ތުރުކީވިލާތުގެ ޖާސޫސީ އިދާރާގެ ސިފައިން ހިންގި ޚާއްޞަ އޮޕަރޭޝަނެއްގައި އައިއެސް ޖަމާޢަތުގެ އިސްވެރިޔާ އަބޫ ޙުސައިން އަލް-ޤުރައިޝީ މަރައިލައިފިއެވެ. އޭނާ މަރައިލާފައި ވަނީ ތުރުކީވިލާތުގެ ޖާސޫސީ އިދާރާގެ ސިފައިން ސޫރިޔާގައި ހިންގި ޚާއްޞަ އޮޕަރޭޝަނެއްގައެވެ. އަލް-ޤުރައިޝީ މަރައިލާފައިވާ ކަން އިޢުލާނު ކުރައްވާފައި ވަނީ ތުރުކީވިލާތުގެ ރައީސް ރަޖަބް ޠައްޔިބް އުރުދުޣާނެވެ.
"އެ މީހާ މަރައިލާފައި ވަނީ ތުރުކީވިލާތުގެ ޤައުމީ ޖާސޫސީ އިދާރާގެ ސިފައިން ހިންގި ޚާއްޞަ އޮޕަރޭޝަނެއްގައި،" ޓީ.އާރް.ޓީ. ތުރްކް ޓީވީއަށް ދެއްވި ބަސްދީގަތުމެއްގައި އުރުދުޣާން ވިދާޅުވިއެވެ. އޭނާ މަރައިލުމަށް ތުރުކީވިލާތުގެ އަސްކަރިއްޔާއިން ޚާއްޞަ އޮޕަރޭޝަނެއް ކުރިއަށް ގެންދާތާ މިހާރު ދުވަސްތަކެއް ފާއިތުވެފައިވާ ކަމުގައި އުރުދުޣާން ވިދާޅުވިއެވެ.
އޭނާ މަރައިލާފައި ވަނީ ސޫރިޔާގެ އުތުރުގައިވާ ޖިންދީރިސް ކިޔާ ރަށެއްގައި ތުރުކީވިލާތުގެ ޖާސޫސީ އިދާރާގެ ސިފައިން ހިންގި އޮޕަރޭޝަނެއްގައެވެ. އެ ސަރަޙައްދު އޮތީ ތުރުކީވިލާތުން ވާގިވެރިވާ ހަތިޔާރު އެޅި ޖަމާޢަތްތަކުގެ ބާރުގެ ދަށުގައެވެ. އެއީ، ފެބުރުވަރީ 6 ވަނަ ދުވަހު ތުރުކީވިލާތާއި ސޫރިޔާއަށް އައި ބާރުގަދަ ބިންހެލުމުގައި ވަރަށް ބޮޑަށް ގެއްލުން ލިބިފައިވާ ރަށެކެވެ. އެ ރަށުގައި އައި.އެސްގެ ގިނަ ޢަދަދެއްގެ ހަނގުރާމަވެރިން ފިލައިގެން އުޅޭ ކަމަށް މަސްރަޙު ދިރާސާކުރާ ފަރާތްތަކުން ބުނެއެވެ.
އައި.އެސް. ޖަމާޢަތުގެ އިސްވެރިޔާގެ މަޤާމަށް އަލް-ޤުރައިޝީ ޢައްޔަންކޮށްފައި ވަނީ 2022 ވަނަ އަހަރުގެ ނޮވެންބަރު މަހު އެ ޖަމާޢަތުގެ ކުރީގެ އިސްވެރިޔާ މަރައިލުމާ ގުޅިގެންނެވެ. އެ ޖަމާޢަތުގެ ކުރީގެ އިސްވެރިޔާ މަރައިލާފައި ވަނީ ސޫރިޔާގެ ދެކުނުގެ ސަރަޙައްދެއްގައެވެ. 2014 ވަނަ އަހަރުގެ ތެރޭގައި އައި.އެސް. ޖަމާޢަތުން ވަނީ ސޫރިޔާއާއި އިރާޤުގެ ބޮޑު ސަރަޙައްދަކަށް އަތްގަދަކޮށްފައެވެ. ނަމަވެސް، ގުޅިފައިވާ ފައުޖުތަކުން ފެށި އަސްކަރީ ކެމްޕޭނުގައި އެ ޖަމާޢަތުގެ ހަނގުރާމަވެރިން ވަނީ ބަލިކޮށްފައެވެ.
އެ ޖަމާޢަތުގެ ހަނގުރާމަވެރިން އަދިވެސް ސޫރިޔާއާއި އިރާޤުގެ ބައެއް ސަރަޙައްދުތަކުގައި ހަރަކާތްތެރިވަމުން ދިޔަ ނަމަވެސް، އެމެރިކާއިން އިސްނަގައިގެން އުފައްދާފައިވާ އަސްކަރީ ކޯލިޝަނަކުން ދަނީ އެ ޖަމާޢަތުގެ މެންބަރުންނާ ދެކޮޅަށް ހަނގުރާމަ ކުރަމުންނެވެ.