މާލެއިން ފުރައިގެން ދ.މީދޫއަށް ދަތުރުކުރަނިކޮށް ރާޅެއް އަރައިގެން ދިޔަވާ ކަމުގެ މަޢުލޫމާތު ލިބުނު ލޯންޗް މިހާރި މަގޫދޫ ކައިރިން އަތޮޅަށް ވަންނަން ދަތުރުކުރަމުން އަންނަ ކަމަށް މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފްއިން ހާމަކުރައްވައިފިއެވެ.
"ވިޝަން އެކްސްޕްރެސް" ނަމަކަށް ކިޔާ މިލޯންޗް އަތޮޅަށް ވަންނަން ދަތުރުކުރަމުން އަންނަކަން ހާމަކުރެއްވިއިރު މިލޯންޗް ދިޔަވާކަމުގެ މަޢުލޫމާތު ލިބުމާ ގުޅިގެން އެލޯންޗް ހޯދުމުގެ މަސައްކަތް އެމްއެންޑީއެފްއިން އައީ ކުރަމުންނެވެ. މިލޯންޗުގައި 30 މީހުން ތިބި ކަމަށް އެމްއެންޑީއެފްއިން ހާމަކުރައްވައެވެ. މީގެ ތެރޭގައި އަންހެނުންނާއި ކުޑަކުދިން ހިމެނެއެވެ.
މިދޯންޏަށް ރާޅު އަރާފައިވަނީ ފ.ފީއަލީގެ 7 ނޯޓިކަލް މޭލު ބޭރުންނެވެ. މިލޯންޗުން ދަތުރުކުރި އެންމެންގެ ހާލުވެސް ރަނގަޅު ކަމަށާއި، ކޯސްޓްގާޑުގެ ހާބަރ ކްރާފްޓަށް ކުޑއިރުކޮޅެއްގެ ތެރޭގައި ލޯންޗާއި ކައިރި ކުރެވޭނެ ކަމަށް އެމްއެންޑީއެފްއިން ވިދާޅުވެއެވެ.
މިލޯންޗަށް އެހީތެރިވުމަށް ފ.ފިލިތެޔޮ ރިޒޯޓުން ދޯންޏަކާއި ފީއަލިންވެސް ދޯންޏަކާއި ލޯންޗެއް ފުރާފައިވާ ކަމަށް އެމްއެންޑީއެފްއިންވަނީ ހާމަކުރައްވާފައެވެ.