ރަޝިޔާގެ ރައީސް ވްލަޑިމިޔަރ ޕުޓިން އަވަހާރަކޮށްލަން ޔޫކްރެއިނުން މޮސްކޯގައި ހުންނަ ރިޔާސީ ގަނޑުވަރު ކްރެމްލިނަށް ޑްރޯން ޙަމަލާތަކެއް ދީފައިވާ ކަމުގައި ރަޝިޔާއިން ތުހުމަތުކޮށްފިއެވެ. ކްރެމްލިނުން ބުނީ ޕުޓިން އަވަހާރަކޮށްލަން ދިން ޙަމަލާގައި ޔޫކްރެއިނުން ބޭނުންކުރި ދެ ޑްރޯން ދިފާޢުކޮށް ވައްޓައިލާފައިވާ ކަމުގައެވެ. މިއީ، ރަޝިޔާ ސިފައިން ޔޫކްރެއިނަށް ފޮނުވައިގެން ޕުޓިން ފައްޓަވާފައިވާ ހަނގުރާމައަށް 14 މަސް ފުރިފައިވާއިރު، ޔޫކްރެއިނާ ދެކޮޅަށް ރަޝިޔާއިން ކޮށްފައިވާ މި ފަދަ އެންމެ ބޮޑު ތުހުމަތެވެ.
ނަމަވެސް، ޔޫކްރެއިނުން ވަނީ ރަޝިޔާގެ ތުހުމަތުތައް ދޮގުކޮށްފައެވެ. ޔޫކްރެއިނުގެ ރައީސް ވޮލޮޑޮމީރް ޒެލެންސްކީގެ އިސް މުޝީރެއް ވިދާޅުވީ، ޕުޓިން އަވަހާރަކޮށްލަން ޔޫކްރެއިނުން އެއްވެސް އޮޕަރޭޝަނެއް ހިންގާފައި ނުވާ ކަމަށާއި، ކްރެމްލިނަށް ދިން ޑްރޯން ޙަމަލާގައި ޔޫކްރެއިނުގެ އެއްވެސް ބައިވެރިވުމެއް ނެތް ކަމުގައެވެ.
ކްރެމްލިނަށް ޙަމަލާދޭން ފޮނުވި ދެ ޑްރޯން ވެސް އަމާޒުކޮށްފައި ވަނީ ކްރެމްލިންގައި ޕުޓިން ދިރިއުޅުއްވާ ގެކޮޅަށް ކަމުގައި ރަޝިޔާއިން ބުނެއެވެ. އަދި، ރަޝިޔާގެ އަސްކަރިއްޔާއިން އިލެކްޓްރޯނިކް ދިފާޢީ ނިޒާމު ބޭނުންކޮށްގެން ދެ ޑްރޯން ވެސް ވައްޓައިލާފައިވާ ކަމުގައި ކްރެމްލިނުން ބުނެއެވެ. އަދި، މިއީ ޓެރެރިސްޓު ޙަމަލާއެއްގެ ގޮތުގައި ވެސް ރަޝިޔާއިން ސިފަކުރެއެވެ.
ޕުޓިން އަވަހާރަކޮށްލަން ދިން މި ޙަމަލާއާ ގުޅިގެން ބަދަލުގައި އަމަލުކުރުމުގެ ހައްޤު ރަޝިޔާއަށް ލިބިފައިވާ ކަމުގައި ވެސް ކްރެމްލިނުން ނެރުނު ބަޔާނެއްގައި ބުނެފައިވެއެވެ. މާނައަކީ، މި ޙަމަލާގެ ބަދަލުގައި ޔޫކްރެއިނަށް އަރައި ރަޝިޔާއިން ކުރަމުންދާ ހަނގުރާމަ އިތުރަށް ފުޅާކުރުން ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
ރަޝިޔާއިން ޢާންމުކޮށްފައިވާ މި ޙަމަލާގެ ވީޑިޔޯއިން ފެންނަނީ އުދުހިފައިދާ އުޅަނދެއް ކްރެމްލިންގެ ސެނެޓް ޢިމާރާތާ ދިމާލަށް ދަތުރު ކުރަމުންދާ މަންޒަރެވެ. ނަމަވެސް، އެ ޢިމާރާތާ ހަމައަށް ޑްރޯން ފޯރުމުގެ ކުރިން އޭގައި އަލިފާން ރޯވެ، އޭތި ގޮވާ މަންޒަރު ވެސް ވީޑިޔޯއިން ފެނެއެވެ. މި ޙަމަލާގައި އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ކްރެމްލިނުން ބުނެއެވެ. އަދި، ޙަމަލާ ދިން ވަގުތު ޕުޓިން ކްރެމްލިންގައި ނޫޅުއްވާ ކަމުގައި ރަޝިޔާގެ އާރް.އައި.އޭ. ނޫސް އޭޖެންސީއިން ރިޕޯޓު ކުރެއެވެ.
ޕުޓިން އަވަހާރަކޮށްލަން ޔޫކްރެއިނުން މަސައްކަތް ކޮށްފައިވާ ކަމަށް ރަޝިޔާއިން ތުހުމަތުކޮށްފައި މި ވަނީ، ކުރިއަށް އޮތް އަހަރެއްހާ ދުވަހުގެ ތެރޭގައި ރަޝިޔާ ސިފައިންގެ އަތްދަށުން ޔޫކްރެއިނުން މިނިވަން ކުރާނެ ކަމުގައި ޒެލެންސްކީ ވިދާޅުވެފައިވާ ދަނޑިވަޅެއްގައެވެ. އޭނާ މި މޭރުމުން ވާހަކަފުޅު ދައްކަވާފައި ވަނީ ފިންލެންޑަށް ވަޑައިގަންނަވައި، އެ ޤައުމުގެ ރައީސް ސައުލި ނީނިސްތޯއާ އެކު ބޭއްވި ބައްދަލުވުމެއްގައި ވާހަކަފުޅު ދައްކަވަމުންނެވެ. ފިންލެންޑަކީ ނޭޓޯގެ އެންމެ އައު މެންބަރު ޤައުމެވެ.
މި ދަތުރުފުޅުގައި ނޯޑިކް ސަރަޙައްދުގެ ފަސް ޤައުމުގެ އިސްވެރިންނާ އޭނާ ބައްދަލުކުރައްވާނެއެވެ. ފިންލެންޑުގައި ބާއްވާ ނޯޑިކް ސަރަޙައްދުގެ ޤައުމުތަކުގެ ސަމިޓުގައި ސްވިޑެންގެ ބޮޑުވަޒީރު އުލްފް ކްރިސްޓަރސޮނާއި، ނޯވޭގެ ބޮޑުވަޒީރު ޔޯނަސް ގާރް ސްޓޯރާއި، ޑެންމާކުގެ ބޮޑުވަޒީރު މެޓެ ފްރެޑެރިކްސަނާއި، އައިސްލެންޑުގެ ބޮޑުވަޒީރު ކާތްރިން ޔާކޮބްސްދޯތަރު ބައިވެރިވެ ވަޑައިގަންނަވައެވެ.
2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހު ރަޝިޔާއިން ސިފައިން ޔޫކްރެއިނަށް އަރައި ހަނގުރާމަ ފެށުމާ އެކު ޔޫކްރެއިނަށް އެހީތެރިކަން ފޯރުކޮށްދޭން ފަށާފައިވާ ޤައުމުތަކުގެ ތެރޭގައި ސްވިޑެންއާއި، ޑެންމާކާއި، ފިންލެންޑާއި، ނޯވޭ ހިމެނެއެވެ. އެ ޤައުމުތަކުން ދަނީ ޔޫކްރެއިނަށް އަސްކަރީ އަދި މާލީ ގޮތުން އެހީތެރިކަން ފޯރުކޮށްދެމުންނެވެ.
އެ ޤައުމުތަކުން ފޮނުވާފައިވާ ބައެއް ހަތިޔާރުގެ ތެރޭގައި ޖަރުމަނުވިލާތުގައި އުފައްދާ "ލެޕަޑް" މަރުކާގެ އަސްކަރީ ޓޭންކު ހިމެނެއެވެ. އަދި، ޑެންމާކުން ވަނީ 250 މިލިޔަން އެމެރިކާ ޑޮލަރުގެ އަސްކަރީ އެހީ ޔޫކްރެއިނަށް ފޯނުވާނެ ކަން އިޢުލާނުކޮށްފައެވެ.