ސަޢުދުﷲއަކީ ކޮންސްޓްރަކްޝަން އިންޑަސްޓްރީއަށް އަގުހުރި ޚިދުމަތްތަކެއް ކުރެއްވި ބޭފުޅެއް: މަސީ

ފޭދޫފިނޮޅު ކައިރީގައި ހިނގި ލޯންޗް އެކްސިޑެނޓްގައި ނިޔާވި ސަޢުދުﷲ އަޙްމަދުގެ އާޢިލާއަށް މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީން ތައުޒިޔާގެ މެސެޖެއް ފޮނުވައިފިއެވެ.

މަސީން ނެރުނު ތައުޒިޔާގެ ބަޔާނުގައިވަނީ ސާސްއީ ކޮންސްޓްރަކްޝަން ކުންފުނީގެ މެނޭޖިން ޑިރެކްޓަރ ސަޢުދުﷲ އަޙްމަދަކީ އަހަރުތަކެއް ކުރިން އެއެސޯސިއޭޝަންގެ މެމްބަރު ކުންފުނިތައް ކަމުގައިވާ ރެއިންބޯ ކޮންސްޓްރަކްޝަންއާއި އައިމާ ކޮންސްޓްރަކްޝަނާއި އަމީން ކޮންސްޓްރަކްޝަންގެ ބޮޑެތި ޕްރޮޖެކްޓްތަކެއް ހިންގުމުގައި މަސައްކަތް ކުރައްވާފައިވާ ބޭފުޅެއްކަމަށެވެ. އަދި އޭގެ ފަހުން ސާސްއީ ކޮންސްޓްރަކްޝަން ކުންފުނީގައި ރާއްޖޭގެ ކޮންސްޓްރަކްޝަން އިންޑަސްޓްރީއަށް ވަރަށް ގިނަ ޚިދުމަތްތަކެއް ކުރައްވާފައިވާ ހިންގުންތެރިއެއްކަމަށެވެ.

ސަޢުދުﷲ އަޙްމަދުގެ ޚިދުމަތްތަކުގެ ތެރެއިން އައްޑޫ ސިޓީގައި ސާކް ސަމިޓް ބޭއްވުމަށް އިމާރަތްކުރި އިކުއެޓޯރިއަލް ކޮންވެންޝަން ސެންޓަރުގެ މަސައްކަތްތައްފަދަ ބޮޑެތި މަސައްކަތްތައް ހިމެނެއެވެ. ސަޢުދުﷲ އަޙްމަދު އިސްވެ ހުރެ ހިންގަވާ ސާސްއީ ކުންފުންޏަކީ ރާއްޖޭގެ ތަރައްޤީއަށްވެސް ގިނަ މަސައްކަތްތަކެއްވެސް ކުރަމުންދާ ކުންފުންޏެކެވެ. އެގޮތުން ފެނާއި ނަރުދަމައާއި ގޮނޑުދޮށް ހިމާޔަތް ކުރުމުގެ މަސައްކަތްތަކާއި ނަރުދަމާގެ މަސައްކަތްތައް ހިމެނެއެވެ.

ސަޢުދުﷲ އަޙްމަދު ނިޔާވުމާ ގުޅިގެން ކޮންސްޓްރަކްޝަން އިންޑަސްޓްރީއަށް ކުރިމަތިވި ހިތާމަވެރި ދަނޑިވަޅުގައި ދިވެހި ކޮންސްޓްރަކްޝަން އިންޑަސްޓްރީއަށާއި ސާސްއީ ކޮންސްޓްރަކްޝަން ކުނފުނީގެ ޑިރެކްޓަރުންނާއި މުވައްޒަފުންނަށާއި ޢާއިލާއަށް މަސީންވަނީ ތަޢުޒިޔާ ދަންނަވާފައެވެ.

ސަޢުދުﷲ އަޙްމަދު ނިޔާވެފައިވަނީ އިއްޔެ ހަވީރު 16:40 ހާއިރު ފޭދޫފިނޮޅު ކައިރިން 2 ލޯންޗް ޖެހި ހިނގި އެކްސިޑެންޓްގައި އޭޑީކޭ ހޮސްޕިޓަލްގެ އިމަރޖެންސީގައި ފަރުވާދެމުންދަނިކޮށް އިރުއޮއްސި 18:30 ހާއިރުއެވެ.