އިންޑިޔާގެ ޕުންޖާބް ސްޓޭޓްގެ ރަށެއްގެ ސިނާޢީ މަސައްކަތްތައް ކުރާ ސަރަޙައްދެއްގައި ހުންނަ ކާރުޚާނާއަކުން ގޮތްނޭނގޭ ނުރައްކާތެރި ގޭހެއް ލީކުވެ 11 މީހުން މަރުވެއްޖެއެވެ. މި ހާދިސާ ހިނގާފައިވަނީ ޕުންޖާބުގެ ރަށެއް ކަމުގައިވާ ލުދިއާނާގެ ޖިޔަސްޕޫރާގައެވެ. މި ހާދިސާގައި ނޭވާލާ ނިޒާމަށް ގޭހުގެ އަސަރު ކުރި އިތުރު ހަތަރު މީހަކު ހޮސްޕިޓަލުގައި އެޑްމިޓްކޮށްގެން ދަނީ ފަރުވާ ދެމުންނެވެ.
ކާރުޚާނާގެ ތެރެއަށް ލީކުވެފައި ވަނީ ކޮން ގޭހެއް ކަން އަދި ސާފު ނޫން ކަމުގައި އެ ތަނުގެ އޮފިޝަލަކު ވިދާޅުވިއެވެ. އަދި، އެއީ ކޮން ގޭހެއް ކަން ދެނެގަތުމަށް އޮފިޝަލުން މިހާރު ދަނީ ތަހުޤީޤު ކުރަމުންނެވެ. މި ހާދިސާ ހިނގަން މެދުވެރިވީ ކާރުޚާނާގައި އަޅާފައިވާ ސަލާމަތީ ފިޔަވަޅުތަކަށް ފަރުވާކުޑަކުރުމުގެ ސަބަބުން ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
މިއީ އިންޑިޔާގެ ކާރުޚާނާއެއްގައި ނުވަތަ ސިނާޢީ މަސައްކަތްތައް ކުރާ އެހެން ތަންތަނެއްގައި ހިނގާފައިވާ މި ފަދަ ފުރަތަމަ ހާދިސާއެއް ނޫނެވެ. ސަލާމަތީ ފިޔަވަޅުތަކަށް ފަރުވާކުޑަކުރުމުގެ ސަބަބުން މީގެ ކުރިން ވެސް އިންޑިޔާގައި މި ފަދަ ހިތާމަވެރި ހާދިސާތައް ހިނގާފައިވެއެވެ. އޭގެ ތެރޭގައި ނުރައްކާތެރި ގޭސް ލީކުވުމުގެ ހާދިސާތައް ވެސް ހިމެނެއެވެ.
ހުސްވި 2022 ވަނަ އަހަރު ހިނގި މި ފަދަ އެހެން ހާދިސާއަކާ ގުޅިގެން 112 މީހަކު ހޮސްޕިޓަލުގައި އެޑްމިޓުކޮށްގެން ފަރުވާދޭން ޖެހުނެއެވެ. ގޭސް ލީކުމުގެ ހާދިސާ ހިނގާފައި ވަނީ ދެކުނުގައިވާ އަންދްރަ ޕްރަދޭޝް ސްޓޭޓްގައި ހުންނަ އަންނައުނު އުފައްދާ ކާރުޚާނާއެއްގައެވެ. އެ އަހަރުގެ ޖޫން މަހު އެހެން ކާރުޚާނާއެއްގައި ނުރައްކާތެރި ގޭހެއް ލީކުވެ، އެ ތަނުގައި މަސައްކަތްކުރި 200 އަށްވުރެ ގިނަ އަންހެނުން ހޭނެތުނެވެ.
2020 ވަނަ އަހަރު ވިސާކާޕަތްނަމް ސްޓޭޓްގެ ވިސާކާޕަތްނަމްގައި ހުންނަ ކެމިކަލް ކާރުޚާނާއެއްގައި ނުރައްކާތެރި ގޭހެއް ލީކުވެ 15 މީހުން ވަނީ މަރުވެފައެވެ. އެ ހާދިސާގައި ވެސް 100 އަށްވުރެ ގިނަ މީހުން ހޮސްޕިޓަލުގައި އެޑްމިޓްކޮށްގެން ފަރުވާދޭން ޖެހުނެވެ. އެ ހާދިސާގައި 1,000 އަށްވުރެ ގިނަ މީހުންނަށް ގޭހުގެ އަސަރުކުރިއެވެ.
އެ ހާދިސާ ހިނގާފައި ވަނީ އެލް.ޖީ. ޕޮލިމަރސް ކިޔާ ކުންފުންޏެއްގެ ކާރުޚާނާއެއްގައެވެ. އެ ހާދިސާގައި ޒިންމާވާ 12 މީހެއްގެ މައްޗަށް ދަޢުވާ އުފުލާފައިވެއެވެ. އޭގެ ތެރޭގައި ދެކުނު ކޮރެޔާގެ ދެ ރައްޔިތުން ވެސް ހިމެނެއެވެ. އެ މީހުންގެ މައްޗަށް އުފުލާފައި ވަނީ ރައްކާތެރި ކަމުގެ ފިޔަވަޅުތަކަށް ފަރުވާކުޑަކުރުމުގެ ދަޢުވާއެވެ.
އިންޑިޔާގައި މިހާތަނަށް ހިނގާފައިވާ މި ފަދަ އެންމެ ހިތާމަވެރި ހާދިސާ ހިނގާފައި ވަނީ 1984 ވަނަ އަހަރު ބޯޕާލްގައެވެ. އެ ހާދިސާގައި، ކާރުޚާނާގައި މަސައްކަތް ކުރާ މީހުންގެ އިތުރުން އެ ސަރަޙައްދުގައި ދިރިއުޅޭ ޢާންމު ރައްޔިތުންގެ ތެރެއިން 3,500 އެއްހާ މީހުން މަރުވިއެވެ. ޔޫނިއަން ކާބައިޑް ކުންފުނިން ހިންގި އެ ކާރުޚާނާގައި ހިނގި ހާދިސާގެ އަސަރުތައް މިއަދާ ހަމައަށް ވެސް ދެމިގެން ގޮސްފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.