ހަތިޔާރު އެޅި މީހަކު އެމެރިކާގެ ޓެކްސަސް ސްޓޭޓްގެ ހިޔުސްޓަންގެ ގެއަކަށް ވަދެ، ބަޑިޖަހައި ފަސް މީހުން މަރައިލައިފިއެވެ. މި ހާދިސާގައި މަރައިލާފައި ވަނީ ހޮންޑިޔުރާސްގެ ރައްޔިތުންތަކެއް ކަމުގައި ޓެކްސަސްގެ ފުލުހުން ބުނެއެވެ. މަރައިލާފައިވާ މީހުންގެ ތެރޭގައި އަށް އަހަރުގެ ކުޑަކުއްޖަކު ވެސް ހިމެނެއެވެ. މި ހާދިސާ ހިނގި ވަގުތު އެ ގޭގައި 10 މީހުން ތިއްބެވެ.
އެ ގެއަށް ވަދެ ބަޑިން ހަމަލާދީފައި ވަނީ އެ ގޭގައި ދިރިއުޅޭ ރައްޔިތުންގެ އަވައްޓެރިއެކެވެ. އޭނާ ބަޑީގެ ޙަމަލާ ދިން ވަގުތު ހުރީ މަސްތުގެ ހާލުގައި ކަމަށް ފުލުހުން ބުނެއެވެ. އޭނާ އެ ގެއަށް ވަދެފައި ވަނީ، އޭނާގެ އަމިއްލަ ގޭގެ ގޯތިތެރޭގައި ބަޑިޖަހާތީ، އަޑުގަދަވާ ކަމަށާއި އުނދަގޫވާ ކަމަށް ބުނެ ޖެހިގެން ހުރި ގޭގައި ދިރިއުޅޭ މީހުން ޝަކުވާ ކުރުމުން އެ ކަމާ ނުރުހިގެންނެވެ.
މި ޙަމަލާގައި މަރުވި މީހުންގެ ތެރޭގައި އުމުރުން 40 އަހަރުގެ މީހަކާއި، ދެ އަންހެނުން ވެސް ހިމެނެއެވެ. ދެ އަންހެނުންގެ ހަށިގަނޑު ފެނުނީ ކޮޓަރިއެއްގެ ތެރެއިންނެވެ. އެ މީހުން ވަނީ، އެ ގޭގައި ތިބި އެހެން ކުޑަކުދިން ސަލާމަތް ކުރަން މަސައްކަތް ކޮށްފައެވެ. އެ އެންމެންގެ ހަށިގަނޑަށް އެތަކެއް ފަހަރަކު ބަޑިން ޙަމަލާދީފައިވާ ކަމުގައި މި ހާދިސާ ތަހުޤީޤު ކުރާ އިދާރާތަކުން ބުނެއެވެ. ޒަޚަމުވެފައިވާ އިތުރު ތިން މީހަކަށް މިހާރު ދަނީ ހޮސްޕިޓަލުގައި އެޑްމިޓްކޮށްގެން ފަރުވާދެމުންނެވެ.
މި ޙަމަލާގައި ޒިންމާ ވަނީ އުމުރުން 39 އަހަރުގެ މެކްސިކޯ ރައްޔިތެއް ކަމުގައިވާ ފްރާސްސިސްކޯ އޮރޮޕޭޒާ ކިޔާ މީހެއް ކަމުގައި ފުލުހުން ވިދާޅުވިއެވެ. ޙަމަލާއަށް ފަހު އޭނާ ވަނީ ފިލާފައެވެ. އަދި، އޭނާ ހޯދުމަށް ފުލުހުންނާއި އެހެން ތަހުޤީޤީ އިދާރާތަކުން ދަނީ މަސައްކަތް ކުރަމުންނެވެ. ޙަމަލާއަށް ފަހު އޭނާ ޤައުމު ދޫކޮށް ފިލާފައިވާ ކަމަށް ބެލެވޭ ކަމުގައި ފުލުހުން ވިދާޅުވިއެވެ.
އެމެރިކާގައި މި އަހަރުގެ ތެރޭގައި މި ފަދަ 170 ބަޑިޖެހުމުގެ "މާސް ޝޫޓިންގް" ހާދިސާ ހިނގާފައިވާ ކަމުގައި ރެކޯޑު ކުރެވިފައިވެއެވެ. މާސް ޝޫޓިންގްގެ ގޮތުގައި ބެލެވެނީ ހަތަރެއް ނުވަތަ އެއަށްވުރެ ގިނަ ޢަދަދެއްގެ މީހުން މަރުވާ ބަޑީގެ ޙަމަލާތަކަށެވެ. 2021 ވަނަ އަހަރު އެމެރިކާގައި ބަޑީގެ ޙަމަލާތަކުގައި މަރުވެފައިވާ މީހުންގެ ޢަދަދު 49,000 އަށް އަރައެވެ. އަދި، އޭގެ ކުރީ އަހަރު އެ ޢަދަދު ރެކޯޑު ކުރެވިފައި ވަނީ 45,000 އަށްވުރެ މަތިންނެވެ.