ހަތިޔާރު އުފައްދާ މިންވަރު އިތުރުކުރަން ވިލާތުގެ އިއްތިހާދު (އީ.ޔޫ)އިން ހުށަހަޅައިފިއެވެ. އީ.ޔޫއިން ހަތިޔާރު އުފައްދާ މިންވަރު އިތުރުކުރަން ހުށަހަޅާފައި މި ވަނީ، ރަޝިޔާއިން ޔޫކްރެއިނުގައި ކުރަމުންދާ ހަނގުރާމައާ ގުޅިގެން އެ އިއްތިހާދުގެ ޤައުމުތަކުން ޔޫކްރެއިނަށް ހަތިޔާރު ފޯރުކޮށްދެމުން ދިޔުމުގެ ސަބަބުން އެ ޤައުމުތަކުގެ ހަތިޔާރު ސްޓޮކް މަދުވާން ފެށާފައިވާ ދަނޑިވަޅެއްގައެވެ.
ވިލާތުގެ ކޮމިޝަނުން ވަނީ، ހަތިޔާރު އުފެއްދުން އިތުރު ކުރުމަށް އީ.ޔޫގެ ބަޖެޓުން 550 މިލިޔަން އެމެރިކާ ޑޮލަރު ހޭދަކުރަން ހުށަހަޅާފައެވެ. ކުރިއަށް އޮތް މަހެއްހާ ދުވަހުގެ ތެރޭގައި މި ހުށަހެޅުން ފާސްކޮށް، ހަތިޔާރު އުފެއްދުން އިތުރުކުރަން ފަށާނެ ކަމަށް ބެލެވޭ ކަމުގައި އީ.ޔޫގެ އެކްސްޓަރނަލް މާރކެޓް ކޮމިޝަނަރ ތިއެރީ ބްރެޓަން ވިދާޅުވިއެވެ.
ރަޝިޔާއިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރު ފެބުރުވަރީ މަހުގެ 24 ވަނަ ދުވަހުއެވެ. މި ހަނގުރާމައިގައި އީ.ޔޫއާއި ނޭޓޯގެ މެންބަރު ޤައުމުތަކުން ދަނީ ޔޫކްރެއިނަށް އަސްކަރީ ގޮތުން އެހީތެރިކަން ފޯރުކޮށްދެމުންނެވެ. އަދި، ގިނަ ޢަދަދެއްގެ ހަތިޔާރު ފޯރުކޮށްދެމުންނެވެ.
ކުރިއަށް އޮތް 12 މަސްދުވަހުގެ ތެރޭގައި ޔޫކްރެއިނަށް އެއް މިލިޔަން އާޓިލަރީ ޝެލް ނުވަތަ އާޓިލަރީ ބަޑިއަށް ބޭނުންވާ ވަޒަން ފޯރުކޮށްދޭން އީ.ޔޫއިން ވަނީ ނިންމާފައެވެ. އެ ތަކެތީގެ އަގު 2.2 މިލިޔަން އެމެރިކާ ޑޮލަރަށް އަރާނެއެވެ.
ޔޫކްރެއިންގެ މިނިވަންކަމާއި ސިޔާދަތު ހިމާޔަތްކޮށް، ޔޫކްރެއިން ރައްޔިތުންގެ ދިފާޢުގައި އެ ޤައުމުގެ ސިފައިން ކުރަމުންދާ ހަނގުރާމައަށް އަސްކަރީ ގޮތުން އެހީތެރިކަން ފޯރުކޮށްދިނުމަކީ ވަރަށް މުހިންމު ކަމެއް ކަމުގައި އީ.ޔޫ. ކޮނިޝަނުގެ ރައީސާ އުރްސުލާ ވޮން ޑެ ލަޔަން ވިދާޅުވިއެވެ. އަދި، ރަޝިޔާގެ އަތްދަށުން ޔޫކްރެއިން ސަލާމަތް ކުރުމަކީ އީ.ޔޫގެ މެންބަރު ޤައުމުތަކުގެ ސަލާމަތާއި ރައްކާތެރިކަން ކަށަވަރު ކުރުމަށް ވެސް ކޮންމެހެން ބޭނުން ފިޔަވަޅެއްގެ ގޮތުގައި އޭނާ ދެކެވަޑައިގަންނަވައެވެ.
ޔޫކްރެއިނުން ބައެއް ވައްތަރުތަކުގެ ހަތިޔާރަށް ބޭނުންވާ ޝެލް ނުވަތަ ވަޒަން މަދުވަމުންދާ ކަމުގައި އެ ޤައުމުން ވަނީ ބުނެފައެވެ. މި ކަމަށް ހައްލެއް ހޯދައިދިނުމަށް އީ.ޔޫއިން ދަނީ މަސައްކަތް ކުރަމުންނެވެ. މި ގޮތުން، އެ ޤައުމުތަކުގެ ސްޓޮކުން ޔޫކްރެއިނަށް ބޭނުންވާ ހަތިޔާރާއި ވަޒަން ފޯރުކޮށްދެމުންދާއިރު، އެ ކަމަށް އީ.ޔޫގެ ޔޫރަޕިއަން ޕީސް ފެސިލިޓީ (އީ.ޕީ.އެފް) ފަންޑުން 1.1 ބިލިޔަން އެމެރިކާ ޑޮލަރު ޚަރަދުކުރަން ވަނީ ފާސްކޮށްފައެވެ.
މީގެ އިތުރުން، 1.1 ބިލިޔަން ޑޮލަރުގެ ހަތިޔާރު އެހެން ޤައުމުތަކުން ގަނެގެން ޔޫކްރެއިނަށް ފޯރުކޮށްދޭން ވެސް އީ.ޔޫއިން ދަނީ މަސައްކަތް ކުރަމުންނެވެ. އެ ކަމަށް ވެސް ޚަރަދު ކުރަނީ އީ.ޕީ.އެފް. ފަންޑުންނެވެ. ތިންވަނަ ގޮތަކީ، އީ.ޔޫގެ ޤައުމުތަކުން ހަތިޔާރު އުފައްދާ މިންވަރު އިތުރު ކުރުމެވެ.
އީ.ޔޫގެ މެންބަރު ޤައުމުތަކުގައިވާ ހަތިޔާރު އުފައްދާ ކާރުޚާނާތަކުގެ މަސައްކަތްތައް ހަލުވިކުރެވޭނެ ގޮތްތައް ބެލުމަށް ބްރެޓަން ވަނީ ބައެއް ޤައުމުތަކަށް ދަތުރުފުޅެއް ފައްޓަވާފައެވެ. ބޭނުމަކީ، ދޭއް ނުވަތަ ތިން އަހަރުން ހަތިޔާރު އުފެއްދޭ މިންވަރު ހަލުވިކޮށް، އެ މިންވަރަށް 12 މަސްދުވަހުގެ ތެރޭގައި ހަތިޔާރާއި ވަޒަން އުފައްދަން ފެށުމެވެ.