އެމެރިކާގެ އިލިނޯއީ ސްޓޭޓަށް ވެއްޔާއި ހިރަފުހުގެ ތޫފާނެއް އެރުމުގެ ސަބަބުން ހިނގި ނުރައްކާތެރި މަގުމަތީގެ އެކްސިޑެންޓުތަކެއްގައި ހަ މީހުން މަރުވެއްޖެއެވެ. މި ހާދިސާ ހިނގާފައި ވަނީ އިލިނޯއީގެ ތެރެއިން ދަތުރުކުރާ އިންޓަރސްޓޭޓް 55 ހައިވޭގައެވެ. އެއީ ޗިކާގޯއާއި ސެއިންޓް ލުއީސް ގުޅުވައިދޭ ހައިވޭއެވެ.
އެ މަގުގައި 100 އަށްވުރެ ގިނަ އެއްގަމު އުޅަނދު އެކްސިޑެންޓުވިއެވެ. އެކްސިޑެންޓުވި އުޅަނދުތަކުގެ ތެރޭގައި ހިމެނެނީ 60 ވަރަކަށް ކާރާއި، މުދާ އުފުލާ 30 ވަރަކަށް އުޅަނދެވެ. މި ހާދިސާގައި ދެ ސެމައި-ޓްރަކްގައި އަލިފާން ރޯވި ކަމަށް ވެސް އިލިނޯއީގެ ފުލުހުން ވިދާޅުވެއެވެ.
އެކްސިޑެންޓުތަކުގައި ހަ މީހުން މަރުވެފައިވާއިރު، އިތުރު 30 މީހަކަށް އަނިޔާވެ، ހޮސްޕިޓަލުގައި ފަރުވާދޭން ޖެހުނު ކަމުގައި އިލިނޯއީގެ ފުލުހުން ވިދާޅުވެއެވެ. ޒަޚަމުވި މީހުންގެ ތެރޭގައި ހިމެނެނީ އުމުރުން 2 އަހަރާއި 80 އަހަރާއި ދެމެދުގެ އުމުރުފުރައިގެ މީހުންނެވެ.
އެ ސަރަޙައްދުގައި ޖެހެމުންދިޔަ ބާރު ވަޔާއެކު އެރި ވެއްޔާއި ހިރަފުހުގެ ތޫފާނާ ގުޅިގެން ދުރު ފެންނަ މިންވަރު ވަރަށް ބޮޑަށް ދަށްވި ކަމުގައި ވެސް އޮފިޝަލުން ވިދާޅުވެއެވެ. އަދި، އެކްސިޑެންޓުވި ބައެއް އުޅަނދުގައި ރޯވެ، އެ ސަރަޙައްދަށް ބޯ ދުންގަނޑެއް ފެތުރުނު ކަމަށް ވެސް އޮފިޝަލުން ވިދާޅުވެއެވެ.
2021 ވަނަ އަހަރު ޔޫޓާގައި ވެސް މި ފަދަ ހާދިސާއެއް ހިނގާފައިވެއެވެ. އެ ހާދިސާގައި 22 އެއްގަމު އުޅަނދު އެކްސިޑެންޓުވެ، އަށް މީހުން މަރުވިއެވެ.