އިނގިރޭސިވިލާތުގެ ރަސްކަމުގެ ތަޚުތައް ރަސްގެފާނު ޗާލްސް ތިންވަނަ ރަސްމީކޮށް ވަޑުވައިފިއެވެ. ރަސްގެފާނު ޗާލްސްއަށް އިނގިރޭސިވިލާތާއި، ކޮމަންވެލްތުގެ 14 ސަރަޙައްދެއްގެ ރަސްކަން ލިބިވަޑައިގަތީ މަންމާފުޅު ރާނީ އެލިޒަބަތް ދެވަނަ އަވަހާރަވުމާ ގުޅިގެންނެވެ. ރާނީ އަވަހާރަވީ 2022 ވަނަ އަހަރުގެ ސެޕްޓެންބަރު މަހުގެ 8 ވަނަ ދުވަހުއެވެ. ރަސްގެފާނު ޗާލްސް އިނގިރޭސި ތަޚުތައް ވެޑުވުމުގެ ދަރުބާރު ބާއްވަފައި ވަނީ ވެސްޓްމިންސްޓަރ އެބީގައި ޝާހީ ޢިއްޒަތުގައި ބޭއްވި ކުލަގަދަ ދަރުބާރެއްގައެވެ.
މިއީ، ފާއިތުވި 1,000 އެއްހާ އަހަރު ވަންދެން ބޮޑު ބަދަލެއް ފެނިފައި ނުވާ ރަސްމިއްޔާތެކެވެ. އެ ދިގު ތާރީޚުގެ ތެރޭގައި ވެސްޓްމިންސްޓަރ އެބީގައި 39 ރަސްކަލުންނާއި ރާނީން ތަޚުތައް ވަޑުވާފައިވެއެވެ. އެ ތަނުގައި ތަޚުތައް ވަޑުވާފައި ނުވާ ރަސްކަލުންގެ ތެރޭގައި ރަސްގެފާނެ އެޑްވަރޑް ފަސްވަނައާއި ރަސްގެފާނު އެޑްވަރޑް އަށްވަނަ ހިމެނިވަޑައިގަންނަވައެވެ. ރަސްގެފާނު ޗާލްސަކީ ވެސްޓްމިންސްޓަރ އެބީގައި ރަސްކަމުގެ ތަޚުތައް ވެޑުވިވަޑައިގަންނަވާ 40 ވަނަ ރަސްގެފާނެވެ.
ރަސްގެފާނު ޗާލްސް ތަޚުތައް ވެޑުވުމުގެ ރަސްމިއްޔާތު ފެށުނީ ގަނޑުވަރު ބަކިންގްހެމް ޕެލެސްއިންނެވެ. ރަސްގެފާނު ޗާލްސްއާއި އަނބިކަނބަލުން ރާނީ ކޮންސޯޓް ކެމިލާ ބަކިންގްހެމް ޕެލެސްއިން ވެސްޓްމިންސްޓަރ އެބީއަށް ވަޑައިގަންނަވާ މަންޒަރު ބަލައިލުމަށް އެތަކެއް ހާސް ބަޔަކު ވަނީ ލަންޑަނުގެ މަގުތަކަށް އެއްވެފައެވެ. ދެ ގަޑިއިރެއްހާއިރަށް ދެމިގެންދިޔަ މި ރަސްމިއްޔާތު ލައިވްކޮށް ވަނީ ދުރަށް ދައްކާފައެވެ. ރަސްގެފާނާއި ރާނީ ކޮންސޯޓް ދަތުރު ކުރައްވާފައި ވަނީ ރަނުން ޖަރީކޮށްފައިވާ ގާޑިޔަލެއްގައެވެ. އެއީ، 1760 ވަނަ އަހަރު ފަރުމާކޮށްފައިވާ ޝާހީ ގާޑިޔަލެކެވެ.
ވެސްޓްމިންސްޓަރ އެބީގައި ރަސްގެފާނު ޗާލްސްގެ އިސްތަށިފުޅުގައި ރަސްކަމުގެ ތާޖު އަޅުވާފައި ވަނީ، މި ރަސްމިއްޔާތަށް ދަޢުވަތު އަރުވާފައިވާ ދުނިޔޭގެ އެކި ޤައުމުތަކުގެ އިސްވެރިންގެ ކުރިފުޅުމަތީގައެވެ. ރަސްގެފާނުގެ އިސްތަށިފުޅުގައި ރަސްކަމުގެ ތާޖު އަޅުއްވައި، އޭނާ ރަސްކަމުގެ ތަޚުތައް ރަސްމީކޮށް ވަޑުވާފައި ވަނީ އިނގިރޭސިވިލާތުގެ އެންގްލިކަލް ޗަރޗްގެ އިސް ފާދިރީ ނުވަތަ އާޗިބިޝޮޕް އޮފް ކެންޓަބަރީއެވެ. އަދި، ރަސްގެފާނު ޗާލްސް ވަނީ އިނގިރޭސިވިލާތުގެ އެންގްލިކަލް ޗަރޗްގެ ޤާނޫނު ހިފަހައްޓަން ޙުވާ ކުރައްވާފައެވެ.
ރަސްގެފާނު ޗާލްސްގެ އިސްތަށިފުޅުގައި އަޅުވާފައިވާ ޝާހީ ތާޖުކޮޅު އެންމެ ފުރަތަމަ ބޭނުންކޮށްފައި ވަނީ 1661 ވަނަ އަހަރުއެވެ. އެ ތާޖުކޮޅު އެންމެ ފުރަތަމަ އަޅުވާފައި ވަނީ ރަސްގެފާނު ޗާލްސް ދެވަނައިގެ އިސްތަށިފުޅުގައެވެ. ތާޖުކޮޅުގެ ނަމަކީ "ސެއިންޓް އެޑްވަރޑްސް ކްރައުނެވެ."
ގާތްގަނޑަކަށް 2.2 ކިލޯ މަރުދަނުގައި ހުންނަ މި ތާޖުކޮޅަކީ ރަނުން ފަރުމާކޮށް، ގިނަ ޢަދަދެއްގެ ޖަވާހިރުން ޒީނަތްތެރި ކޮށްފައިވާ ތާޖުކޮޅެކެވެ. ތާޖުކޮޅު ޖަރީކުރުމަށް ބޭނުންކޮށްފައިވާ ބައެއް ޖަވާހިރުގެ ތެރޭގައި ރޫބީ، އެމިތިސްޓް، ސަފަޔަރ، ގާނެޓް، ޓޮޕާޒް އަދި ޓޯމަލީން ހިމެނެއެވެ. ތާޖުކޮޅުގައި 2,868 އަލިމަސްވެއެވެ.
މީގެ އިތުރުން، ތާޖުކޮޅުގެ ކުރިމަތިފަރާތުން އެންމެ ތިރީގައި އޮންނަނީ "ކުލިނާން ދެވަނައިގެ" ނަން ދީފައިވާ 105 ކެރެޓުގެ އަލިމަހެކެވެ. އެއީ، ކުލިނާން އަލިމަހުން ކަނޑާފައިވާ އަލިމަހެކެވެ. ތާޖުކޮޅުގެ މެދުގައި އިންނަނީ "ބްލެކް ޕްރިންސް ރޫބީ"ގެ ނަން ދީފައިވާ ގަހަނާއެކެވެ. އަދި، އެންމެ މަތީގައި އިންނަނީ "ސެއިންޓް އެޑްވަރޑްސް ސަފަޔަރ"ގެ ނަން ދީފައިވާ ޖަވާހިރެކެވެ.
މި ދަރުބާރުގައި ރަސްގެފާނު ވަޑުވާފައި ވަނީ ކޮރޮނޭޝަން ޗެއަރ ނުވަތަ ޝާހީ ތަޚުތުގައެވެ. "ސްޓޯން އޮފް ޑެސްޓިނީ"އާއި "ސްޓޯން އޮފް ސްކޯނުން" ޖަރީކޮށްފައިވާ އެ ތަޚުތައް ދީފައިވާ ނަމަކީ ސެއިންޓް އެޑްވަރޑްސް ޗެއަރއެވެ. އެ ތަޚުތަކީ 1308 ވަނަ އަހަރުން ފެށިގެން ރަސްރަސްކަލުންނާއި ރަނިން ތަޚުތައް ވެޑުވުމަށް ބޭނުންކޮށްފައިވާ ތަޚުތެވެ. އެ ތަޚުތުގައި އެންމެ ފުރަތަމަ ވަޑުވާފައި ވަނީ ރަސްގެފާނު ހެންރީ ހަތަރުވަނައެވެ. އެއީ، 1399 ވަނަ އަހަރުއެވެ.