ޚަބަރާއި ކަރަންޓް އެފެއަރސް ޕްރޮގްރާމްތަކަށް ޚާއްސަކޮށްގެން މިހާތަނަށްވެސް ރާއްޖޭގައި ހިނގަމުން އަންނަ ހަމައެކަނި ޗެނަލްއަކީ ޕީއެސްއެމް ނިއުސްއެވެ. ޗެނަލްގެ އެންމެ ބޮޑު ބޭނުމަށް ވެގެންދަނީ، ވަގުތުންވަގުތަށް އެންމެ އަވަހަށް އެންމެ ސައްޙަ ތެދު މަޢުލޫމާތު ރައްޔިތުންނާ ހަމައަށް ފޯރުކޮށްދިނުމެވެ.
ޚިދުމަތުގައި ޕީއެސްއެމް ނިއުސްއަށް މިއަދު ފުރެނީ 6 އަހަރެވެ. ރާއްޖޭގެ އެންމެ ދުވަސްވީ ބްރޯޑްކާސްޓިން ކުންފުނި، މިހާރުގެ ނަމުންނަމަ ޕަބްލިކް ސަރވިސް މީޑިއާ ޕީއެސްއެމްގެ ދަށުން "ޕީއެސްއެމް ނިއުސް" އުފައްދާ ޚިދުމަތް ދޭން ފެށީ 2017ވަނަ އަހަރުގެ މޭމަހު 3ވަނަ ދުވަހުއެވެ.
އެދުވަހުން ފެށިގެން މިއަދާއި ހަމައަށް މެދުކެނޑުމެއްނެތި، 24 ގަޑިއިރު އަންނަނީ ޚިދުމަތް ދެމުންނެވެ.
ޕީއެސްއެމް ނިއުސްގެ ކޮންމެ ކޮންޓެންޓަކީ ޚަބަރާއި މަޢުލޫމާތާއި ކަރަންޓް އެފެއަރސް ކަންކަމަށް ޚާއްސަކޮށްގެން ގެނެސްދޭ ކޮންޓެންޓެވެ.
ދުވާލަކު 7 ފަހަރު ބެލުންތެރިންނާ ހަމައަށް ވަގުތުން އެއިރެއްގެ އެންމެ ތާޒާ ޚަބަރުތައް ގެނެސްދެއެވެ. އެގޮތުން ރާއްޖޭގެ ޚަބަރުތަކާއި، ކުޅިވަރާއި ވިޔަފާރި ޚަބަރުތަކާއި ބޭރުދުނިޔޭގެ ޚަބަރުތައް ދިވެހި ބަހުންނާއި އިނގިރޭސިބަހުން އަންނަނީ ގެނެސްދެމުންނެވެ.
މީގެ އިތުރުން ކަރަންޓް އެފެއާޒް ޕްރޮގްރާމްތައްވެސް ޕީއެސްއެމް ނިއުސްއިން އަންނަނީ ގެނެސްދެމުންނެވެ. އޭގެ ތެރޭގައި ރާއްޖޭގެ ތަރައްޤީއަށް ކުރެވެމުންދާ އެކިއެކި މަސައްކަތްތައް ހިމަނައިގެން ގެންނަ ޕްރޮގްރާމްތަކާއި، ވިޔަފާރިއަށް ޚާއްސަ ޕްރޮގްރާމްތަކާއި، ރައްޔިތުންގެ މަޖިލީހުގެ މަސައްކަތްތަކަށް ޚާއްސަކޮށް ގެންނަ ޕްރޮގްރާމުތަކުގެ އިތުރުން ކުޅިވަރަށް ޚާއްސަކޮށްގެންވެސް ކޮންމެ ހަފްތާއަކުވެސް އަންނަނނީ ޚާއްސަ ޕްރޮގްރާމްތައް ގެނެސްދެމުންނެވެ.
މިޕްރޮގްރާމުތަކުގެ އިތުރުން ކޮންމެ ދުވަހަކު ގެނެސްދޭ ޕްރޮގްރާމްތަކުގެ ތެރޭގައި "ބާއްޖަވެރި ފެށުމެއް" ޕްރޮގްރާމާއި، ދުނިޔޭގެ މަޝްރަހަށް ބަލާލާ ގެނެސްދޭ "ދުނިޔޭގެ ކަޅި" ޕްރޮގްރާމާއި އަދި އެއިރެއްގެ މުހިންމު ކަންކަމަށް އަލިއަޅުވާލާ ގެނެސްދޭ "ރާއްޖެ މިއަދު" ޕްރޮގްރާމަކީ، ކޮންމެ ދުވަހަކުވެސް ވަގުތުން ގެނެސްދޭ ޕްރޮގްރާމްތަކެވެ.
ޕީއެސްއެމް އުފެދިގެން މިއަދާ ހަމައަށް އައިއިރު ކަރަންޓް އެފެއާޒް ޕްރޮގްރާމްތައް އުފައްދާ މިންވަރުވަނީ އިތުރުވެފައެވެ. އެގޮތުން މިއަހަަރުގެ ރަމަޟާން މަހަކީ މިފަދަ ގިނަ ޕްރޮގްރާމްތަކެއް ގެނެސްދިން މަހެކެވެ. އެގޮތުން ޕީއެސްއެމް ނިއުސްއިންވަނީ، މީގެ ކުރީގެ އަހަރުތަކުގައި ނުގެނެސްދޭހާ ގިނަ މައުލޫމާތާއި ޕްރޮގްރާމްތައް ގެނެސްދީފައެވެ. މީގެތެރޭގައި އާއްމުން ޝައުގުވެރިވާނެފަދަ އެތައް މަޢުލޫމާތުތަކާކާއި ވާހަކަތައްވަނީ ގެނެސްދީފައެވެ.
އެގޮތުން ރޯދަމަހަށް ޚާއްސަކޮށް ކޮންމެ ދުވަހަކު ލައިވްކޮށް ގެނެސްދިން "ޓެރެންޑިން"ޝޯވ އާއި ހަވީރު ގެނެސްދިން "ހަވީރު ގަޑި"އަކީ ބެލުންތެރިންގެ ބޮޑު ތަރުޙީބެއް ލިބުނު ޕްރޮގްރާމްތަކެކެވެ.
މީގެއިތުރުން އިޖްތިމާޢީ ބޮޑެތި މައްސަލަތަކަށް ބަލާލާ ގެނެސްދިން ޑޮކިއުމަންޓްރީ ސީރީޒްއާއި، ޤައުމަށް އަގުހުރި ޚިދުމަތްތަކެއް ކޮށްދެއްވާފައިވާ ބޭފުޅުންގެ ހަނދާންތައް ހިމަނައިގެން ގެނެސްދިން އޭރުގެ ހަނދާންތަކާއި، ހުނަރުވެރި ވިޔަފާރިވެރިންގެ ވާހަކަތަކާއި، އެކި ދާއިރާއިން އަންހެނުން ކުރަމުންދާ ޚިދުމަތުގެ ވާހަކަތައް އެކި ޕްރޮގްރާމްތަކުގެ ސިފައިގައި ވަނީ ގެނެސްދީފައެވެ.
އަދި ކުށްކުށުގައި ހުކުމްތަންފީޒްކުރާ މީހުންގެ ވާހަކަތަކާއި އެމީހުންގެ ދިރިއުޅުމުގެ ވާހަކަތައް ހިމަނައިގެން ގެނެސްދިން "އިތުރު ފުރުސަތު" ޕްރޮގްރާމާއި، މަޖިލިސް މެންބަރުންނާއެކު ދާއިރާތަކަށް ދަތުރުކޮށް ގެނެސްދިން ވާހަކަތަކަކީ މިހުރިހާ ޕްރޮގްރާމްތަކަކީ ޕީއެސްއެމް ނިއުސްއިން ގެނެސްދިން ތަފާތު، އަދި ބެލުންތެރިންގެ މަޤްބޫލްކަން ލިބުނު ޕްރޮގްރާމްތަކެކެވެ.
މިހުރިހާ ކަމެއްގެ އިތުރުންވެސް ބޮޑެތި ލައިވް ކަވަރޭޖްތަކާއި، ބްރޭކިން ނިއުސްތައް އެންމެ އަވަހަށް އެންމެ ތާޒާކަމާއެކު ގެނެސްދިނުމުގައި ޕީއެސްއެމް ނިއުސްގެ މުޅި ޓީމް އެކުގައިދަނީ ބޮޑު ބުރަ މަސައްކަތްތަކެއް ކުރަމުންނެވެ.
ޕީއެސްއެމް ނިއުސްގެ އޮތީ އެންމެ ޢަޒުމެކެވެ. އެތައް ގޮންޖެހުމަކާއެކުވެސް ބެލުންތެރިންނާހަމައަށް ތާޒާކަންމަތީ ވަގުތުން ވަގުތަށް، ތެދު ޚަބަރާ މަޢުލޫމާތު ފޯރުކޮށްދިނުމުގައި ކުރިއަށްދިއުމެވެ. ބެލުންތެރިންނަށް މަޢުލޫމާތު ލިބެނިމި ޝައުގުވެރި ޕްރޮގްރާމްތަކެއް ކުރިއަށް އޮތް އަހަރުވެސް ގެނެސްދިނުމެވެ.