ދުބާއީގެ ކުންފުންޏަކުން 217 މިލިއަން ޑޮލަރުގެ އިންވެސްޓްމެންޓްކޮށްގެން ރާއްޖޭގައި ރިސޯޓެއް ތަރައްޤީކުރުމުގެ މަސައްކަތް ފަށައިފިއެވެ.
މި އިންވެސްޓްމަންޓަކީ ދުބާއީގެ އެފްއޭއެމް ހޯލްޑިން ކުންފުނީގެ އިންވެސްޓްމަންޓެކެވެ.
އަލްމަހްރާ މޯލްޑިވްސްގެ ނަމުގައި ދުބާއީ ކުންފުނިން ތަރައްޤީކުރާ މި ރިސޯޓަކީ އެ ކުންފުނިން ދުބާއީން ބޭރުގައި ތަރައްޤީކުރާ ފުރަތަމަ ރިސޯޓެވެ. މި ޕްރޮޖެކްޓް ލޯންޗުކޮށްފައިވަނީ ދުބާއީގައި މިހާރު ކުރިއަށްދާ އެރޭބިއަން ޓްރެވަލް މާކެޓްގެ ތެރެއިނެވެ.
އަލްމަހްރާ މޯލްޑިވްސް ރިސޯޓްގެ ނަމުގައި މި ރިސޯޓް ތަރައްޤީކުރާނީ ކޮން ރިސޯޓެއްގައިކަން ހާމަނުކުރިޔަސް، މި ރަށް ތަރައްޤީކުރާނީ އެއްލައްކަ އަކަ މީޓަރުގެ ރަށެއްގައެވެ. އަދި އެތަނުގައި 150 ހެޓޮލް ޔުނިޓާއި، 100 ވޯޓަރވިލާ އަދި 40 ބީޗު ވިލާ ހުންނާނެއެވެ. މީގެއިތުރުން 3 ރެސްޓޯރަންޓާއި ސްޕާއަކާއި ޖިމެއްވެސް އެ ރިސޯޓްގައި ހުންނާނެއެވެ.
ރިސޯޓް ތަރައްޤީކުރުމުގެ މަސައްކަތް ކުރިއަށް 3 މަސް ދުވަހުގެ ތެރޭގައި ފަށާނެކަމަށާއި، އަދި 2 އަހަރު ތެރޭގައި އެ މަސައްކަތް ނިންމާލުމަށް އަމާޒުކޮށްފައިވާކަމަށް ރިސޯޓް ތަރައްޤީކުރާ ކުންފުނިން ބުނެއެވެ.
އެފްއޭއެމް ހޯލްޑިން ކުންފުންޏަކީ ރިއަލް އެސްޓޭޓް ވިޔަފާރީގައި ދުބާއީގައި އެންމެ ކުރިއަރަމުން އަންނަ އެއް ކުންފުންޏެެވެ. ކުރިއަށް އޮތްތަނުގައި ދުނިޔޭގެ އެކި ކަންކޮޅުތަކުގައި ޕްރޮޖެކްޓްތައް ހިންގަން އެކުންފުނިން ދަނީ ތަރައްޤީވަމުންނެވެ.