ސޫދާންގެ އަސްކަރިއްޔާއާއި ރެޕިޑް ސަޕޯޓް ފޯސަސް (އާރް.އެސް.އެފް)ގެ ފައުޖުތަކާ ދެމެދު ހިނގަމުންދާ ކުރިމަތިލުންތައް ވަރަށް އަވަހަކަށް ނިމުމަކަށް ގެންނާނެ ކަމުގައި އެ ޤައުމުގެ އަސްކަރިއްޔާއިން ހާމަކޮށްފިއެވެ. މި ކަން ހާމަކޮށްފައި ވަނީ އަސްކަރިއްޔާގެ އިސްވެރިޔާ ޢަބްދުލް ފައްތާޙް އަލް-ބުރުހާންގެ ޚާއްޞަ މަންބޫދު ދަފާالله އަލް-ޙައްޖެވެ.
އިތިއޯޕިޔާގެ ވެރިރަށް އަޑިސް އަބަބާގައި އޮތް ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އަލް-ޙައްޖު ވިދާޅުވީ އަސްކަރިއްޔާއާއި އާރް.އެސް.އެފްގެ ފައުޖުތަކާ ދެމެދު ހިނގަމުންދާ ކުރިމަތިލުންތައް ކުރިއަށް އޮތް މަދު ދުވަސްތަކުގެ ތެރޭގައި ނިމުމަކަށް ގެނައުމަށް އަސްކަރިއްޔާއިން މަސައްކަތް ކުރަމުންދާ ކަމުގައެވެ. އަސްކަރިއްޔާއާއި އާރް.އެސް.އެފްގެ ފައުޖުތަކާ ދެމެދު ޙަމަލާ ބަދަލުކުރަން ފަށާފައި ވަނީ އޭޕްރިލް 15 ވަނަ ދުވަހު އާރް.އެސް.އެފްގެ ފައުޖުތަކުން ވެރިރަށް ޚަރްތޫމަށް އަރައި ރިޔާސީ ގަނޑުވަރު ހިސާރުކުރަން މަސައްކަތް ފެށުމުންނެވެ.
ހަމަނުޖެހުންތަކާ ގުޅިގެން ސޫދާންގައި ތިބި އެކި ޤައުމުތަކުގެ ޚާރިޖީ ދާއިރާގެ މުވައްޒަފުންނާއި އެހެން ރައްޔިތުން ވަނީ އެ ޤައުމުން ބާލާފައެވެ. އަދި، މި ހަމަނުޖެހުންތަކަށް ނިމުމެއް ގެނައުމަށް އެކި ޤައުމުތަކުގެ ޚާރިޖީ ދާއިރާތައް ގުޅިގެން ދަނީ މަސައްކަތް ކުރަމުންނެވެ. މި ހަމަނުޖެހުންތަކުގައި މިހާތަނަށް 700 އަށް ވުރެ ގިނަ މީހުން ވަނީ މަރުވެފައެވެ.
ސޫދާންގައި ހިނގަމުންދާ ހަމަނުޖެހުންތައް ހުއްޓައިނުލައިފި ނަމަ އެ ޤައުމާ ދެކޮޅަށް ދަތިކުރުމުގެ ފިޔަވަޅުތައް އަޅާނެ ކަމުގެ އިންޒާރު އެމެރިކާއިން ވަނީ ދީފައެވެ. އެމެރިކާގެ ރައީސް ޖޯ ބައިޑަން ވަނީ، ސޫދާންގެ ސުލްޙަމަސަލަސް ކަން ގެއްލި، ސަލާމަތާއި ރައްކާތެރި ކަން ގެއްލޭ ނަމަ އެ ޤައުމާ ދެކޮޅަށް ދަތިކުރުމުގެ ފިޔަވަޅު އެޅުމުގެ ބާރު ލިއްބައިދޭ ޤަރާރެއްގައި ސޮއި ކުރައްވާފައެވެ.
"ސޫދާންގައި ހަމަނުޖެހުން ހިނގަމުން ދިޔުމަކީ ވަރަށް ބޮޑު ހިތާމައެއް. މިއީ، އެ ޤައުމުގެ ރައްޔިތުން ހައްޤުތަކާ ދެކޮޅަށް ހިންގަމުންދާ ހަމަނުޖެހުންތަކެއް ކަމުގައި ދެކެން. އަދި، ހަމަނުޖެހުންތައް ހުއްޓައިލާ، މަދަނީ ސަރުކާރެއް ގާއިމުކޮށް، ޑިމޮކުރަސީގެ ހަމަތަކުގެ މަތިން އަމަލުކުރުމަށް ސޫދާނަށް ގޮވައިލަން،" ބައިޑަން ވިދާޅުވިއެވެ.
ހަތް ދުވަހުގެ މުއްދަތަކަށް ޙަމަލާ ބަދަލުކުރުން މެދުކަނޑައިލުމަށް އަސްކަރިއްޔާއިން މޭ 4 ވަނަ ދުވަހު ވަނީ އެއްބަސްވެފައެވެ. ނަމަވެސް، އާރް.އެސް.އެފްގެ އިސްވެރިޔާ މުޙައްމަދު ޙަމްދާން ދަގަލޯގެ ފަރާތުން މި ކަމަށް އެއްބަސްވެފައެއް ނުވެއެވެ. ފަސް މިލިޔަން މީހުންގެ އާބާދީއެއް އޮންނަ ވެރިރަށް ޚަރްތޫމްގައި ހުންނަ ބޭރު ޤައުމުތަކުގެ އެމްބަސީތަކަށް އާރް.އެސް.އެފްގެ ފައުޖުތަކުން ޙަމަލާ ދެމުންދާ ކަމުގައި އަސްކަރިއްޔާއިން ބުނެއެވެ. ޙަމަލާތައް އަމާޒުކޮށްފައިވާ ބައެއް އެމްބަސީތަކުގެ ތެރޭގައި އިންޑިޔާގެ އެމްބަސީ ހިމެނޭ ކަމުގައި ވެސް ސޫދާނުގެ ޚާރިޖީ ވުޒާރާއިން ބުންޏެވެ.
ހަމަނުޖެހުންތަކުގައި މަރުވެފައިވާ މީހުންގެ ޢަދަދު 700 އިން މައްޗަށް އުފުލިފައިވާއިރު، އެ ޤައުމު ދޫކޮށް ގިނަ ޢަދަދެއްގެ ރެފިޔުޖީން ދަނީ އަވައްޓެރި ޤައުމުތަކަށް ހިޖުރަކުރަމުންނެވެ. އ.ދއިން ބުނީ، ސޫދާން ދޫކޮށް އަވައްޓެރި ޤައުމުތަކަށް ހިޖުރަކޮށްފައިވާ މީހުންގެ ޢަދަދު 450,000 އިން މައްޗަށް އަރާފައިވާ ކަމުގައެވެ. މި ޢަދަދު 860,000 އަށް އަރާނެ ކަމަށް އ.ދއިން އަންދާޒާ ކުރެއެވެ. އަދި، އެ މީހުންނަށް އިންސާނީ އެހީ ފޯރުކޮށްދޭން 445 މިލިޔަން އެމެރިކާ ޑޮލަރު ބޭނުންވާނެ ކަމުގައެވެ.