ރަޝިޔާއިން އަތްގަދަކޮށްފައިވާ ކްރައިމިޔާގައި ހުންނަ ތެޔޮ ގުދަނަކަށް ޔޫކްރެއިނުން ދިން ޑްރޯން ޙަމަލާއެއްގައި އެ ތަނުގައި ރޯވެ، ބޮޑެތި ގެއްލުންތަކެއް ލިބިއްޖެއެވެ. ޑްރޯން ޙަމަލާ ދީފައި ވަނީ ކްރައިމިޔާގެ ސެވާސްޓޮޕޯލް ބަނދަރުގައި ހުންނަ ތެޔޮ ރައްކާކުރާ ގުދަނަކަށެވެ. އެ ތަނުގައި ރޯވި އަލިފާންގަނޑުގެ ސަބަބުން އެތަކެއް ކިލޯމީޓަރަކަށް ދުމުގެ އަސަރު ކޮށްފައިވެއެވެ.
ތެޔޮ ގުދަނަށް ޑްރޯން ޙަމަލާދިނުމުގެ ފަހަތުގައި ވަނީ ޔޫކްރެއިން ކަމަށް ރަޝިޔާއިން ބުނި ނަމަވެސް، ޔޫކްރެއިނުން ޙަމަލާގެ ޒިންމާ އުފުލާފައެއް ނުވެއެވެ. ތެޔޮ ރައްކާކުރާ ގުދަނުގައި ރޯވި އަލިފާންގަނޑު މިހާރު ނިއްވައިލާފައިވީ ނަމަވެސް، ބޮޑެތި ގެއްލުންތަކެއް ވަނީ ލިބިފައެވެ.
އެ ތަނުގައި 10 ޓޭންކުގައި ރައްކާކޮށްފައި ހުރި 40,000 ޓަނުގެ ތެލުގައި ރޯވެ އަނދާފައިވާ ކަމުގައި ޔޫކްރެއިނުގެ ޖާސޫސީ އިދާރާއިން ބުނެއެވެ. އެއީ ރަޝިޔާގެ އަސްކަރިއްޔާގެ ބްލެކް ސީ ފްލީޓް ނުވަތަ ބްލެކް ސީގައި ހަރަކާތްތެރިވާ ކަނޑުގެ ސިފައިންގެ މަނަވަރުތަކުގައި ބޭނުންކުރުމަށް ރައްކާކޮށްފައި ހުރި ތެލެވެ.
ނަމަވެސް، ކްރައިމިޔާއަށް ރަޝިޔާއިން ފޮނުވާފައި ހުންނަވާ ގަވަރުނަރު މީޚާއީލް ރެޒްވޮޜެވް އެ ކަން ދޮގު ކުރައްވައެވެ. އޭނާ ވިދާޅުވީ، ޙަމަލާގައި ގެއްލުން ލިބިފައި ވަނީ އެންމެ ޓޭންކަކަށް ކަމުގައެވެ. އަދި، ސެވަސްޓޮޕޯލަށް ސިއްރިޔާތުގައި ކުއްލި ޙަމަލާއެއް ދޭން ޔޫކްރެއިނުން މަސައްކަތް ކުރި ނަމަވެސް، އެ ކަން ކާމިޔާބުވެފައި ނުވާ ކަމުގައި އޭނާ ވިދާޅުވިއެވެ. އަދި، މި ޙަމަލާގައި ބޮޑެތި ގެއްލުންތަކެއް ލިބިފައިވާ ކަމަށް ބުނާ ރިޕޯޓުތައް އޭނާ ވަނީ ދޮގު ކުރައްވާފައެވެ.
ކްރައިމިޔާއަކީ 2014 ވަނަ އަހަރު ޔޫކްރެއިނަށް އަރައި ރަޝިޔާއިން އަތްގަދަކޮށްފައިވާ އެ ޤައުމުގެ އެންމެ ދެކުނުން އޮންނަ ސަރަޙައްދެވެ. ސެވަސްޓޮޕޯލްގައި ހުންނަ ތެޔޮ ރައްކާކުރާ ގުދަނަށް ޙަމަލާދީފައި މި ވަނީ، ޔޫކްރެއިނަށް އަރައި ހަނގުރާމަ ކުރަމުންދާ ރަޝިޔާގެ ފައުޖުތަކާ ދެކޮޅަށް ޔޫކްރެއިނުގެ އަސްކަރިއްޔާއިން ވަރުގަދަ ކެމްޕޭނެއް ފެށުމަށް ތައްޔާރުވަމުންދާ ދަނޑިވަޅެއްގައެވެ.
ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފަށާފައި ވަނީ 2022 ވަނަ އަހަރުގެ ފެބުރުވަރީ މަހުގެ 24 ވަނަ ދުވަހުއެވެ. ރަޝިޔާއާ އެކު ކުރާ އެއްވެސް ސުލްޙައިގެ މަޝްވަރާތަކެއްގައި ކްރައިމިޔާގެ މިނިވަން ކަން ހޯދުން ހިމެނޭނެ ކަމުގައި ޔޫކްރެއިނުން ދަނީ ބުނަމުންނެވެ. މީގެ ކުރިން ވެސް އެތަކެއް ފަހަރެއްގެ މަތިން ކްރައިމިޔާއަށް ޔޫކްރެއިނުގެ ސިފައިން ޑްރޯން ޙަމަލާތައް ދީފައިވާ ކަމުގައި ރަޝިޔާއިން ތުހުމަތު ކުރެއެވެ. ނަމަވެސް، ޔޫކްރެއިނުން މި ފަދަ އެއްވެސް ޙަމަލާއެއްގެ ޒިންމާ އުފުލާފައެއް ނުވެއެވެ.
ދުރުގައިވާ ރަޝިޔާގެ އަމާޒުތަކަށް ޙަމަލާދިނުމުގެ ގާބިލުކަން ލިބިފައިވާ ދުރު ރާސްތާ މިސައިލް ޔޫކްރެއިނުގެ އަސްކަރިއްޔާގައި ނެތް ނަމަވެސް، ޑްރޯން ފަދަ ހަތިޔާރު ބޭނުންކޮށްގެން ޔޫކްރެއިނުން ދަނީ ދުރުގައި އޮންނަ ރަޝިޔާގެ އަމާޒުތަކަށް ވެސް ޙަމަލާދެމުންނެވެ. ކްރައިމިޔާއަށް ދީފައިވާ ޙަމަލާތަކާ ގުޅޭ ގޮތުން ޔޫކްރެއިނުގެ އަސްކަރީ އިސް އޮފިޝަލެއް ކަމުގައިވާ އެންޑްރީ ޔޫސޮފް ވިދާޅުވީ، ކްރައިމިޔާގައި ހިނގި އަލިފާނުގެ ހާދިސާއަކީ ޔޫކްރެއިނުގެ އުމާނަށް ރަޝިޔާއިން ދިން ޙަމަލާތަކުގައި ޢާންމުންގެ 23 މީހުން މަރައިލުމުގެ އަދަބު ކަމުގައެވެ. ނަމަވެސް، ކްރައިމިޔާއަށް ޙަމަލާދިނީ ޔޫކްރެއިނުން ކަމަށް އޭނާ ވެސް އެއްބަސްވެފައެއް ނުވެއެވެ.
އުމާނަށް ދީފައިވާ ޙަމަލާތަކަކީ ޓެރެރިސްޓު ޙަމަލާތަކެއްގެ ގޮތުގައި ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވަނީ ސިފަ ކުރައްވާފައެވެ. އަދި، އެ ރަށުގައި ގެއްލުވައިލާފައިވާ ފުރާނަތަކުގެ ބަދަލުގައި ރަޝިޔާއަށް ވަރުގަދަ ޙަމަލާތަކެއް ދޭނެ ކަމުގައި ވިދާޅުވެ، އޭނާ ވަނީ އިންޒާރު ދެއްވާފައެވެ.