އިންކަމް ޓެކްސް ބަޔާން ހުށައަޅަންޖެހޭ ފަރާތްތަކަށް އެހީތެރިވުމަށް މޯލްޑިވްސް އިންލެންޑް ރެވެނިއު އޮތޯރިޓީ، މީރާއިން ޚާއްސަ ޕްރޮގްރާމެއް ފަށަން ތައްޔާރުވެއްޖެއެވެ. މިޕްރޮގްރާމް މީރާއިން ކުރިއަށްގެންދަނީ 10 މިލިއަން ރުފިޔާ ނުވަތަ އެއަށްވުރެ މަދުން އާމްދަނީ ލިބިފައިވާ ފަރާތްތަކަށެވެ.
މީރާއިން ބުނީ އިންކަމް ޓެކްސް ބަޔާން ހުށައެޅުމަށް އެހީތެރިވެދޭ މި ޕްރޮގްރާމް ކުރިއަށްދާނީ މިމަހުގެ 7 އިން ޖޫން މަހުގެ 22 ވަނަ ދުވަހުގެ ނިޔަލަށްކަމަށެވެ. މި ޕްރޮގްރާމް ކުރިއަށްގެންދާނީ ފޯނު، އީމެއިލް އަދި އެނޫންވެސް އޮންލައިން ޕްލެޓްފޯމްތައް މެދުވެރިކޮށެވެ.
އިންކަމް ޓެކްސް ޤާނޫނުގެ ދަށުން ޓެކްސް ދައްކަންޖެހޭ އާމްދަނީގެ ތެރޭގައި ވިޔަފާރި އާމްދަނީ، އުޖޫރަ އަދި އެ ޤާނޫނުގެ 3 ވަނަ މާއްދާގައި ބަޔާންކޮށްފައިވާ އެންމެހައި ބާވަތްތަކުގެ އާމްދަނީ ހިމެނެއެވެ. މީރާއިން ބުނީ 2022 ވަނަ އަހަރު 10 މިލިއަން ރުފިޔާ ނުވަތަ އެއަށްވުރެ މަދުން އާމްދަނީ ލިބިފައިވާ ފަރާތްތަކުގެ ތެރެއިން ”ކޭސް ބޭސިސް“ އަށް ހިސާބުތައް ތައްޔާރުކުރުމަށް އިޚްތިޔާރުކޮށްފައިވާ ފަރާތްތަކަށް އިންކަމް ޓެކްސް ބަޔާން ހުށައެޅުމުގައި އެހީތެރިވެދޭނެކަމަށެވެ.
މިކަމުގައި އެހީތެރިކަން ބޭނުންވާ ފަރާތްތަކުން މީރާގެ ނަންބަރު 9821415 އަށް ވައިބަރ ކުރައްވައިގެން ނުވަތަ 1415 އަށް ގުޅުއްވައިގެން ނުވަތަ މީރާގެ ވެބްސައިޓްގެ ލައިވް ޗެޓް ފަންކްޝަން މެދުވެރިކޮށް ނަންނޯޓު ކުރުމުގެ ފުރުސަތު އެއިދާރާއިން މިހާރު ވަނީ ހުޅުވާލާފައެވެ.
ރާއްޖޭގައި ފަރުދުންގެ ޢާމްދަނީން ޓެކްސް ނަގަން ފެށީ 1 ޖެނުއަރީ 2020 ގައެވެ. އިންކަމް ޓެކްސް ނަގަނީ މަހެއްގެ މައްޗަށް 60،000 އަށްވުރެ މަތީ އާމްދަނީއެއް ލިބޭ ފަރާތްތަކުންނެވެ.
ދިވެހިރާއްޖޭގައި ވަޒަންވެރިވެފައިވާ ފަރާތްތަކުން، އެފަރާތްތަކަށް ދިވެހިރާއްޖެއާއި ދިވެހިރާއްޖެއިން ބޭރުން ލިބޭ އާމްދަނީން ޓެކްސް ދައްކަންޖެހޭނެއެވެ. ދިވެހިރާއްޖޭގައި ވަޒަންވެރިވެފައިނުވާ ފަރާތްތަކާއި ދިވެހިރާއްޖޭގައި ވަގުތީގޮތުން ވަޒަންވެރިވެފައިވާ ފަރާތްތަކުން ޓެކްސް ދައްކަންޖެހޭނީ އެފަރާތްތަކަށް ދިވެހިރާއްޖެއިން ލިބޭ އާމްދަނީންނެވެ.