2022 ވަނަ އަަހަރު މަތީ ޘާނަވީ އިމްތިޙާނު ފުރިހަމަކުރި ދަރިވަރުންގެ ތެރެއިން "ރައީސުލްޖުމްހޫރިއްޔާ ދެއްވާ ޚާއްޞަ ސްކޮލަރޝިޕް"އަށް ޝަރުތު ހަމަވާ ދަރިވަރުން، ސްކޮލަރޝިޕަށް ކުރިމަތިލުމުގެ ފުރުޞަތު ހުޅުއްވައިލައްވައިފިއެވެ.
މި ސްކޮލަރޝިޕް ދެއްވުމުގެ މަޤްޞަދަކީ، މަތީ ޘާނަވީ މަރުޙަލާގައި ކިޔަވާ ދަރިވަރުންނަށް ކިޔެވުމަށް ބާރުއެޅުއްވުމާއި، ރަނގަޅު ނަތީޖާ ހޯދުމަށް ހިތްވަރުދެއްވުމެވެ. މި ފުރުޞަތުގައި ލިބެނީ ފުރަތަމަ ޑިގްރީ ފުރިހަމަކުރަން ނުވަތަ ފުރަތަމަ ޑިގްރީއަށްވުރެ ދަށުގެ ސަނަދަކަށް ކިޔެވުމަށެވެ.
މި ސްކޮލަރޝިޕްގައި ދަރިވަރު ބޭނުންވާ ކޮންމެ ދާއިރާއަކުން ކިޔެވުމުގެ ފުރުޞަތު ލިބޭނެއެވެ. އަދި ބޭނުންވާ ޤައުމެއްގައި ކޯސް ފުރިހަަކުރެވޭނެއެވެ.
ސްކޮލަރޝިޕްގެ ޝަރުތުތަކުގެ ތެރޭގައި ދިވެހިރާއްޖޭގެ ސްކޫލް މަދަރުސާއެއްގައި، 2022ވަނަ އަހަރު މަތީ ޘާނަވީ އިމްތިޙާން ނުވަތަ ޝަހާދާ ސާނަވީ އިމްތިޙާން ހެދި ދިވެހި ދަރިވަރަކަށް ވުން ހިމެނެއެވެ. އަދި އިސްލާމާއި ދިވެހި ހިމެނޭގޮތަށް 5 މާއްދާއިން އޭ.ސްޓަރ ޙާޞިލްކޮށްފައިވުން ނުވަތަ ޝަހާދާ ސާނަވީ އިމްތިޙާނުގައި ބައިވެރިވި ހުރިހާ މާއްދާއަކުން އޭ.ސްޓަރ ޙާ ޞިލްކޮށްފައިވުން ހިމެނެއެވެ. ނުވަތަ ޖީސީއީ އޯލެވެލް / އައިޖީސީއެސްސީ ނުވަތަ އެއާ އެއް ފެންވަރުގެ އިމްތިޙާނަކުން އިނގިރޭސިން "ސީ" އިން ފެށިގެން މަތީ ގްރޭޑް ލިބިފައި އޮތުން ހިމެނެއެވެ.
މި ސްކޮލަރޝިޕްގެ އުޞޫލުގައި އޮންނަ ގޮތުން، ކުރިއަށް އޮތް 18 މަސް ދުވަހުގެ ތެރޭގައި މި ފުރުޞަތުގެ ބޭނުން ހިފައި ކިޔަވަން ފަށަން ވާނެއެވެ. ސްކޮލަރޝިޕަށް ކުރިމަތިލާ ދަރިވަރުން myedu.egov.mv ޕޯޓަލް މެދުވެރިކޮށް ލިޔުންތައް ހުށައެޅޭނެއެވެ.
2022 ވަނަ އަހަރު ޖުމްލަ 2849 ދަރިވަރުން ވަނީ އޭލެވެލް އިމްތިޙާނުގައި ބައިވެރިވެފައެވެ. މީގެތެރެއިން 2785 ދަރިވަރުންނަކީ އެޑެކްސެލް އޭލެވެލްގެ މާއްދާތަކުން އިމްތިޙާނުގައި ހެދި ދަރިވަރުންނެވެ. އަދި 1299 ދަރިވަރުންނަކީ އެޗްއެސްސީ އިމްތިޙާނު ހެދި ދަރިވަރުންނެވެ.