ޔޫކްރެއިނުގެ އިރުމަތީގައިވާ ބަޚްމުތްގައި ކުރަމުންދާ ހަނގުރާމަ ހުއްޓައިލުމަށް ފަހު އެ ރަށުން ފައިބަން ޖެހިދާނެ ކަމަށް ބުނެ، އެ ރަށަށް ރަޝިޔާއިން ފޮނުވާފައިވާ ވެގްނަރ ގުރޫޕުގެ ކުލީ ސިފައިން އިންޒާރުދީފިއެވެ. ބަޚްމުތް ހިފުމަށް ރަޝިޔާއިން މަސައްކަތް ފަށާފައި ވަނީ މީގެ 10 ވަރަކަށް މަސް ކުރިންނެވެ. އެއީ އިރުމަތީގައިވާ ޑޮނެޓްސްކުގެ ރަށެކެވެ. އެ ރަށް ހިފުމަށް ހަނގުރާމައިގެ ކުރީ ސަފަށް ފޮނުވާފައި ވަނީ ވެގްނަރ ގުރޫޕުގެ ކުލީ ސިފައިންނެވެ.
އެ ގުރޫޕުގެ އިސްވެރިޔާ ޔެވްގެނީ ޕްރިގޮޜިން ބުނީ ބަޚްމުތްގެ އިތުރު 100 ނުވަތަ 150 މީޓަރުގެ ސަރަޙައްދެއް އޭނާގެ ފައުޖުތަކުން ހިފާފައިވާ ކަމުގައެވެ. އަދި، އެ ރަށުގައި ޔޫކްރެއިނުގެ ފައުޖުތަކުގެ ބާރުގެ ދަށުގައި އޮތީ އެންމެ ތިން ކިލޯމީޓަރުގެ ސަރަޙައްދެއް ކަމުގައި ވެސް އޭނާ ބުންޏެވެ. ބަޚްމުތް ހިފުމަށް ކުރަމުންދާ ހަނގުރާމައިގައި ވެގްނަރ ގުރޫޕުގެ 94 ކުލީ ސިފައިން މަރުވި ކަމުގައި ވެސް އޭނާ ބުންޏެވެ.
"ރަޝިޔާގެ އަސްކަރިއްޔާއިން ވެގްނަރގެ ފައުޖުތަކަށް ބޭނުންވާ ވަރަށް ވަޒަނާއި ހަތިޔާރު ފޮނުވާ ނަމަ މަރުވި މީހުންގެ ޢަދަދު މަދުވީސް. އެތަކެއް ފަހަރު އެދުމުން ވެސް އަސްކަރިއްޔާއިން ވަޒަނާއި ހަތިޔާރެއް ފޮނުވާފައެއް ނުވޭ،" ޕްރިގޮޜިން ބުންޏެވެ. އަދި، ވެގްނަރގެ ފައުޖުތަކަށް ބޭނުންވާ ވަރަށް ވަޒަނާއި ހަތިޔާރު ނުފޮނުވާ ނަމަ، ބަޚްމުތް ހިފުމަށް ކުރަމުންދާ ހަނގުރާމަ ހުއްޓައިލުމަށް ފަހު އެ ގުރޫޕުން ފަހަތަށް ޖެހޭނެ ކަމަށް ބުނެ، އޭނާ ވަނީ ރަޝިޔާއަށް އިންޒާރު ވެސް ދީފައެވެ.
މި މޭރުމުން އިންޒާރުދީ، އޭނާ ވަނީ ރަޝިޔާގެ ދިފާޢީ ވަޒީރު ސަރްގޭ ޝޮއިގޫއަށް ސިޓީއެއް ވެސް ފޮނުވާފައެވެ. "ރަޝިޔާގެ އަސްކަރިއްޔާގެ އިސްވެރިން ދަނީ އެ ޤައުމުގެ ރައްޔިތުންނަށް އޮޅުވައިލާ ދޮގު ބުނަމުން. ހުރިހާ ކަމެއް ރަނގަޅޭ ބުނެ އޮޅުވައިލަމުން. ހަޤީޤަތަށް ވާހަކަ ދައްކާ ނަމަ އަހުރެން ބުނާނީ ރަޝިޔާ އޮތީ ކާރިސާއެއްގެ ތުންފަތްމަތީގައޭ،" ޕްރިގޮޜިން ބުންޏެވެ.
ބަޚްމުތުން ފައިބަން ޖެހިދާނެ ކަމުގެ އިންޒާރު ވެގްނަރ ގުރޫޕުން ދީފައިވާއިރު، އެ ރަށް ދިފާޢު ކުރުމަށް ހަނގުރާމަ ކުރަމުންދާ ޔޫކްރެއިނުގެ ފައުޖުތަކަށް ހަތިޔާރާއި އެހެނިހެން ސާމާނު ފޯރުކޮށްދޭ މަގު އަދިވެސް އޮތީ ޔޫކްރެއިން ސިފައިންގެ ބާރުގެ ދަށުގައި ކަމަށް އެ ޤައުމުން ބުނެއެވެ. ބަޚްމުތް ހިފުމަކީ ހަނގުރާމައިގައި ރަޝިޔާއަށް ލިބޭނެ ވަރަށް ބޮޑު ކާމިޔާބީއެއްގެ ގޮތުގައި ރަޝިޔާއިން ދެކެއެވެ.
ބަޚްމުތް ހިފުމަށް ކުރަމުންދާ ހަނގުރާމައިގެ ތެރެއިން އޭޕްރިލް 30 ވަނަ ދުވަހު އެކަނިވެސް 58 ފަހަރެއްގެ މަތިން ރަޝިޔާގެ ފައުޖުތަކުން މަސައްކަތް ކުރި ކަމުގައި ޔޫކްރެއިނުގެ އަސްކަރިއްޔާއިން ބުނެއެވެ. ނަމަވެސް، ޔޫކްރެއިނުގެ އަސްކަރިއްޔާއިން ވަނީ އެ ޙަމަލާތައް ދިފާޢު ކޮށްފައެވެ. ބަޚްމުތް ހިފުމަށް ފަހު ރަޝިޔާގެ ފައުޖުތަކުން ދެން އަމާޒު ހިފާނީ އެ ރަށާ 17 ކިލޯމީޓަރު ދުރުގައި އޮތް ޗެސިވް ޔާރަށް އަތްގަދަކުރަން ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.