ރަޝިޔާގެ ނިޒްނީ ނޮވޮގްރޮޑް ސަރަޙައްދުގައި ބޮމުގެ ޙަމަލާއެއްދީ ސަރުކާރަށް ތާއީދުކުރާ ލިޔުންތެރިއެއް އަދި ޓީވީ ޕްރެޒެންޓަރެއް ޒަޚަމްކޮށްލައިފިއެވެ. މި ޙާދިސާގައި ޒަޚަމްވެފައި ވަނީ ރައީސް ވްލަޑިމިޔަރ ޕުޓިންއަށް ތާއީދުކުރާ ލިޔުންތެރިއެއް ކަމުގައިވާ ޒަކްހަރް ޕްރިލެޕިނެވެ. ބޮމުގެ ޙަމަލާ އަމާޒުކޮށްފައި ވަނީ އޭނާ ދަތުރު ކުރަމުންދިޔަ ކާރަށެވެ. ނިޒްނީ ނޮވޮގްރޮޑަކީ ވެރިރަށް މޮސްކޯއާ 400 ކިލޯމީޓަރު އުތުރުގައި އޮންނަ ސަރަޙައްދެކެވެ.
މި ހާދިސާގައި ޕްރިލެޕިނާ އެކު ކާރުގައި އިން އިތުރު މީހަކު ވަނީ މަރުވެފައެވެ. މަރުވެފައި ވަނީ ޑްރައިވަރު ކަމަށް ރިޕޯޓުތައް ބުނެއެވެ. އޭނާއާ އެކު ކާރުގައި އެ ވަގުތު ތިބީ އޭނާގެ ޢާއިލާގެ މެންބަރުންތަކެއް ކަމަށާއި، މިއީ ޓެރެރިސްޓު ޙަމަލާއެއްގައި ގޮތުގައި ބަލައި، މި ޙަމަލާގެ ފުރިހަމަ ތަހުޤީޤެއް ހިންގަން ފަށާފައިވާ ކަމުގައި ރަޝިޔާގެ ދާޚިލީ ވުޒާރާއިން ބުނެއެވެ.
މި ޙަމަލާގައި 47 އަހަރުގެ ލިޔުންތެރިޔާގެ ފަޔަށް ބޮޑެތި ޒަޚަމުތަކެއް ލިބިފައިވާ ކަމުގައި ރަޝިޔާގެ ދަޢުލަތުގެ މީޑިޔާއިން ރިޕޯޓު ކުރެއެވެ. އޭނާ އަކީ ވާހަކަ ލިޔުންތެރިއެކެވެ. 2014 ވަނަ އަހަރު އޭނާ ވަނީ ޔޫކްރެއިން ސަރުކާރާ ދެކޮޅަށް ތެދުވި އެ ޤައުމުގެ ރައްޔިތުންނާ އެކު ހަނގުރާމައިގައި ބައިވެރިވެފައެވެ. ޗެޗްނިޔާ ހަނގުރާމައިގައި ވެސް ބައިވެރިވި ޕްރިލެޕިން އެތަކެއް ފަހަރެއް މަތިން ޔޫކްރެއިނަށް ދަތުރުކޮށްފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ޕްރިލެޕިނަކީ ޔޫކްރެއިނަށް ސިފައިން ފޮނުވައިގެން ޕުޓިން ފައްޓަވާފައިވާ ހަނގުރާމައަށް ވަރަށް ބޮޑަށް ތާއީދުކުރާ މީހެކެވެ. އޭނާއަށް އަމާޒުކޮށް ޙަމަލާއެއް ދީފައި މި ވަނީ، ރަޝިޔާގެ އެކި އަމާޒުތަކަށް ޑްރޯން ޙަމަލާތަކެއް ދެމުންދާ ދަނޑިވަޅެއްގައެވެ. ރަޝިޔާގެ ރިޔާސީ ގަނޑުވަރު ކްރެމްލިނަށް އަމާޒުކޮށް ވެސް ދާދިފަހުން ދެ ޑްރޯން ޙަމަލާއެއް ދީފައިވެއެވެ. އެ ޙަމަލާ ރާވާފައި ވަނީ އެމެރިކާއިން ކަމަށާއި، އެ އަމަލު ހިންގާފައި ވަނީ ޔޫކްރެއިނުގެ އަސްކަރިއްޔާއިން ކަމުގައި ރަޝިޔާއިން ތުހުމަތު ކުރެއެވެ. ނަމަވެސް، އެމެރިކާއާއި ޔޫކްރެއިނުން މި ތުހުމަތުތައް ދޮގު ކުރެއެވެ.
ޕްރެލިޕިނަށް ދީފައިވާ ޙަމަލާއަކީ، ޕުޓިންއަށް ތާޢީދުކުރާ މީހަކަށް އަމާޒުކޮށް ޙަމަލާއެއް ދީފައިވާ ފުރަތަމަ ފަހަރެއް ނޫނެވެ. މި އަހަރުގެ އޭޕްރިލް މަހުގެ ތެރޭގައި ކެފޭއެއްގެ ތެރޭގައި ބޮމެއް ގޮއްވައިލައިގެން ވްލަޑްލެން ޓަޓަރްސްކީ ކިޔާ ބްލޮގަރެއް ވަނީ މަރައިލާފައެވެ. އަދި، 2022 ވަނަ އަހަރުގެ އޮގަސްޓު މަހު ޕުޓިންގެ އަރިސް މީހެއްގެ ދަރިފުޅު ކަމުގައިވާ ދާރްޔާ ދޫގީނާ ވަނީ މަރައިލާފައެވެ. އެ ދެ ޙަމަލާގެ ފަހަތުގައި ވަނީ ޔޫކްރެއިން ކަމަށް ރަޝިޔާއިން ތުހުމަތު ކުރި ނަމަވެސް، ޔޫކްރެއިނުން ވަނީ އެ ތުހުމަތުތައް ދޮގުކޮށްފައެވެ.