ކުރިއެރުންތަކުގެ ފަހަތުގައިވަނީ ޒިންމާދާރު ނޫސްވެރިންނާއި މަސައްކަތަށް އޮތް މިނިވަންކަން: މުސްތަފާ

ނޫޫސްވެރިކަމުގެ މިނިވަންކަމުގެ ރޮނގުން ރާއްޖެއިން ހޯދަމުންދާ ކުރިއެރުންތަކުގެ އަސްލަކީ ޒިންމާދާރު ނޫސްވެރިންނާއި ދިވެހިރާއްޖެއިން މިނިވަން ނޫސްވެރިކަމަށްދޭ އަހަންމިއްޔަތުކަން ކަމަށް މޯލްޑިވިސް މީޑިއާ ކައުންސިލްގެ ރައީސް އަހުމަދު މުސްތަފާ ވިދާޅުވެއްޖެއެވެ.

މިއަދު ފާހަގަކުރަމުންދާ ނޫސްވެރިކަމުގެ މިނިވަންކަމުގެ ދުވަހުގެ މުނާސަބާތުގައި ދެއްވި ޚިޠާބުގައި މީޑިއާ ކައުންސިލްގެ ރައީސް ވަނީ ނޫސްވެރިކަމުގެ ރޮނގުން ރާއްޖެއިން ހޯދަމުންދާ ކާމިޔާބީތަކާއި، އެކަން އެގޮތުގައި ބޭއްވުމުގެ މުހިއްމުކަމުގެ މައްޗަށް އަލިއަޅުވާލައްވާފައެވެ.

1993 ވަނަ އަހަރުން ފެށިގެން، ކޮންމެ އަހަރެއްގެ މެއި މަހުގެ 3 ވަނަ ދުވަސް ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ ގޮތުގައި އަންނަނީ ފާހަގަކުރަމުންނެވެ.

މިދުވަހުގެ މުނާސަބަތުގައި މީޑިއާ ކައުންސިލްގެ ރައީސް އަހުމަދު މުސްތަފާ ދެއްވި ޚިޠާބުގައި ވިދާޅުވީ ވަކި ދުވަހެއް ކަނޑައެޅިގެން މިދުވަސް ފާހަގަކުރުމުގެ މައިގަނޑު މަޤްސަދަކީ ޤައުމުތަކުގެ މެދުގައި ނޫސްވެރިކަމުގެ މިނިވަންކަން އޮތް މިންވަރު ދެނެގަތުމާއި، ނޫސްވެރިކަމާއި ނޫސްވެރިންގެ މިނިވަންކަމަށް ދެވޭ ހަމަލާތަކުން އެ ފަރާތްތައް ދިފާޢުކުރުންކަމަށެވެ. އަދި ނޫސްވެރިކަމުގެ މަސައްކަތުގައި މި ދުނިޔެއިން ވަކިވެފައިވާ ފަރާތްތަކުގެ ހަނދާން އާކުރުމަކީވެސް މިފަދަ ދުވަހެއް ފާހަގަކުރާ މަގްސަދުތަކުގެ ތެރޭގައި ހިމެނޭކަމެއްކަމަށެވެ.

މުސްތަފާ ވިދާޅުވީ ނޫސްވެރިން ފަޚުރުވެރިކަމާއި ޝަރަފުވެރިކަމާއެކު، މުޅިން އާ ހިތްވަރަކާއެކު ނޫސްވެރިކަން އެހެން ހަރުފަތަކަށް ގެންދިއުމަށްޓަކައި، ވަރަށް ބުރަ މަސައްކަތްތަކެއް ކުރަމުންދާ ކަމަށެވެ. އަދި ނޫސްވެރިންނާއި މީޑިއާގެ މަސައްކަތުގައި ދިމާވާ ކޮންމެ ގޮންޖެހުމެއް ކަޑައްތުކުރުމުގައްޔާއި، ނޫސްވެރިކަމުގެ މިނިވަންކަމުގެ ޙައްޤު ކަށަވަރުކޮށްދިނުމުގައި، ނޫސްވެރިންނާއި މީޑިއާތަކާއެކު މޯލްޑިވްސް މީޑިއާ ކައުންސިލް އަބަދުވެސް އޮންނާނެކަމުގެ ފުރިހަމަ ޔަޤީންކަން ދެއްވާކަމަށްވެސް މުސްތަފާ ވިދާޅުވިއެވެ.

މުސްތަފާ ވިދާޅުވީ މިއަހަރުގެ ނޫސްވެރިކަމުގެ މިނިވަންކަމުގެ ދުވަސް ބައްދަލުކުރާއިރު، ދިވެހިރާއްޖޭގައި ނޫސްވެރިކަމަށް އޮތް ދަތިތަކާއި ހުރަސްތައް ވެސް ވަކި ކުޑައެއް ނޫން ކަމަށެވެ.

" މަސްދަރު ހާމަކުރުމާއި ގުޅޭ ބިލްގެ އިސްލާހުގެ މަސައްކަތް ރައްޔިތުންގެ މަޖިލިހުން ވަނީ ޕާރކްކޮށްފައި. އަދި މީގެ އިތުރުން ނޫސްވެރިކަމަށް ވަރަށް ބޮޑު ހުރަހަކާ ނުރައްކަލެއް ކުރިމަތި ވާނެ އިސްލާހެއް ގާނޫނުލް އުގޫބާތަށް ހުށަހަޅާފައި އެބައޮތް" މުސްތަފާ ވިދާޅުވިއެވެ.

މީޑިއާ ކައުންސިލްގެ ރައީސް ވިދާޅުވީ ނޫސްވެރިކަމުގެ މިނިވަންކަމާއި ގުޅޭ ގޮތުން ހުރިހާ ދިވެހިން އެއްއަޑަކުން ވާހަކަ ދައްކަންޖެހޭކަމަށެވެ. އެގޮތުން ހަގީގަތާއި އެއްގޮތަށް ޚަބަރު ގެނެސްދޭ ނޫސްވެރިންނަށް އަމާޒުކުރާ ހަމަލާތަކާއި ފުރައްސާރަތައް ހުއްޓާލުމަށް ގޮވާލަންޖެހޭކަން މީޑިއާ ކައުންސިލްގެ ރައީސް ފާހަގަކުރެއްވިއެވެ. ނޫސްވެރިކަމުގެ މިނިވަންކަމުގެ ރޮނގުން ރާއްޖެއިން ހޯދާފައިވާ ކާމިޔާބީތައް ދަމަހައްޓަންޖެހޭކަން ފާހަގަކުރައްވަމުން މުސްތަފާ ވިދާޅުވީ އެފަދަ ކޮންމެ ކާމިޔާބީއަކާއި ކުރިއެރުމެއްގެ އަސްލަކީ ޒިންމާދާރުކަމާއެކު ޚަބަރު ފެތުރުމުގައި ނޫސްވެރިން ތިބޭ ތިބުމާއި، ދިވެހިރާއްޖެއިން މިނިވަން ނޫސްވެރިކަމަށް ދޭ އަހަންމިއްޔަތުކަންކަމަށެވެ.

މިއަހަރަކީ ރިޔާސީ އިންތިޚާބު ބާއްވާ އަހަރަށްވުމުން ނޫސްވެރިކަމުގެ އަޚުލާޤީ މިންގަނޑާއި ދިވެހި މީޑިއާގެ އަޚްލާޤީ މިންގަނޑާއި އެއްގޮތަށް ޚަބަރާއި މައުލޫމާތު ގެނެސްދެއްވަން މިޑިއާ ކައުންސިލުގެ ރައީސް އިލްތިމާސްކުރެއްވިއެވެ.

މޯލްޑިވްސް މީޑިއާ ކައުންސިލުގެ ރައީސް ދެއްވި ޚިތާބުގައި ރާއްޖޭގެ މީޑިއާތަކަށާއި ނޫސްވެރިންނަށް ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ ތަހުނިޔާއާއި ހެޔޮ އެދުންތައް ފޮނުއްވެވިއެވެ.