ކޮވިޑް-19ގެ ބަލިމަޑުކަމަކީ މުޅި ދުނިޔެއަށް ކުރިމަތިވެފައިވާ ޞިއްޙީ ކުއްލި ހާލަތެއް ކަމުގައި ކަނޑައަޅާފައި އޮތް އޮތުން ނިމުމަކަށް ގެންނަ ކަމުގައި ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ)އިން އިޢުލާނުކޮށް، ކުއްލި ހާލަތު އުވައިލައިފިއެވެ. ކޮވިޑަކީ މިހާރު މުޅި ދުނިޔެއަށް ކުރިމަތިވެފައި އޮތް ޞިއްޙީ ނުރައްކަލެއް ނޫން ކަމުގައި ޑަބްލިޔު.އެޗް.އޯއިން ކަނޑައަޅާފައިވާއިރު، އެ ބަލީގައި މަރުވެފައިވާ މީހުންގެ ޢަދަދު ވަނީ 6.9 މިލިޔަނަށް އަރާފައެވެ.
ޑަބްލިޔު.އެޗް.އޯއިން ޞިއްޙީ ކުއްލި ހާލަތު އުވައިލާފައި ވަނީ، އެ ޖަމުޢިއްޔާގެ އެމަރޖެންސީ ކޮމިޓީން މޭ 4 ވަނަ ދުވަހު ބޭއްވި ބައްދަލުވުމެއްގައި މަޝްވަރާކުރުމަށް ފަހުއެވެ. "ކޮވިޑް-19ގެ ސަބަބުން ދުނިޔެއަށް ކުރިމަތިވި ޞިއްޙީ ކުއްލި ހާލަތު ނިމުމަކަށް އައިސްފައިވާ ކަން އަޅުގަނޑު މި އިޢުލާނު ކުރަނީ ވަރަށް ބޮޑު އުންމީދަކާ އެކު،" ޑަބްލިޔު.އެޗް.އޯގެ ޑިރެކްޓަރ-ޖެނެރަލް ޓެޑްރޯސް އަދަނޮމް ގެބްރިއޭސޮސް ވިދާޅުވިއެވެ.
ނަމަވެސް، ކޮވިޑްގެ ސަބަބުން އޮތް ނުރައްކަލަށް ބަދަލެއް އައިސްފައި ނުވާ ކަމަށާއި، ރައްކާތެރިކަމުގެ ފިޔަވަޅު ދޫކޮށްލުމުގެ ފުރުޞަތު އޮތް ކަމަށް ގަބޫލުކޮށްގެން ނުވާނެ ކަމުގައި ގެބްރިއޭސޮސް ވިދާޅުވިއެވެ. ކޮވިޑާ ގުޅިގެން 6.9 މިލިޔަން މީހުންގެ ފުރާނަ ގެއްލިފައިވާއިރު، އެ ބަލިމަޑުކަމުގެ ސަބަބުން މުޅި ދުނިޔެ ފުރަބަންދު ކުރުމުގެ ސަބަބުން ދުނިޔޭގެ އިޤުތިޞާދަށާއި ހުރިހާ މުޖުތަމަޢަކަށް ބޮޑެތި ގެއްލުންތަކެއް ލިބުނެވެ.
ކޮވިޑްގެ ބަލިމަޑުކަމަކީ މުޅި ދުނިޔެއަށް ކުރިމަތިވެފައިވާ ޞިއްޙީ ކުއްލި ހާލަތެއް ކަމުގައި ޑަބްލިޔު.އެޗް.އޯއިން ކަނޑައަޅާފައި ވަނީ މީގެ ތިންވަރަކަށް އަހަރު ކުރިން، 2020 ވަނަ އަހަރުގެ ޖަނަވަރީ މަހުގެ 30 ވަނަ ދުވަހުއެވެ. އެ ނިންމުމަކީ، ކޮވިޑް ފެތުރުން ކޮންޓްރޯލް ކޮށް، ބަލިމަޑުކަމުން އަރައިގަތުމަށް ހުރިހާ ޤައުމަކުން ގުޅިގެން މަސައްކަތް ކުރުމުގެ ދޮރު ހުޅުވައިދިން މުހިންމު ނިންމުމެކެވެ. އެ މަސައްކަތުގެ ދަށުން ކޮވިޑް ފެތުރުން ކޮންޓްރޯލް ކުރުމަށް ވެކްސިންތައް ތައްޔާރުކުރުމުގެ ފުރުޞަތު ފަހިވެގެންދިޔަ ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.
"ދުނިޔެއިން ކޮވިޑް ނައްތައިލެވިފައިވާ ކަމަށް ގަބޫލުކޮށްގެން ނުވާނެ. ކޮވިޑްގެ ސަބަބުން ދުނިޔެއަށް އެކި ދާއިރާތަކުން ބޮޑެތި ބަދަލުތަކެއް ގެނުވައިފި. އެ ކަން އޮންނަން ވަނީ އެ ގޮތަށް. ކޮވިޑްގެ ކުރިން ކަންކަން އޮތް ގޮތަށް ބަދަލުވާން މަސައްކަތް ކުރުމުގެ މާނައަކީ ކޮވިޑްގެ ސަބަބުން އަޅުގަނޑުމެންނަށް ލިބުނު ފިލާވަޅުތަކުގެ އެއްވެސް ބޭނުމެއް ނުހިފެއޭ. އަދި ކުރިއަށް އޮތް ޖީލުތައް ހިމާޔަތް ކުރުމުގައި އަޅުގަނޑުމެން ފޭލުވާނެ،" ގެބްރިއޭސޮސް ވިދާޅުވިއެވެ.
ކޮވިޑް ބަލީގައި މަރުވާ މީހުންގެ ޢަދަދުތައް މިހާރު ދަނީ ދަށްވަމުންނެވެ. 2021 ވަނަ އަހަރުގެ ޖަނަވަރީ މަހުގެ ތެރޭގައި ކޮންމެ ހަފުތާއަކު 100,000 އަށްވުރެ ގިނަ މީހުން ވަނީ މި ބަލީގައި މަރުވެފައެވެ. ނަމަވެސް، މިހާރު އެ ޢަދަދު 3,500 އަށް ދަށް ކުރެވިފައިވާ ކަމުގައި ޑަބްލިޔު.އެޗް.އޯގެ ތަފާސްހިސާބުތަކުން ދައްކައެވެ. ކޮވިޑްގެ ފެށުން ދެނެގަތުމަށް ވެސް އެ ޖަމުޢިއްޔާއިން ދަނީ މަސައްކަތް ކުރަމުންނެވެ.
ކޮވިޑް-19 ބަލި އެންމެ ފުރަތަމަ ފެނިފައި ވަނީ ޗައިނާގެ ވޫހާންގައި ހުންނަ ދިރޭތަކެތި ވިއްކާ މާރުކޭޓަކުންނެވެ. ނަމަވެސް، ކުޑަ ދުވަސްކޮޅެއްގެ ތެރޭގައި ދުނިޔޭގެ އެކި ކަންކޮޅުތަކަށް މި ބަލި ހަލުވިކަމާ އެކު ފެތުރެން ފެށިއެވެ. އަދި، މުޅި ދުނިޔެ ހުއްޓުމަކަށް ގެނުވިއެވެ. މި ބައްޔާ އެކު މުޅި ދުނިޔެއަށް ކުރިމަތިވި އިޤުތިޞާދީ ވަޅުގަނޑުން އަރައިގަތުމަށް ޤައުމުތަކުން އަދިވެސް ދަނީ މަސައްކަތް ކުރަމުންނެވެ.