ހައްދުންމަތީ ފޮނަދޫ ފެނުގެ ނިޒާމް ޤާއިމުކުރެއްވުމުގެ މަސައްކަތް ސިއެރާ މޯލްޑިވްސް ޕްރައިވެޓް ލިމިޓެޑާ ޙަވާލުކުރައްވައިފިއެވެ.
މިއަދު އެންވަޔަރަމަންޓް މިނިސްޓްރީގައި މިއަދު ބޭއްވެވި ރަސްމިއްޔާތެއްގައި ސޮއިކުރެވުނު މި އެއްބަސްވުމުގެ ދަށުން ފޮނަދޫގައި ޤާއިމުކުރައްވާ ފެނުގެ މިމަޝްރޫޢަށް ދައުލަތުގެ ބަޖެޓުން ސާޅީސް ހަތްމިލިޔަނަށްވުރެ ގިނަ ރުފިޔާ ޚަރަދުވާނެކަމަށް އެންވަޔަރަމެންޓް މިނިސްޓްރީން މަޢުލޫމާތުދެއްވައެވެ. އެއްއަހަރު ދުވަހުގެ ތެރޭގައި މަސައްކަތް ނިންމާގޮތަށް ކޮންޓްރެކްޓް ކުރެވެނު މިމަޝްރޫޢުގެ ދަށުން ފޮނަދޫގެ ފެނުގެ ނިޒާމް ފަރުމާކުރުމަށް ބޭނުންވާ ސަރވޭކުރުމާ އަދި ޑިޒައިނިންގެ މަސައްކަތްތައް ކުރެވޭނެކަމަށް އެމިނިސްޓްރީން މަޢުލޫމާތުދެއްވައެވެ.
މީގެ އިތުރުން އާރުއޯ ޕްލާންޓާއި، ފެންރައްކާކުރާ ތާނގީތައް ބެހެއްޓުމާއި، ފެނުގެ ވިއުގަ ޤާއިމުކޮށް ރަށުގެ ގެތަކަށް ފެންމީޓަރުތައް ގުޅައިދިނުމުގެ މަސައްކަތްތައްވެސް މި މަޝްރޫއުގެ ދަށުން ކުރެވޭނެކަމަށް އެންވަޔަރަންމެންޓް މިނިސްޓްރީން ވިދާޅުވިއެވެ. ފޮނަދޫ ފެނުގެ ނިޒާމް ޤާއިމުކުރުމުގެ އެއްބަސްވުމުގައި ސޮއިކުރެއްވުމުގެ ރަސްމިއްޔާތުގައި ވާހަކަފުޅު ދައްކަވަމުން އެންވަޔަރަމެންޓް މިނިސްޓަރ ޠާރިޤް އިބްރާހިމް ވަނީ ރަށު ކައުންސިލާއި، ރަށުގެ ރައްޔިތުންގެ ފަރާތުން، މިމަޝްރޫޢަށް ބޭނުންވާ އެއްބާރުލުން ދެއްވުމަށް އެދިވަޑައިގެންނެވިއެވެ.
މިއަދު ބޭސްވެވި ރަސްމިއްޔާތުގައި، ފޮނަދޫ ފެނުގެ ނިޒާމްޤާއިމުކުރުމުގެ މަސައްކަތްހަވާލުކުރުމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އެންވަޔަރަންމަންޓް މިނިސްޓަރ ޠާރިޤް އިބްރާހިމެވެ. ސިއެރާ ކުންފުނީގެ ފަރާތުން މިއެއްބަސްވުމުގައި ސޮއިކުރެއްވީ އެކުންފުނީގެ މެނޭޖިންގް ޑިރެކްޓަރ ނިމާލު ލޮކުގެ އެވެ.