ވިލާތުގެ އިއްތިހާދު (އީ.ޔޫ)ގެ މެންބަރު ކަން ހޯދުމަށް ޔޫކްރެއިނުން ކުރަމުންދާ މަސައްކަތްތައް ހަލުވި ކުރަން އެ އިއްތިހާދުގެ މެންބަރު ޤައުމުތަކުގެ އެއްބާރުލުމާއި އެހީތެރިކަން ބޭނުންވާ ކަމުގައި އެ ޤައުމުގެ ރައީސް ވޮލޮޑޮމީރް ޒެލެންސްކީ ވިދާޅުވެއްޖެއެވެ. އޭނާ މި ކަމަށް ގޮވައިލައްވާފައި ވަނީ، ޔޫކްރެއިނަށް މިހާރު ޒިޔާރަތް ކުރައްވަމުން ގެންދަވާ އީ.ޔޫ. ކޮމިޝަނުގެ ރައީސާ އުރްސުލާ ވޮން ޑެ ލަޔަންއާ އެކު ބޭއްވެވި ބައްދަލުވުމަކަށް ފަހު ނޫސްވެރިންނަށް މަޢުލޫމާތު ދެއްވަމުންނެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށުމާ ގުޅިގެން ޔޫކްރެއިނުން ވަނީ އީ.ޔޫއާ ގުޅުމަށް އެދި ހުށަހަޅާފައެވެ. އަދި، އެ އިއްތިހާދުން ވަނީ ޔޫކްރެއިނަކީ ކެނޑިޑޭޓެއްގެ ގޮތުގައި ކަނޑައަޅައި، އީ.ޔޫގެ މެންބަރަކަށް ވުމުގެ ކުރިން ފުރިހަމަކުރަން ޖެހޭ ކަންކަން ފުރިހަމަ ކުރުމަށް އެ ޤައުމަށް ފުރުޞަތު ދީފައެވެ.
ވޮން ޑެ ލަޔަންއާ އެކު ބޭއްވެވި ބައްދަލުވުމުގައި ޒެލެންސްކީ ވިދާޅުވީ، ޔޫކްރެއިނާއި އީ.ޔޫއާ ދެމެދު އޮތް ގުޅުމުގައި ހުރި ސިޔާސީ އޮޅުންބޮޅުންތައް ނައްތައިލަން ޖެހޭ ކަމުގައެވެ. އަދި، ޔޫކްރެއިނަށް އީ.ޔޫގެ މެންބަރު ކަން ދިނުމާ މެދު ކުރަމުންދާ މަޝްވަރާތައް ހަލުވިކޮށް، މި ކަމާ މެދު ރަނގަޅު ނިންމުމެއް ނިންމުމުގެ ވަގުތު ޖެހިފައިވާ ކަމުގައެވެ.
މި ފުރުޞަތުގައި ޒެލެންސްކީ ވަނީ ޔޫކްރެއިނަށް އިތުރު ހަތިޔާރާއި އަސްކަރީ އެހީތެރިކަން ފޯރުކޮށްދިނުމަށް ވެސް އީ.ޔޫއަށް ގޮވައިލައްވާފައެވެ. އޭނާ ވިދާޅުވީ، ޔޫކްރެއިނުގެ މިނިވަން ކަން ދިފާޢު ކުރަން ހަނގުރާމަ ކުރަމުންދާ އެ ޤައުމުގެ ސިފައިންނަށް މި ވަގުތު އެންމެ ބޮޑަށް ބޭނުން ޖެހިފައި ވަނީ އާޓިލަރީ ބަޑީއަށް ބޭނުންވާ ޝެލް ނުވަތަ ވަޒަން ކަމުގައެވެ. އަދި، އާޓިލަރީ ޝެލް އެ ޤައުމަށް ފޯރުކޮށްދިނުން އަވަސް ކުރުމަށް އޭނާ އެދިވަޑައިގެންނެވިއެވެ.
މި ކަމާ ގުޅޭ ގޮތުން ވޮންޑެ ލަޔަންއާ އެކު ފުޅާ ދާއިރާއެއްގައި މަޝްވަރާ ކުރައްވާފައިވާ ކަމުގައި ވެސް ޒެލެންސްކީ ވިދާޅުވިއެވެ. މީގެ އިތުރުން، ޔޫކްރެއިނުގައި ހައްދާ ގޮވާމުގެ ބާވަތްތައް އެކްސްޕޯޓު ކުރުމަށް ހުރި ހުރަސްތައް ނައްތައިލުމާ ގުޅޭ ގޮތުން ވެސް ދެ ބޭފުޅުން ވަނީ މަޝްވަރާ ކުރައްވާފައެވެ.
ޒެލެންސްކީ ވިދާޅުވީ، ޔޫކްރެއިނުގެ ގޮވާމުގެ ބާވަތްތައް އެކްސްޕޯޓު ކުރުމަށް އީ.ޔޫގެ ބައެއް މެންބަރު ޤައުމުތަކުން އަދިވެސް ދަތިކުރަމުންދާ ކަމުގައެވެ. އަދި، އެ ފަދަ އަމަލުތަކުގެ ފައިދާ ކުރަނީ އެ ޤައުމަށް އަރައި ހަނގުރާމަ ކުރަމުންދާ ރަޝިޔާއަށް ކަމުގައެވެ. އެ ފިޔަވަޅުތައް އެއްވެސް ހާލެއްގައި ބަލައި ނުގަނެވޭ ކަމުގައި ވެސް ޒެލެންސްކީ ވިދާޅުވިއެވެ.
ޔޫކްރެއިނަށް އަރައި ހަނގުރާމަ ކުރަމުންދާ ރަޝިޔާގެ ފައުޖުތަކުން ވަނީ އެ ޤައުމުގެ ފަސްބައިކުޅަ އެއްބައި ސަރަޙައްދަށް އަތްގަދަކޮށްފައެވެ. އޭގެ ތެރޭގައި އެ ޤައުމުގެ އިރުމަތީގައި އޮންނަ ދޮންބާސް އެކުލެވިގެންވާ ޑޮނެޓްސްކާއި ލުހާންސްކްގެ ބޮޑު ސަރަޙައްދެއް ހިމެނެއެވެ. އަދި، ދެކުނުގައިވާ ޒަޕޮރީޜިޔާ ވެސް އޮތީ ރަޝިޔާގެ އިސްތިޢުމާރީ ސިފައިންގެ އަތްދަށުގައެވެ. މީގެ އިތުރުން، އެންމެ ދެކުނުން އޮންނަ ކްރައިމިޔާއަކީ 2014 ވަނަ އަހަރު ރަޝިޔާއިން ވެރިވެގަނެފައިވާ ސަރަޙައްދެކެވެ.