ސޫރިޔާގެ ދާޚިލީ ހަނގުރާމައިގައި ރައީސް ބައްޝާރު ހާފިޛް އަލް-އަސަދުގެ ސަރުކާރުން ހޯދާފައިވާ ކާމިޔާބީތައް ފާހަގަކުރައްވައި، އީރާނުގެ ރައީސް އިބްރާހީމް ރައީސީ އަސަދަށް މަރުޙަބާ ދަންނަވައިފިއެވެ. 12 އަހަރަށް ދެމިގެންދިޔަ ސޫރިޔާގެ ދާޚިލީ ހަނގުރާމައިގައި އަސަދުގެ ސަރުކާރުން ކާމިޔާބީ ހޯދާފައިވާ ކަމަށް ވިދާޅުވެ ރައީސީ ވާހަކަފުޅު ދައްކަވާފައި ވަނީ، ދިމިޝްޤަށް ކުރެއްވި ތާރީޚީ ދަތުރުފުޅެއްގައި އަސަދާ ބައްދަލުކުރައްވައި ވާހަކަފުޅު ދައްކަވަމުންނެވެ.
2011 ވަނަ އަހަރު ސޫރިޔާގައި ފެށި ދާޚިލީ ހަނގުރާމައާ ގުޅިގެން ހުޅަނގުގެ ބާރުތަކުން ވަނީ އެތަކެއް ގޮތަކުން އަސަދުގެ ސަރުކާރާ ދެކޮޅަށް ދަތިކުރުމުގެ ފިޔަވަޅުތައް އަޅާފައެވެ. އެ ކަމުން އަރައިގަތުމަށް އީރާނުން ވަނީ ސޫރިޔާއަށް ސިޔާސީ ގޮތުންނާއި އިޤުތިޞާދީ އަދި އަސްކަރީ ދާއިރާއިން ބޮޑެތި އެހީތެރިކަމެއް ފޯރުކޮށްދީފައެވެ.
އަދި، ހަތިޔާރު އެޅި ޖަމާޢަތްތަކުން އަތްގަދަކޮށްފައިވާ ސަރަޙައްދުތައް އަލުން ހިފުމަށް އަސްކަރީ ގޮތުން އެހީތެރިކަން ފޯރުކޮށްދީ، އީރާނުން ވަނީ އަސަދުގެ ސަރުކާރާ އެކު ގާތް ގުޅުމެއް ގާއިމުކޮށްފައެވެ. ހަނގުރާމައަށް ފަހު ޤައުމު އަލުން އާރާސްތުކުރުމުގެ މަސައްކަތުގައި ވެސް އީރާނުގެ ބައިވެރިން އޮންނާނެ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ގަބޫލުކުރެއެވެ.
"ސޫރިޔާއާ ދެކޮޅަށް އެތަކެއް ގޮތަކުން ދަތިކުރުމުގެ ފިޔަވަޅުތައް އަޅާފައިވީ ނަމަވެސް، އަސަދުގެ ސަރުކާރާއި ރައްޔިތުން ގުޅިގެން ވަނީ އެ ދަތި ހާލުން އަރައިގަނެފައި. ކާމިޔާބީ ހޯދާފައި،" އަސަދާ ވާހަކަފުޅު ދައްކަވަމުން ރައީސީ ވިދާޅުވިއެވެ. އަސަދު ވިދާޅުވީ، މެދުއިރުމައްޗަށް ސިޔާސީ ހަލަބޮލިކަމެއް ވެރިވެފައިވާ މި ދަނޑިވަޅުގައި ވެސް ސޫރިޔާއާއި އީރާނާ ދެމެދު ގާތް ގުޅުމެއް ބާއްވަމުންދާ ކަމުގައެވެ.
ރައީސީ ސޫރިޔާއަށް ކުރެއްވި މި ދަތުރުފުޅަކީ، ސޫރިޔާގެ ދާޚިލީ ހަނގުރާމަ ފެށި ފަހުން އީރާނުގެ ރައީސަކު އެ ޤައުމަށް ވަޑައިގެންނެވި ފުރަތަމަ ފަހަރެވެ. އޭނާ ސޫރިޔާއަށް ވަޑައިގަންނަވާފައި މި ވަނީ، ހަނގުރާމައާ ގުޅިގެން ސޫރިޔާއާ ގުޅުން ކަނޑައިލާފައިވާ ޤައުމުތަކުން އެ ގުޅުންތައް އަލުން އިޔާދަކުރަން މަސައްކަތް ކުރަމުންދާ ދަނޑިވަޅެއްގައެވެ. މެދުއިރުމަތީގެ ދެ ބާރުގެ ގޮތުގައި ބެލެވޭ ސަޢޫދީ ޢަރަބިއްޔާއާއި އީރާނުން މާރިޗު މަހުގެ ތެރޭގައި ސިޔާސީ ގުޅުން އަލުން ގާއިމުކުރުމާ އެކު، ޢަރަބި ދުނިޔޭގެ ޤައުމުތަކާއި ސޫރިޔާއާ ދެމެދު ކެނޑިފައި އޮތް ގުޅުން ބަދަހިކުރަން އެ ޤައުމުތަކުން ވެސް ވަނީ މަސައްކަތް ފަށާފައެވެ.
ރައީސީ ސޫރިޔާއަށް ކުރެއްވި މި ދަތުރުފުޅުގައި ދެ ޤައުމުގެ ދެމެދުގައި އިޤުތިޞާދީ، ސިޔާސީ އަދި ސަލާމަތީ ދާއިރާއިން ގުޅުން ބަދަހިކުރުމާ ގުޅޭ ގޮތުން މުހިންމު މަޝްވަރާތަކެއް ކުރެއްވިއެވެ. އަދި، ބައެއް ދާއިރާތަކުން ގުޅުން ބަދަހިކުރުމަށް ދެ ޤައުމުގެ ދެމެދުގައި މުހިންމު އެއްބަސްވުންތަކެއްގައި ސޮއިކޮށްފައިވެއެވެ. ރައީސީއާ އެކު އީރާނަށް ވަޑައިގެންނެވި ވަފުދުގައި އީރާނުގެ ދިފާޢީ ވަޒީރާއި، ޚާރިޖީ ވަޒީރާއި، ތެލާ ބެހޭ ވަޒީރާއި، މަގު ހެދުމާއި ޢުމްރާނީ ތަރައްޤީއާ ބެހޭ ވަޒީރު ހިމެނި ވަޑައިގަންނަވައެވެ.
އީރާނުގެ ރައީސަކު އެންމެ ފަހުން ސޫރިޔާއަށް ވަޑައިގަންނަވާފައި ވަނީ އެ ޤައުމުގެ ދާޚިލީ ހަނގުރާމަ ފެށުމުގެ ކުރިން 2010 ވަނަ އަހަރުގެ ސެޕްޓެންބަރު މަހުއެވެ. އެއީ، އެ ޤައުމުގެ ކުރީގެ ރައީސް މަޙްމޫދު އަޙްމަދީނެޖާދެވެ. ހަނގުރާމަ ފެށި ފަހުން އަސަދު ދެ ފަހަރެއްގެ މަތިން އީރާނަށް ވަޑައިގެންނެވިއެވެ. އެންމެ ފަހުން ދަތުރުފުޅު ކުރައްވާފައި ވަނީ 2022 ވަނަ އަހަރުގެ މޭ މަހުއެވެ.