހިނގަމުންދާ ހަމަނުޖެހުންތައް ހުއްޓުވަން މިޞްރުން ދަނީ މަސައްކަތް ކުރަމުންނެވެ. މި ކަމާ މެދު މަޝްވަރާ ކުރުމަށް ޕީ.އައި.ޖޭގެ އިސް އޮފިޝަލެއް ކަމުގައިވާ މުޙައްމަދު އަލް-ހިންދީ ވަނީ މިޞްރަށް ވަޑައިގަންނަވާފައެވެ. ޙަމަލާ ބަދަލުކުރުން ހުއްޓައިލާނީ އެ ޖަމާޢަތުގެ އިސްވެރިން ގަތުލުކުރަން ޔަހޫދީ އިސްރާޢީލުން ދެމުންދާ ޙަމަލާތައް ހުއްޓައިލުމުން ކަމަށް އަލް-ހިންދީ ވަނީ ބުނެފައެވެ.
"ޙަމަލާ ބަދަލުކުރުންތައް ހުއްޓުމަކަށް ގެންނަށް މިޞްރުން އިސްނަގައިގެން ކުރަމުންދާ މަސައްކަތްތައް އަދި ކާމިޔާބު ކުރެވިފައެއް ނުވޭ. ފަލަސްޠީނުގެ ދަޢުލަތާއި ރައްޔިތުންގެ ކުރިމަގު ފުނޑައިލަން އިސްރާޢީލުން ކުރަމުންދާ މަސައްކަތްތައް ހުއްޓުވަން ޖެހޭ،" މިޞްރުގެ ޚާރިޖީ ވަޒީރު ސާމިޙު ޝުކުރީ ވިދާޅުވިއެވެ. މި ކަމުގައި އެހީތެރިކަން ފޯރުކޮށްދިނުމަށް އޭނާ ވަނީ އުރުދުނާއި ފަރަންސޭސިވިލާތާއި ޖަރުމަނުވިލާތުގެ ޚާރިޖީ ވަޒީރުންގެ ކިބައިން ވެސް އެދިވަޑައިގަންނަވާފައެވެ.
ޔަހޫދީ އިސްރާޢީލުން ޣައްޒާގައި ދެމުންދާ ޙަމަލާތަކުގައި 90އަށްވުރެ ގިނަ މީހުން ޒަޚަމުކޮށްލާފައިވާއިރު، މި ޙަމަލާތަކުގައި ފަސް ޢިމާރާތެއް ސުންނާފަތި ކޮށްލައި، 300އަށްވުރެ ގިނަ އެޕާޓްމަންޓަށް ވަނީ ގެއްލުންދީފައެވެ. އަދި، ޣައްޒާއަށް އެތެރެވާން އޮންނަ ހުރިހާ މަގެއް ޔަހޫދީންގެ ޖައްބާރު ސިފައިން ވަނީ ބަންދުކޮށްފައެވެ. ޣައްޒާއަށް އިންސާނީ އެހީއާއި މުދާ އެތެރެކުރުމުގެ ދޮރުތައް ބަންދުކޮށްފައިވާއިރު، ޣައްޒާގެ މުސްލިމުންނަށް ޞިއްޙީ ފަރުވާ ހޯދޭނެ މަގުތައް ވެސް ޔަހޫދީ ޓެރެރިސްޓުން ވަނީ ބަންދުކޮށްފައެވެ.