ރަޝިޔާއިން ޔޫކްރެއިނުގެ ވެރިރަށް ކީވަށް އަމާޒުކޮށް ފޮނުވައިލި މިސައިލް ޙަމަލާތަކެއް ދިފާޢުކޮށް ވައްޓައިލައިފިއެވެ. ރަޝިޔާ ސިފައިން ކީވަށް އަމާޒުކޮށްދޭ މިސައިލް ޙަމަލާތައް ފަހަކަށް އައިސް ވަނީ އިތުރުކޮށްފައެވެ. ކީވްގެ އިތުރުން ޔޫކްރެއިނުގެ ބޮޑެތި އެހެން ރަށްތަކަށް ވެސް ރަޝިޔާއިން ދަނީ މިސައިލާއި ޑްރޯން ބޭނުންކޮށްގެން ވަރުގަދަ ޙަމަލާތަކެއް ދެމުންނެވެ.
ޔޫކްރެއިނުގެ އަސްކަރިއްޔާގެ ކޮމާންޑަރ އިން ޗީފް ވެލެރީ ޒަލުޜްނީ ވިދާޅުވީ ރަޝިޔާއިން ކީވަށް އަމާޒުކޮށް 18 މިސައިލް ފޮނުވައިލާފައިވާ ކަމުގައެވެ. ނަމަވެސް، ޔޫކްރެއިނުގެ ވައިގެ ދިފާޢީ ނިޒާމު ބޭނުންކޮށްގެން އޭގެތެރެއިން 15 މިސައިލް ދިފާޢުކޮށް ވައްޓައިލާފައިވާ ކަމުގައި އޭނާ ވިދާޅުވިއެވެ. މިއީ، ފާއިތުވި ތިން ދުވަހުގެ ތެރޭގައި ރަޝިޔާއިން ކީވަށް ޙަމަލާދީފައިވާ ދެވަނަ ފަހަރެވެ.
ކީވަށް ދިން މިސައިލް ޙަމަލާތަކުގައި ޢާންމުންގެ އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި ކީވްގެ އޮފިޝަލުން ވިދާޅުވެއެވެ. އަދި، ޢާންމުން ދިރިއުޅޭ އެއްވެސް ޢިމާރާތަކަށް ވެސް ގެއްލުން ލިބިފައެއް ނުވާ ކަމުގައި ރިޕޯޓުތައް ބުނެއެވެ. ކީވްގައި ގާއިމުކޮށްފައިވާ ވައިގެ ދިފާޢީ ނިޒާމު ޔޫކްރެއިނުން ވަނީ ވަރުގަދަ ކޮށްފައެވެ.
ކީވްގެ އިތުރުން ޑްނިޕްރޯޕެޓްރޮވްސްކަށް ވެސް ރަޝިޔާއިން ވަނީ ގިނަ ޢަދަދެއްގެ މިސައިލްތަކެއް ފޮނުވައިލާފައެވެ. އެ ރަށަށް އަމާޒުކޮށް ފޮނުވައިލި މިސައިލްތަކުގެ ތެރެއިން ހަތް މިސައިލެއް ދިފާޢުކޮށް ވައްޓައިލާފައިވާ ކަމުގައި އެ ސަރަޙައްދުގެ ރީޖަނަލް ކައުންސިލްގެ ޑިރެކްޓަރ މައިކޮލާ ލުކަޝުކް ވިދާޅުވިއެވެ. މި ޙަމަލާތަކުގައި ޢާންމުންގެ 25 މީހަކު ޒަޚަމުވެ، ފަރުވާދޭން ޖެހުނު ކަމުގައި ވެސް އޭނާ ވިދާޅުވިއެވެ.
ޔޫކްރެއިނުގެ އިރުމަތީގައިވާ ޕެވްލޮހްރެޑަށް ވެސް ރަޝިޔާއިން ވަނީ ދެ ފަހަރެއްގެ މަތިން މިސައިލް ޙަމަލާތަކެއް ދީފައެވެ. މި ޙަމަލާތަކުގައި ބޮޑެތި ގެއްލުންތަކެއް ލިބިފައިވާއިރު، އޭގެ ތެރޭގައި 19 އެޕާޓްމަންޓް ޢިމާރާތާއި، 25 ގެއަކަށް ބޮޑެތި ގެއްލުންތަކެއް ލިބިފައިވާ ކަމުގައި އެ ސަރަޙައްދުގެ އޮފިޝަލުން ވިދާޅުވެއެވެ. ޙަމަލާތަކުގައި ބައެއް ޢިމާރާތްތަކުގައި އަލިފާން ރޯވެފައިވާ ކަމުގައި ވެސް އޮފިޝަލުން ވިދާޅުވެއެވެ.