ޔަހޫދީ އިސްރާއީލުން ހައްޔަރުކޮށް ޖަލަށްލާފައިވާ އިސްލާމިކް ޖިހާދުގެ އިސްވެރިއެއް މަރުވުމާ ގުޅިގެން، އެ ކަމުގެ ބަދަލުހިފުމުގެ ގޮތުން އިސްރާޢީލަށް ވަރުގަދަ ރޮކެޓް ޙަމަލާތަކެއް ދީފިއެވެ. އިސްލާމިކް ޖިހާދަކީ ފަލަސްޠީނުގެ މިނިވަންކަމަށް ޖިހާދު ކުރަމުންދާ މުޖާހިދުންގެ ޖަމާޢަތެކެވެ.
އިސްރާއީލުގެ ރަށްތަކަށް އަމާޒުކޮށް ރޮކެޓް ޙަމަލާތައް ފޮނުވައިލާފައި ވަނީ ޣައްޒާއިންނެވެ. މުޖާހިދުންގެ ރޮކެޓް ޙަމަލާތައް އަމާޒުކޮށްފައި ވަނީ ޣައްޒާ ކައިރީގައި އޮންނަ އިސްރާޢީލުގެ ރަށެއް ކަމުގައިވާ ކިއްބުތްޒް ސާދަށެވެ. މި ޙަމަލާތަކުގައި އެއްވެސް މީހެއްގެ ފުރާނައަށް ނުރައްކާވި ކަމުގެ ރިޕޯޓެއް ކޮށްފައެއް ނެތެވެ.
ޔަހޫދީ އިސްރާއީލުގެ ޖައްބާރު ސިފައިން ހައްޔަރުކޮށް ޖަލަށްލާފައި ހުއްޓާ މަރުވެފައި ވަނީ އިސްލާމިކް ޖިހާދުގެ އިސްވެރިއެއް ކަމުގައިވާ ޤާދިރު އަދުނާނެވެ. އޭނާ މަރުވީ ބަނޑުހައިހޫނުކަމުގެ ހަޅުތާލެއް ކުރަމުން ދަނިކޮށް ކަމުގައި ޔަހޫދީ އިސްރާޢީލުގެ އަސްކަރިއްޔާއިން ބުންޏެވެ. އޭނާ ބަނޑުހައިހޫނުކަމުގެ ހަޅުތާލު ފަށާފައި ވަނީ ފެބުރުވަރީ މަހުގެ 5 ވަނަ ދުވަހުއެވެ. ޔަހޫދީ އިސްރާޢީލުގެ ހައްޔަރުގައި ހުއްޓައި އަދުނާނު މަރުވެފައިވާކަން އިސްލާމިކް ޖިހާދުން ވެސް ވަނީ ކަށަވަރުކޮށްދީފައެވެ. އޭނާ ހައްޔަރުކޮށްފައި ވަނީ ފެބުރުވަރީ 5 ވަނަ ދުވަހު ހުޅަނގު އައްސޭރީގައި ހުންނަ އޭނާގެ އަމިއްލަ ގޭގައި ހުއްޓައެވެ. އޭނާ ހައްޔަރުކޮށްގެން ބަހައްޓާފައި ހުރީ ރަމްލާ ޖަލުގައެވެ.
"އަދުނާން ވަނީ ޖަލުގައި ހުރެ ޞިއްޙީ ފަރުވާ ހޯދަން ދެކޮޅު ހަދާފައި. އޭނާ ބަހައްޓާފައި ހުރީ ކުޑަ ގޮޅިއެއްގައި ވަރަށް ދަތި ހާލުގައި. އޭނާ ހޮސްޕިޓަލަކަށް ބަދަލުކޮށް ފަރުވާދޭން ޔަހޫދީ އިސްރާޢީލުގެ އަސްކަރިއްޔާއިން ވަނީ ދެކޮޅު ހަދާފައި. އަދި، އޭނާއަށް ޤާނޫނީ ވަކީލުންނާ ބައްދަލުކުރުމުގެ ފުރުޞަތު ވެސް ދީފައެއް ނުވޭ،" އަދުނާނުގެ އަނބިމީހާ ބުންޏެވެ.
އިސްރާއީލުގެ ފިޒިޝަން ފޯރ ހިޔުމަން ރައިޓްސް ޖަމުޢިއްޔާގެ އޮފިޝަލަކު ހުސްވި ހަފުތާގައި ވަނީ ރަމްލާ ޖަލަށް ޒިޔާރަތްކޮށް އަދުނާނާ ބައްދަލުކޮށްފައެވެ. އަދި، އޭނާގެ ހާލަތު ބެލުމަށް ފަހު އެ ޖަމުޢިއްޔާގެ އޮފިޝަލުން ވަނީ އޭނާ ހޮސްޕިޓަލަކަށް ބަދަލުކޮށް ފަރުވާ ދިނުމަށް އިރުޝާދު ދީފައެވެ. ނަމަވެސް، އެ ކަމަށް ވެސް ޔަހޫދީ އިސްރާއީލުގެ އަސްކަރިއްޔާއިން ވަނީ ދެކޮޅު ހަދާފައެވެ.